(ភ្នំពេញ)៖ លោក ឈី ហ្វាង (Qi Fang) សមាជិកក្រុមប្រឹក្សានៃសមាគម ជីហ្វា (GIFA) និងជាប្រធានគណៈប្រតិភូសម្រាប់ក្រុមអ្នកវិនិយោគចិន បានឲ្យដឹងថា មានគណៈប្រតិភូរបស់លោកបានចាប់អារម្មណ៍ ក្នុងការបើករោងចក្រលើវិស័យកសិកម្មនៅកម្ពុជា បន្ទាប់ពីបានទស្សនកិច្ចសិក្សាឈ្វេងយល់រួចហើយ។

លោកបានឲ្យដឹងបែបនេះ ក្នុងឱកាសធុរជនចិនជាច្រើនរូប បានទស្សនកិច្ចសិក្សា នៅកសិដ្ឋាន DP នៅខេត្តកំពង់ឆ្នាំង (DP Machas Chamka) ដើម្បីឈ្វេងយល់ពីឱកាសវិនិយោគ ដឹកនាំដោយអ្នកឧកញ៉ា ម៉ម វណ្ណឌី ទីប្រឹក្សាសម្ដេចតេជោ ហ៊ុន សែន និងជាអនុប្រធានសមាគមអតីតយុទ្ធជន និងនិវត្តនជនកម្ពុជា នៅថ្ងៃទី២៤ ខែកក្កដា ឆ្នាំ២០២៦។

សម្រាប់លោក ឈី ហ្វាង ក្រោយទស្សនកិច្ចនៅកម្ពុជា ពោលនៅកសិដ្ឋាននេះ ធ្វើឲ្យលោកមើលឃើញពីស្ថិរភាពនយោបាយ សន្តិសុខសង្គម និងឱកាសវិនិយោគយ៉ាងពិតប្រាកដដែលមាន។ ស្ថិរភាពនយោបាយ សន្តិសុខសង្គម និងឱកាសវិនិយោគ ដែលគណៈប្រតិភូបានឃើញផ្ទាល់នៅកម្ពុជានោះ បានខុសពីអ្វីដែលមានបង្ហាញនៅលើអនឡាញ ពោលគឺគណៈប្រតិភូខ្លះក៏បានទុកចិត្ត និងចាប់ផ្តើមដាក់ទុនវិនិយោគលើការផលិតសាប៊ូ និងចង់បើករោងចក្រផងដែរ។

លោក ឈី ហ្វាង បានបញ្ជាក់យ៉ាងដូច្នេះ «អ្នកវិនិយោគផ្សេងទៀតគាត់ចង់ធ្វើរោងចក្រនៅទីនេះ និងស្នើសុំសមាគមអតីតយុទ្ធជន និងនិវត្តជនកម្ពុជា ដើម្បីយកអតីតយុទ្ធជន និងនិវត្តជន ចូលធ្វើការនៅក្នុងរោងចក្រគាត់។ សំខាន់បំផុត គាត់ចង់ឲ្យរាជរដ្ឋាភិបាល គាំទ្រទាក់ទាងនឹងការវិនិយោគរបស់គាត់ ដូចជាច្បាប់វិនិយោគមានហើយ បន្ទាប់មកតើពេលគាត់នាំចូលមានការអនុគ្រោះអ្វីខ្លះ»។

សូមជម្រាបថា ចាប់ពីថ្ងៃទី២២ ដល់ថ្ងៃទី២៤ ខែកក្កដា ឆ្នាំ២០២៦ លោក ឈី ហ្វាង (Qi Fang) សមាជិកក្រុមប្រឹក្សានៃសមាគម ជីហ្វា (GIFA) និងជាប្រធានគណៈប្រតិភូសម្រាប់ក្រុមអ្នកវិនិយោគ បានដឹកនាំសហគ្រិនឆ្នើមៗ ចំនួន ៧៤នាក់ មាន ៦០ក្រុមហ៊ុន ទស្សនកិច្ចនៅកម្ពុជា ដែលមកពីតំបន់ជាច្រើនដូចជា ក្វាងស៊ី, ក្វាងទុង, ស៊ីឈួន, ហ្វូចៀន, ប៉េកាំង, ឆុងឈីង និងហុងកុង ដោយគ្របដណ្តប់លើវិស័យជាច្រើនរួមមានថាមពល និងថាមពលកកើតឡើងវិញ, យានយន្តថាមពលថ្មី និងការផលិតយានយន្ត, កសិកម្ម និងការកែច្នៃផលិតផលកសិកម្ម, សុខភាព និងបច្ចេកវិទ្យាវេជ្ជសាស្ត្រ, បញ្ញាសិប្បនិម្មិត (AI) និងបច្ចេកវិទ្យាឌីជីថល, ការផលិតបែបឧស្សាហកម្ម, ការកសាងហេដ្ឋារចនាសម្ព័ន្ធ, ការប្លង់ និងការរចនាស្ថាបត្យកម្ម, ពាណិជ្ជកម្មអេឡិចត្រូនិកឆ្លងដែន (E-commerce), ឡូជីស្ទីកទំនើប និងខ្សែច្រវ៉ាក់ផ្គត់ផ្គង់, ឧស្សាហកម្មទេសចរណ៍ និងសណ្ឋាគារ, សេវាកម្មហិរញ្ញវត្ថុ និងវិជ្ជាជីវៈផ្សេងៗទៀត៕