(បាត់ដំបង)៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៥ ខែកក្កដា ឆ្នាំ២០២៦នេះ បានប្រាប់អង្គភាពសារព័ត៌មាន Fresh News ថា ក្រសួងកសិកម្ម បានសហការយ៉ាងជិតស្និទ្ធជាមួយក្រសួងធនធានទឹក និងឧតុនិយម និងគណៈកម្មាធិការជាតិគ្រប់គ្រងគ្រោះមហន្តរាយ ដើម្បីសង្គ្រោះផ្ទៃដីស្រែជិត ៩,០០០ហិកតា នៅក្នុងស្រុកចំនួនពីរ នៃខេត្តបាត់ដំបង ដែលកំពុងរងផលប៉ះពាល់ដោយសារគ្រោះរាំងស្ងួត ព្រមទាំងត្រៀមបម្រុងគ្រាប់ពូជស្រូវសម្រាប់ផ្ដល់ជូនប្រជាកសិករក្នុងករណីចាំបាច់។

យោងតាមរបាយការណ៍របស់ក្រសួងធនធានទឹក និងឧតុនិយម ស្ថានភាពគ្រោះរាំងស្ងួតនេះ អាចនឹងបន្តអូសបន្លាយពេលរហូតដល់ថ្ងៃទី១០ ខែសីហា ឆ្នាំ២០២៦ ដែលកំពុងបង្កើតជាផលលំបាកយ៉ាងខ្លាំងដល់ប្រជាកសិករ ដែលបានព្រោះស្រូវរួចរាល់ និងមានទីតាំងនៅឆ្ងាយពីប្រភពទឹក។

ដោយឡែក របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា នៅស្រុកថ្មគោល និងស្រុកបវេល ផ្ទៃដីដាំដុះស្រូវវស្សាសរុបមានប្រមាណ ១១៥,៨៥៤ហិកតា ក្នុងនោះផ្ទៃដីដែលទទួលរងផលប៉ះពាល់ពីគ្រោះរាំងស្ងួតមានប្រមាណ ៣០,១៦៧ហិកតា ហើយក្រុមការងារជំនាញអន្តរាគមន៍សង្គ្រោះបានជាបណ្តើរៗចំនួន ៨,៧៤៥ហិកតាហើយ។

ចំពោះផ្ទៃដីដែលរងផលប៉ះពាល់ធ្ងន់ធ្ងរខ្លាំងមិនអាចសង្គ្រោះបាន ក្រសួងបានត្រៀមបម្រុងគ្រាប់ពូជស្រូវរួចរាល់ ដើម្បីចែកជូនប្រជាកសិករសម្រាប់ដាំដុះឡើងវិញផងដែរ៕