(កំពង់ស្ពឺ)៖ លោក ហ៊ុន សៅ ប្រធានសហគមន៍តំបន់ការពារធម្មជាតិរលាក់កងជើង (តំបន់ទេសចរណ៍ខ្នងផ្សារ) បានលើកឡើងថា ការអភិវឌ្ឍតំបន់ភ្នំខ្នងផ្សារ និងតំបន់ការពារធម្មជាតិរលាក់កងជើង បាននិងកំពុងប្រែក្លាយតំបន់នេះឱ្យក្លាយជាគោលដៅទេសចរណ៍ធម្មជាតិដ៏ទាក់ទាញ ខណៈហេដ្ឋារចនាសម្ព័ន្ធ និងសេវាកម្មទេសចរណ៍ត្រូវបានរៀបចំកាន់តែមានស្តង់ដារ ដែលមិនត្រឹមតែបង្កើនចំនួនភ្ញៀវទេសចរប៉ុណ្ណោះទេ ប៉ុន្តែថែមទាំងលើកកម្ពស់ជីវភាពរស់នៅរបស់ប្រជាពលរដ្ឋក្នុងសហគមន៍ផងដែរ។

ប្រធានសហគមន៍ទេសចរណ៍ បានឱ្យដឹងថា កន្លងមក សហគមន៍គ្រាន់តែមានតូបតូចៗបែបសហគមន៍សម្រាប់បម្រើភ្ញៀវប៉ុណ្ណោះ។ ប៉ុន្តែបច្ចុប្បន្ន ដោយសារការអភិវឌ្ឍហេដ្ឋារចនាសម្ព័ន្ធ បានធ្វើឱ្យតំបន់នេះមានកន្លែងទទួលភ្ញៀវ កន្លែងបរិភោគអាហារ ចំណតយានយន្ត និងសេវាកម្មផ្សេងៗដែលមានសណ្តាប់ធ្នាប់ និងស្អាតជាងមុន។ កត្តាទាំងនេះបានធ្វើឱ្យភ្នំខ្នងផ្សារកាន់តែមានភាពលេចធ្លោ និងទទួលបានប្រជាប្រិយភាពកាន់តែខ្លាំង។

លោកបានបន្តថា ពីមុន ភ្ញៀវដែលអាចធ្វើដំណើរមកកាន់តំបន់ភ្នំខ្នងផ្សារ ភាគច្រើនជាយុវវ័យដែលមានកម្លាំង និងចូលចិត្តដំណើរកម្សាន្តបែបផ្សងព្រេង។ ប៉ុន្តែបន្ទាប់ពីមានការអភិវឌ្ឍ ផ្លូវធ្វើដំណើរកាន់តែងាយស្រួល ធ្វើឱ្យភ្ញៀវគ្រប់វ័យ អាចមកទស្សនាបាន ចាប់ពីកុមារ យុវវ័យ រហូតដល់មនុស្សវ័យចំណាស់ អាយុ ៦០ ទៅ ៧០ ឆ្នាំ។

ប្រធានសហគមន៍បានបញ្ជាក់ថា ការអភិវឌ្ឍវិស័យទេសចរណ៍ ក៏បានផ្លាស់ប្តូរផ្នត់គំនិត និងជីវភាពរបស់ប្រជាពលរដ្ឋយ៉ាងច្រើន។ ពីមុន ប្រជាពលរដ្ឋពឹងផ្អែកលើការចូលព្រៃប្រមូលអនុផលព្រៃឈើ ប៉ុន្តែបច្ចុប្បន្ន ប្រមាណ ៩៥% នៃប្រជាពលរដ្ឋក្នុងសហគមន៍ បានបង្វែរមកប្រកបមុខរបរបម្រើវិស័យទេសចរណ៍។ ជាលទ្ធផល ប្រាក់ចំណូលរបស់ពួកគាត់កើនឡើង ពីការរកបានត្រឹមមួយរស់មួយថ្ងៃ ទៅជាអាចមានប្រាក់សន្សំ និងផ្គត់ផ្គង់ជីវភាពគ្រួសារបានកាន់តែប្រសើរ។

