គិតត្រឹមឆ្នាំ២០២៥ កម្ពុជា មានប្រព័ន្ធធារាសាស្ត្រ អាចស្រោចស្រពផ្ទៃដីជាង ២លានហិកតា
24-07-2026 22:27
(ភ្នំពេញ)៖ ការយកចិត្តទុកដាក់របស់រាជរដ្ឋាភិបាលជាច្រើនអាណត្តិ ធ្វើឱ្យកម្ពុជាមានប្រព័ន្ធធារាសាស្ត្រកាន់តែច្រើនសម្រាប់បម្រើដល់ការប្រកបរបរកសិកម្មរបស់ប្រជាពលរដ្ឋ។ គិតត្រឹមឆ្នាំ២០២៥ កម្ពុជា មានប្រព័ន្ធធារាសាស្ត្រសរុបជាង ២ពាន់ប្រព័ន្ធ ហើយមានលទ្ធភាពស្រោចស្រពផ្ទៃដីបានជាង២លានហិកតា។
ក្នុងកិច្ចប្រជុំគណៈរដ្ឋមន្ត្រីក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅព្រឹកថ្ងៃសុក្រ ទី២៤ ខែកក្កដា ឆ្នាំ២០២៦នេះ បានពិនិត្យរបាយការណ៍វឌ្ឍនភាពនៃវិស័យធនធានទឹក និងវិធានការត្រៀមលក្ខណៈឆ្លើយតបបាតុភូតអែលនីញ៉ូ។
ក្រសួងធនធានទឹក និងឧតុនិយម បានដាក់ចេញផែនការយុទ្ធសាស្ត្រអភិវឌ្ឍន៍លើវិស័យធនធានទឹក និងឧតុនិយម រយៈពេល៥ឆ្នាំ (២០២៤-២០២៨) ដោយបានរៀបចំយុទ្ធសាស្ត្រចំនួន៥ រួមមាន៖ ១. ពង្រឹងអភិបាលកិច្ចស្ថាប័ន អភិវឌ្ឍន៍ធនធានមនុស្ស សហប្រតិបត្តិការ និងគោលនយោបាយគ្រប់គ្រងទឹក ២. បង្កើនប្រសិទ្ធភាពហេដ្ឋារចនាសម្ព័ន្ធការងារទឹក និងអនុត្តរភាពប្រព័ន្ធធារាសាស្ត្រប្រកបដោយគុណភាពនិងភាពធន់ ៣. ពង្រឹងសន្តិសុខទឹក និងការគ្រប់គ្រងគ្រោះមហន្តរាយ ដើម្បីបង្កើនភាពធន់នឹងការប្រែប្រួលអាកាសធាតុ ៤. ពង្រឹងការគ្រប់គ្រង ការប្រើប្រាស់បច្ចេកវិទ្យាថ្មីៗ និងនវានុវត្តន៍លើប្រព័ន្ធព័ត៌មានទិន្នន័យធនធានទឹក និងឧតុនិយម និង៥. បង្កើនប្រសិទ្ធភាពការគ្រប់គ្រង និងការអភិរក្សធនធានទឹក។
របាយការណ៍ បានបង្ហាញថា ការអភិវឌ្ឍវិស័យធនធានទឹក និងឧតុនិយម តាមរយៈការជួសជុល ស្តារឡើងវិញ និងសាងសង់ថ្មីនូវប្រព័ន្ធធារាសាស្ត្រគ្រប់ខ្នាត ប្រព័ន្ធការពារទឹកជំនន់ និងទំនប់ការពារទឹកប្រៃ បានជួយកាត់បន្ថយគ្រោះមហន្តរាយ ដែលបង្កឡើងដោយធម្មជាតិ និងធានាដល់សន្តិសុខទឹក ដោយធ្វើការផ្គត់ផ្គង់ទឹកសម្រាប់ជីវភាពរស់នៅប្រចាំថ្ងៃ ការអភិវឌ្ឍវិស័យឧស្សាហកម្ម សិប្បកម្ម ជលផល អេកូទេសចរណ៍ ការអភិរក្សប្រព័ន្ធជីវៈចម្រុះ និងការបង្កបង្កើនផលស្រូវ និងដំណាំគ្រប់ប្រភេទ ដែលជាផ្នែកមួយជួយឱ្យសម្រេចបាននូវគោលនយោបាយជាតិស្ដីពីសន្តិសុខស្បៀង និង យុទ្ធសាស្ត្រនាំស្រូវ-អង្ករចេញរបស់រាជរដ្ឋាភិបាល។
គិតត្រឹមឆ្នាំ២០២៥ កម្ពុជាមានប្រព័ន្ធធារាសាស្ត្រសរុបចំនួន ២ ៣៥៤ប្រព័ន្ធ មានលទ្ធភាពស្រោចស្រពបានប្រមាណចំនួន ២ ០០៦ ៧២២ហិកតា (ស្រូវវស្សា ១ ៤០៤ ៧៩១ ហិកតា និងស្រូវប្រាំង ៦០១ ៩៣១ហិកតា) និងដំណាំរួមផ្សំចំនួន ១២ ២៤២ហិកតា។ គិតត្រឹមឆមាសទី១ ឆ្នាំ២០២៦ កម្ពុជាមានអាងស្តុកទឹកចំនួន ១ ៦៥៩អាង ដែលមានសមត្ថភាពស្តុកទឹកអតិបរមាប្រមាណ ៤ ០០០លានម៉ែត្រគូប។
ដើម្បីផ្ដល់ភាពងាយស្រួលដល់ប្រជាពលរដ្ឋក្នុងការតាមដានធាតុអាកាសប្រចាំថ្ងៃ ក្រសួងធនធានទឹក និងឧតុនិយម បានបង្កើតកម្មវិធី MOWRAM APP សម្រាប់ដំឡើងក្នុងទូរសព្ទដៃ និងផ្ញើសារជូនដំណឹងតាមប្រព័ន្ធ ទូរសព្ទ (SMS) ដល់ប្រជាពលរដ្ឋរស់នៅតំបន់រងឥទ្ធិពលព្យុះនានា ឱ្យមានការប្រុងប្រយ័ត្នខ្ពស់ជាប្រចាំ។
ក្រសួងធនធានទឹក និងឧតុនិយម ក៏បានដាក់ចេញវិធានការត្រៀមលក្ខណៈឆ្លើយតបបាតុភូតអែលនីញ៉ូ (El Niño)។ បាតុភូតនេះ ជាទូទៅតែងតែនាំមកនូវ សីតុណ្ហភាពកាន់តែក្តៅខ្លាំង លក្ខខណ្ឌស្ងួតហែងអូសបន្លាយ ការថយចុះនៃបរិមាណទឹកភ្លៀង ព្រមទាំងការកើនឡើង នូវហានិភ័យនៃគ្រោះរាំងស្ងួត និងភ្លើងឆេះព្រៃ។
ដើម្បីឆ្លើយតបទៅនឹងបាតុភូតអែលនីញ៉ូ ក្រសួងធនធានទឹក និងឧតុនិយម បានដាក់ចេញនូវវិធានការ និងការត្រៀមលក្ខណៈ ដូចជា ១. ការជួសជុល ស្តារ និងថែទាំប្រព័ន្ធ ធារាសាស្ត្រ និងអាងស្តុកទឹក ២. ការគ្រប់គ្រងទឹក និងអភិរក្សប្រភពទឹក ៣. ការជួសជុល ស្តារ និងថែទាំស្ថានីយ ជលសាស្ត្រ និងឧតុនិយម ៤. ការត្រៀមលក្ខណៈអន្តរាគមន៍បន្ទាន់ និងការឆ្លើយតបជាក់ស្ដែង ៥. ការផ្សព្វផ្សាយ ការយល់ដឹង និង៦. កិច្ចសហប្រតិបត្តិការជាមួយក្រសួង ស្ថាប័នពាក់ព័ន្ធ៕
