(ព្រះវិហារ)៖ អាជ្ញាធរ និងប្រជាពលរដ្ឋនៅស្រុកស្ទឹងត្រង់ ខេត្តកំពង់ចាម បានបន្តបង្ហាញស្មារតីសាមគ្គីភាព និងការគាំទ្រយ៉ាងពេញទំហឹង ចំពោះវីរកងទ័ពដែលកំពុងបំពេញបេសកកម្មការពារបូរណភាពទឹកដី ដោយបាននាំយកគ្រឿងឧបភោគបរិភោគ និងថវិកា ទៅឧបត្ថម្ភដល់កងពលតូចអន្តរាគមន៍លេខ៧ ដែលកំពុងឈរជើងនៅទិសភ្នំខ្មោច ខេត្តព្រះវិហារ។

ការប្រគល់អំណោយនេះ បានធ្វើឡើងនៅព្រឹកថ្ងៃទី២៥ ខែកក្កដា ឆ្នាំ២០២៦ ក្រោមការដឹកនាំរបស់លោក បាន ស្រេង អភិបាលស្រុកស្ទឹងត្រង់ លោក រស់ វីរ៉េត មេឃុំអារក្សត្នោត និងមានការចូលរួមពីរដ្ឋបាលឃុំទូទាំង ស្រុកផងដែរ។

លោក បាន ស្រេង អភិបាលស្រុកស្ទឹងត្រង់ បានថ្លែងថា៖គ្រឿងឧបភោគបរិភោគ និងថវិកាមកឧបត្ថម្ភនាពេលនេះ គឺជាការបង្ហាញពីទឹកចិត្តស្រឡាញ់ សាមគ្គីភាព និងការដឹងគុណរបស់អាជ្ញាធរ និងប្រជាពលរដ្ឋទូទាំងស្រុកស្ទឹងត្រង់ ចំពោះវីរកងទ័ពដែលកំពុងឈរជើងបំពេញភារកិច្ចការពារបូរណភាពទឹកដី និងសុខសន្តិភាពរបស់ជាតិ។

លោកអភិបាលស្រុក បានថ្លែងបញ្ជាក់ថា៖ «ទោះបីជាអំណោយដែលនាំយកមកថ្ងៃនេះ មិនមានចំនួនច្រើនក្តី ប៉ុន្តែនេះជាទឹកចិត្តដ៏ស្មោះស្ម័គ្រ និងការគាំទ្រយ៉ាងពេញទំហឹងពីសំណាក់អាជ្ញាធរ និងប្រជាពលរដ្ឋស្រុកស្ទឹងត្រង់ ជូនចំពោះបងប្អូនកងទ័ពដែលកំពុងលះបង់កម្លាំងកាយចិត្ត ដើម្បីការពារអធិបតេយ្យភាព បូរណភាពទឹកដី និងរក្សាសុខសន្តិភាពជូនប្រជាជនកម្ពុជាទាំងមូល»។

លោក បាន ស្រេង ក៏បានថ្លែងជូនពរដល់នាយទាហាន នាយទាហានរង និងពលទាហានទាំងអស់ សូមមានសុខភាពល្អ កម្លាំងមាំមួន បំពេញបេសកកម្មដោយជោគជ័យ និងវិលត្រឡប់មកជួបជុំក្រុមគ្រួសារវិញដោយសុវត្ថិភាព។ លោកក៏បានអះអាងថា អាជ្ញាធរ និងប្រជាពលរដ្ឋស្រុកស្ទឹងត្រង់ នឹងបន្តឈរនៅពីក្រោយ និងគាំទ្រដល់កងកម្លាំងប្រដាប់អាវុធជានិច្ច។
អំណោយដែលបានឧបត្ថម្ភនាពេលនេះ រួមមាន បន្លែស្រស់ជិត២តោន ត្រសក់ចាវ ស្ពៃជ្រក់ គ្រឿងទេសមួយចំនួន សាច់ជ្រូក៤០គីឡូក្រាម ប្រេងឥន្ធនៈ១៥០លីត្រ និងថវិកាចំនួន ១,០០០,០០០រៀល ដើម្បីជួយសម្រួលដល់ការហូបចុក ការដឹកជញ្ជូនត្រឡប់យកទៅអង្គភាព ជាការលើកទឹកចិត្តដល់កងកម្លាំងដែលកំពុងបំពេញភារកិច្ចនៅជួរមុខ។

ក្នុងឱកាសនោះ លោកអនុសេនីយ៍ឯក សួន តៃហេង តំណាងលោកឧត្តមសេនីយ៍ទោ ផុន សុម៉ាលី ព្រមទាំងនាយទាហាន នាយទាហានរង និងពលទាហាន នៃអង្គភាពកងពលតូចអន្តរាគមន៍លេខ៧ បានគោរពថ្លែងអំណរគុណយ៉ាងជ្រាលជ្រៅ ដល់លោក អ៊ុន ចាន់ដា អភិបាលខេត្តកំពង់ចាម លោក បាន ស្រេង អភិបាលស្រុកស្ទឹងត្រង់ មេឃុំទាំងអស់ និងប្រជាពលរដ្ឋគ្រប់ឃុំ ដែលតែងតែគាំទ្រ និងឧបត្ថម្ភដល់កងទ័ពជាប់ជាប្រចាំ។

លោក សួន តៃហេង ក៏បានថ្លែងអំណរគុណផងដែរដល់លោក ហ៊ុន ខី និងភរិយា លោកស្រី ពេញ សុខជា ដែលតែងតែចូលរួមឧបត្ថម្ភតាមរយៈអាជ្ញាធរស្រុក និងមេឃុំអារក្សត្នោត ពិសេសបានឧបត្ថម្ភដោយផ្ទាល់មុនអំឡុងពេលកើតមានព្រឹត្តិការណ៍ និងកំពុងកើតមានព្រឹត្តិការណ៍ផ្ទុះអាវុធកន្លងមក ដូចជាសូឡា និងគ្រឿងឧបភោគបរិភោគ គិតជាទឹកប្រាក់ប្រមាណ៦លានរៀល ដែលបានរួមចំណែកលើកទឹកចិត្ត និងគាំទ្រដល់កងកម្លាំងនៅជួរមុខ។

លោក សួន តៃហេង ថ្លែងបន្តថា៖ការឧបត្ថម្ភពីសំណាក់អាជ្ញាធរ និងប្រជាពលរដ្ឋស្រុកស្ទឹងត្រង់ ខេត្តកំពង់ចាម ក្រោមគំនិតផ្តួចផ្តើមពីលោក អ៊ុន ចាន់ដា អភិបាលខេត្តកំពង់ចាម បានឆ្លុះបញ្ចាំងពីស្មារតីសាមគ្គីភាពរវាង អាជ្ញាធរ ប្រជាជន និងកងកម្លាំងប្រដាប់អាវុធ ក្នុងការចូលរួមថែរក្សាសន្តិភាព សន្តិសុខ និងការពារបូរណភាពទឹកដីរបស់ព្រះរាជាណាចក្រកម្ពុជាយើងដោយមិនឱ្យសត្រូវមកឈ្លានពានបានជាដាច់ខាត៕