(ភ្នំពេញ)៖ ក្រុមបាល់ទះជម្រើសជាតិកម្ពុជា នឹងត្រូវជួបក្រុមថៃ ជាថ្មី នៅក្នុងវគ្គពាក់កណ្ដាលផ្ដាច់ព្រ័ត្រ នៃពានរង្វាន់បាល់ទះអាស៊ីអាគ្នេយ៍ (SEA V.Cup) ឆ្នាំ២០២៦ ជើងទី២ នាវេលាម៉ោង ៣៖៣០នាទីរសៀលនេះ នៅប្រទេសឥណ្ឌូនេស៊ី។

ដំណើរមកជួបគ្នាជាថ្មី នៅវគ្គដ៏សំខាន់នេះ ក្រោយកម្ពុជា រក្សាតំណែងលេខ២ ក្នុងពូល A ខណៈម្ចាស់ផ្ទះឥណ្ឌូនេស៊ី ឈរលេខ១ បន្ទាប់ពីពួកគេ បានយកឈ្នះក្រុមជម្រើសជាតិហ្វីលីពីន ៣-១សិត (២៥-១៨, ២៥-១៧, ២៣-២៥ និង ២៥-១៩ពិន្ទុ) កាលពីម្សិលមិញ។

លទ្ធផលនេះ នាំឲ្យក្រុមបាល់ទះកម្ពុជា ត្រូវជួបក្រុមថៃ ដែលឈរលេខ១ ក្នុងពូល B គ្រាដែលឥណ្ឌូនេស៊ី ត្រូវជួបក្រុមលេខ២ វៀតណាម នៅវគ្គពាក់កណ្ដាលផ្ដាច់ព្រ័ត្រ ដូចកាលពីជើងទី១ នៃព្រឹត្តិការណ៍បាល់ទះប្រចាំតំបន់ដដែល នៅប្រទេសហ្វីលីពីន។

គួរដឹងថា កាលពីជើងទី១ កម្ពុជា បានយកឈ្នះក្រុមថៃ ៣-១សិត ខណៈឥណ្ឌូនេស៊ី បានយកឈ្នះវៀតណាម ៣-០សិត មុនជំនួបវគ្គផ្ដាច់ព្រ័ត្រកម្ពុជា បានយកឈ្នះក្រុមខ្លាំងឥណ្ឌូនេស៊ី ៣-២ ដើម្បីគ្រងជើងឯកពានរង្វាន់ SEA V.Cup ជាប្រវត្តិសាស្ដ្រតែម្ដង៕