សម្តេចបវរធិបតី ហ៊ុន ម៉ាណែត កំណត់ត្រឹមចុងកញ្ញាឆ្នាំ២០២៦ តម្រូវឱ្យក្រសួងស្ថាប័នដែលមានសេវាសាធារណៈពាក់ព័ន្ធ SME ត្រូវថ្ពក់ចូលថ្នាល CAM-DX ឱ្យរួចរាល់ និងប្រគល់ភារកិច្ចឱ្យលោក គង់ ម៉ារី រដ្ឋលេខាធិការក្រសួងសេដ្ឋកិច្ច រៀបចំធ្វើការងារនេះ (Video inside)
25-07-2026 11:27
(ភ្នំពេញ)៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីជំរុញការបម្រើសេវាសាធារណៈ ជូនសហគ្រាសធុនតូច និងមធ្យមកម្ពុជា (SME) ឱ្យកាន់តែលឿនរហ័ស សម្តេចបានកំណត់យកត្រឹមដំណាច់ខែកញ្ញា ឆ្នាំ២០២៦ខាងមុខនេះ តម្រូវឱ្យក្រសួងស្ថាប័នណា ដែលមិនទាន់ភ្ជាប់សេវាឌីជីថលរបស់ខ្លួន ចូលក្នុងថ្នាលផ្លាស់ប្តូរទិន្នន័យកម្ពុជា (CAM-DX) ត្រូវថ្ពក់ចូលឱ្យរួចរាល់។
ជាមួយគ្នានេះ សម្តេចបវរធិបតី ហ៊ុន ម៉ាណែត បានប្រគល់ភារកិច្ចជូនលោក គង់ ម៉ារី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ជាអ្នកទទួលខុសត្រូវរៀបចំការងានេះ ជាមួយក្រសួងស្ថាប័នពាក់ព័ន្ធ ឱ្យបានលឿន។
នេះបើយោងតាមវីដេអូឃ្លីបមួយ មានរយៈពេលប្រមាណជា១០នាទី ដែលសម្តេចមហាបវរធិបតី ហ៊ុន ម៉ាណែត បានបង្ហោះនៅព្រឹកថ្ងៃសៅរ៍ ទី២៥ ខែកក្កដា ឆ្នាំ២០២៦ ជាប្រសាសន៍របស់សម្តេច បានលើកឡើងក្នុងកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រ ទី២៤ ខែកក្កដា ឆ្នាំ២០២៦។
សម្តេចនាយករដ្ឋមន្ត្រី បានប្រកាសមូរដៃអាវជួយលើសហគ្រាសខ្នាតតូច និងមធ្យម បន្ទាប់ពីសម្តេចមើលឃើញបញ្ហាប្រឈមជាច្រើន ជាពិសេសការចុះបញ្ជីសហគ្រាសខ្នាតតូច និងមធ្យម នៅតែស្មុគស្មាញ មិនលឿនរហ័ស។
សម្តេចសង្កត់ធ្ងន់ថា មិនត្រូវឱ្យម្ចាស់សហគ្រាស ម្ចាស់អាជីវកម្ម កាន់ឯកសារដើរច្រើនកន្លែងនោះទេ ត្រូវរៀបចំប្រព័ន្ធបច្ចេកវិទ្យាចុះបញ្ជីកាន់ឯកសារទៅតែមួយកន្លែង ហើយឯកសាររត់ទៅគ្រប់ក្រសួង ស្ថាប័ន។ សម្តេចនឹងតាមដានដោយផ្ទាល់ ដើម្បីជំរុញឱ្យការងារនេះសម្រេចបានជោគជ័យ៕
