(បន្ទាយមានជ័យ)៖ នៅថ្ងៃទី២៥ ខែកក្កដា ឆ្នាំ២០២៦ លោក កែ គឹមយ៉ាន សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា អ្នកតំណាងរាស្រ្ត និងជាប្រធានក្រុមការងារគណបក្សចុះមូលដ្ឋាន ខេត្តបន្ទាយមានជ័យ អមដោយក្រុមការងារគ្រប់ថ្នាក់អញ្ជើញសំណេះសំណាលជាមួយមន្រ្តីគណបក្សស្រុក ឃុំ សាខាបក្សភូមិ យុវជនគណបក្សស្រុកព្រះនេត្រព្រះ។

ក្នុងឱកាសនោះលោក កែ គឹមយ៉ាន បានពាំនាំនូវការសាកសួរសុខទុក្ខ ជូនពរជ័យ កោតសសើរ អរគុណពីសម្តេចតេជោ ហ៊ុន សែន ប្រធានគណបក្សជូនដល់សមាជិក សមាជិកាគណបក្ស ថ្នាក់ដឹកនាំគ្រប់អង្គភាព កងកម្លាំងប្រដាប់អាវុធគ្រប់ប្រភេទ និងជនរួមជាតិទាំងអស់ទូទាំងខេត្តបន្ទាយមានជ័យ។

ក្នុងឱកាសនោះលោក កែ គឹមយ៉ាន ថ្លែងបន្តថា រាជរដ្ឋាភិបាលបន្តវេនដឹកនាំសម្តេចធិបតី ហ៊ុន ម៉ាណែត បានដឹកនាំដោយតម្កល់ផលប្រយោជន៍ជាតិ និងប្រជាជនជាធំ តាមរយៈការដាក់ចេញនូវគោលនយោបាយគាំទ្រសេដ្ឋកិច្ច ពង្រីកសេវាសុខភាពសាធារណៈ សេដ្ឋកិច្ច សង្គមកិច្ច គុណភាពអប់រំ គាំទ្រសហគ្រាស ការពារអធិបតេយ្យ ដោះស្រាយជម្លោះជាមួយប្រទេសជិតខាងដោយសន្តិវិធីនិងច្បាប់អន្តរជាតិ បង្ក្រាបរាល់បទល្មើសនាំសេចក្តីសុខសាន្ត និងការអភិវឌ្ឍជូនប្រជាពលរដ្ឋ។

ជាមួយនឹងលទ្ធផលការងាររបស់គណៈកម្មាធិការគណបក្សស្រុកព្រះនេត្រព្រះលោក កែ គឹមយ៉ាន បានថ្លែងកោតសរសើរ និងវាយតម្លៃខ្ពស់ចំពោះក្រុមការងារគ្រប់ថ្នាក់ និងមន្រ្តីគណបក្សទាំងអស់ដែលបានខិតខំសម្រេចបាននូវ សមិទ្ធផល និងស្នាដៃជាច្រើនសម្រាប់គណបក្សនិងប្រទេសជាតិ ហើយបន្តដំណើររបស់យើងឆ្ពោះទៅចូលរួមប្រកួតប្រជែងការបោះឆ្នោតក្រុមប្រឹក្សាឃុំ សង្កាត់អាណត្តិទី៦ ដោយពង្រឹង ពង្រីកចលនាសមាជិកនៅតាមមូលដ្ឋាន ខ្នងផ្ទះ បន្តកសាងអំពើល្អយកចិត្តទុកដាក់សុខទុក្ខផ្សារភ្ជាប់ជាមួយប្រជាពលរដ្ឋ ការពារអធិបតេយ្យ-សុខសុវត្ថិភាពតាមព្រំដែន៕