(រតនគិរី)៖ ចៅក្រមសាលាដំបូងខេត្តរតនគិរី កាលពីរសៀលថ្ងៃទី២៥ ខែកក្កដា ឆ្នាំ២០២៦ បានចេញដីកាសម្រេចឃុំខ្លួនលោក ឈៀង តុងហាន អាយុ៥៣ឆ្នាំ ជាបណ្តោះអាសន្ននៅពន្ធនាគារពីបទកំហែងយក។ នេះបើយោងតាមការបញ្ជាក់ពីលោក ជួន សុបញ្ញា អ្នកនាំពាក្យអយ្យការអមសាលាដំបូងខេត្តរតនគិរី។

លោក ឈៀង តុងហាន ត្រូវបានចោទប្រកាន់ពីបទកំហែងយក ដែលប្រព្រឹត្តនៅភូមិអូរកន្តិល សង្កាត់បឹងកន្សែង ក្រុងបានលុង ខេត្តរតនគិរី កាលពីអំឡុងខែមករា ឆ្នាំ២០២៦ រហូតដល់ថ្ងៃទី២០ ខែកក្កដា ឆ្នាំ២០២៦។ បទល្មើសនេះមានបញ្ញត្តិឲ្យផ្តន្ទាទោសតាមមាត្រា៣៦៣ និងមាត្រា៣៦៤ នៃក្រមព្រហ្មទណ្ឌ។

ការឃាត់ខ្លួនជនសង្ស័យរូបនេះ បានធ្វើឡើងកាលពីវេលាម៉ោង ១៣៖២០នាទីរសៀលថ្ងៃទី២២ ខែកក្កដា ឆ្នាំ២០២៦ ដោយកម្លាំងនគរបាលព្រហ្មទណ្ឌកម្រិតស្រាល នៃស្នងការនគរបាលខេត្តរតនគិរី ក្រោមការសម្របសម្រួលនីតិវិធីពីលោក ឡុង ហុកម៉េង ព្រះរាជអាជ្ញា នៃអយ្យការអមសាលាដំបូងខេត្តរតនគិរី។ ករណីនេះពាក់ព័ន្ធនឹងការជម្រិតទារប្រាក់ពីជនរងគ្រោះ ដែលបានដឹកឈើចំនួន៩កន្ទុយ។ ជនសង្ស័យបានទារប្រាក់ចំនួន៦០០.០០០រៀល (១៥០.០០០រៀលក្នុងមួយខែ រយៈពេល៤ខែ) ហើយនៅពេលជនរងគ្រោះបដិសេធមិនព្រមបង់ ជនសង្ស័យបានគំរាមកំហែង និងបានយកឈើទាំងនោះទៅបាត់។

ការសម្រេចឃុំខ្លួនជាបណ្តោះអាសន្ននេះ គឺដើម្បីបន្តនីតិវិធីច្បាប់ និងធានាបាននូវយុត្តិធម៌សម្រាប់គ្រប់ភាគីពាក់ព័ន្ធ៕