បច្ចុប្បន្ន សហគមន៍បានត្រៀមសេវាកម្មជាច្រើនសម្រាប់បម្រើភ្ញៀវទេសចរ រួមមាន មគ្គុទ្ទេសក៍ទេសចរណ៍ មេចុងភៅ ផ្ទះសំណាក់ គោយន្ត ម៉ូតូឌុប អាហារកញ្ចប់ និងតង់សម្រាប់ស្នាក់នៅ។ លើសពីនេះ សហគមន៍ក៏មានលក់ផលិតផលក្នុងស្រុក ដូចជា ស្រាស ផលិតផលស្រាថ្នាំ ផ្លែក្រវាញ និងផលិតផលសហគមន៍ជាច្រើនទៀត ដែលជួយបង្កើនប្រាក់ចំណូលដល់ប្រជាពលរដ្ឋ។

លោកបានលើកឡើងថា ភ្នំខ្នងផ្សារ ដែលធ្លាប់ជាតំបន់ដាច់ស្រយាល បច្ចុប្បន្នបានប្រែក្លាយជាគោលដៅទេសចរណ៍ដែលមានភាពងាយស្រួលក្នុងការធ្វើដំណើរ និងទទួលបានការចាប់អារម្មណ៍យ៉ាងខ្លាំងនៅលើបណ្តាញសង្គម។ លោកជឿជាក់ថា ប្រសិនបើការអភិវឌ្ឍនៅតែបន្ត ក្នុងរយៈពេល ៥ ទៅ ១០ ឆ្នាំខាងមុខ ប្រជាពលរដ្ឋនៅក្នុងសហគមន៍នឹងមានជីវភាពកាន់តែធូរធារ ដោយសារមានមុខរបរច្បាស់លាស់ និងចំណូលប្រកបដោយនិរន្តរភាព។

ជាមួយគ្នានេះ លោកបានសម្តែងការសប្បាយរីករាយ និងថ្លែងអំណរគុណចំពោះរាជរដ្ឋាភិបាល ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត ដែលបានមើលឃើញសក្ដានុពលរបស់តំបន់ភ្នំខ្នងផ្សារ និងជំរុញការអភិវឌ្ឍហេដ្ឋារចនាសម្ព័ន្ធ ធ្វើឱ្យតំបន់នេះកាន់តែមានសោភ័ណភាព មានស្តង់ដារ និងសម្របសម្រួលដល់ការអភិវឌ្ឍវិស័យទេសចរណ៍តាមសហគមន៍។

សហគមន៍តំបន់ការពារធម្មជាតិរលាក់កងជើង គឺជាសហគមន៍អេកូទេសចរណ៍ដ៏ល្បីល្បាញមួយ ដែលជាច្រកទ្វារចម្បងក្នុងការធ្វើដំណើរទៅកាន់ តំបន់ភ្នំខ្នងផ្សារ។ សហគមន៍នេះដើរតួនាទីយ៉ាងសំខាន់ក្នុងការគ្រប់គ្រងធនធានធម្មជាតិ និងផ្តល់សេវាកម្មទេសចរណ៍ដើម្បីលើកកម្ពស់ជីវភាពប្រជាជនមូលដ្ឋាន។

គួរបញ្ជាក់ដែរថា ក្រសួងបរិស្ថាន បានដឹកនាំអ្នកសារព័ត៌មានចំនួន ១៥ស្ថាប័ន ស្មើនឹង ២០ នាក់ បានអញ្ជើញមកដល់តំបន់ភ្នំខ្នងផ្សារ ក្នុងភូមិសាស្ត្រស្រុកឱរ៉ាល់ ខេត្តកំពង់ស្ពឺ កាលពីថ្ងៃទី២៣ ខែកក្កដា ឆ្នាំ២០២៦ ដើម្បីស្វែងយល់ពីការអភិវឌ្ឍគោលដៅលម្ហែបៃតងភ្នំខ្នងផ្សារ៕

សូមទស្សនាវីដេអូទាំងស្រុង ដូចខាងក្រោម៖