(ស្វាយរៀង)៖ នៅព្រឹកថ្ងៃទី២៥ ខែកក្កដា ឆ្នាំ២០២៦ លោក ឡុង សេង អនុរដ្ឋលេខាធិការក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានសង្កាត់ព្រៃឆ្លាក់ រួមជាមួយលោក គង់ ចាន់ថន ប្រធានមន្ទីរមុខងារសាធារណៈ និងជាប្រធានក្រុមការងារគណបក្សចុះជួយសង្កាត់ព្រៃឆ្លាក់ បានអញ្ជើញជាអធិបតីក្នុងពិធីប្រគេនទៀនព្រះវស្សា ទេយ្យទាន និងបច្ច័យ ដល់ព្រះសង្ឃគង់ចាំព្រះវស្សា នៅវត្តព្រៃឆ្លាក់ សង្កាត់ព្រៃឆ្លាក់ ក្រុងស្វាយរៀង។

ពិធីដ៏មានអត្ថន័យនេះ ក៏មានការអញ្ជើញចូលរួមពីសំណាក់លោក លោកស្រីអនុប្រធានក្រុមការងារ លោក លោកស្រីសមាជិកក្រុមការងារ លោក លោកស្រីក្រុមប្រឹក្សាសង្កាត់ លោក លោកស្រីថ្នាក់ដឹកនាំភូមិ និងលោកនាយប៉ុស្តិ៍នគរបាលរដ្ឋបាលសង្កាត់ផងដែរ។

ក្នុងឱកាសនោះ លោក ឡុង សេង និងក្រុមការងារ រួមជាមួយសប្បុរសជននានា បានប្រគេននូវសម្ភារៈ និងថវិកាមួយចំនួនធំ រួមមាន៖ អង្ករ ១០០គីឡូក្រាម មី២កេស ទឹកបរិសុទ្ធ២កេស ទឹកផ្លែឈើ២កេស ទឹកក្រូច២កេស ទឹកត្រី២យួរ ទឹកស៊ីអ៉ីវ២យួរ ប្រេងឆា១ដបធំ ត្រីខ២យួរ ទៀន២គីឡូក្រាម ស្ករស៥គីឡូក្រាម ប៊ីចេង២គីឡូក្រាម ថ្នាំពេទ្យ៦០កំប៉ុង និងសម្ភារៈមួយចំនួនធំផ្សេងទៀត។

ក្រៅពីសម្ភារៈ ថវិកាសរុបចំនួន ២.៥០០.០០០រៀល និង ៩០០ដុល្លារអាមេរិក ក៏ត្រូវបានប្រគេន និងឧបត្ថម្ភផងដែរ។ ក្នុងនោះថវិកាចំនួន ១.០០០.០០០រៀល សម្រាប់កសាងវត្ត ប្រគេនព្រះសង្ឃ ២អង្គ ចំនួន ៣០០.០០០រៀល ជូនតា យាយជី និងសិស្ស និស្សិត ចំនួន ២០០.០០០រៀល និងជូនកងកម្លាំង និងប្រជាការពារ ចំនួន ១០០.០០០រៀល។

ថវិកាទាំងនេះ គឺជាការចូលរួមចំណែកដ៏ថ្លៃថ្លាពីលោក ឡុង សេង ចំនួន ១.២០០.០០០រៀល និង ៩០០ដុល្លារអាមេរិក រួមជាមួយថវិកាលោក គង់ ចាន់ថន ចំនួន ៥៤០.០០០រៀល។

កាយវិការសប្បុរសធម៌នេះ បានបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំចំពោះវិស័យព្រះពុទ្ធសាសនា និងការលើកកម្ពស់ជីវភាពរស់នៅរបស់ប្រជាពលរដ្ឋក្នុងមូលដ្ឋាន៕