ពលរដ្ឋជាង៣,០០០នាក់ ថ្លែងអំណរគុណសម្តេចមហាបវរធិបតី ហ៊ុន ម៉ាណែត ដែលផ្តល់ឱកាសឲ្យក្រុមគ្រូពេទ្យកូរ៉េ មកពិនិត្យ និងព្យាបាលជំងឺដោយឥតគិតថ្លៃ នៅខេត្តកំពង់ធំ (Video inside)
25-07-2026 21:37
(កំពង់ធំ)៖ ប្រជាពលរដ្ឋជាង៣,០០០នាក់ បានសម្តែងនូវក្តីរំភើប និងថ្លែងអំណរគុណយ៉ាងជ្រាលជ្រៅចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានផ្តល់ឱកាសឲ្យក្រុមគ្រូពេទ្យ នៃសមាគមគ្រូពេទ្យស្ម័គ្រចិត្តខេត្តឃ្យុងសាងប៊ុកដូ នៃសាធារណរដ្ឋកូរ៉េ ចុះមកពិនិត្យ និងព្យាបាលជំងឺដោយឥតគិតថ្លៃជូនប្រជាពលរដ្ឋនៅខេត្តកំពង់ធំ រយៈពេល២ថ្ងៃ គឺថ្ងៃទី២៤ និងទី២៥ ខែកក្កដា ឆ្នាំ២០២៦។
នាឱកាសថ្ងៃទី២៥ ខែកក្កដា ឆ្នាំ២០២៦ ត្រូវជាថ្ងៃទី២ នៃការព្យាបាល លោក សួស យ៉ារ៉ា អ្នកតំណាងរាស្ត្រខេត្តកំពង់ធំ និងជាប្រធានក្រុមប្រឹក្សាវប្បធម៌អាស៊ី (ACC) អមដំណើរដោយអ្នកតំណាងរាស្ត្រខេត្តកំពង់ធំ ដូចជាលោក ថា យ៉ាវ លោកស្រី យស ថានារី លោក ឃឹង នុភាព ព្រមទាំងតំណាងអភិបាលខេត្តកំពង់ធំដឹកនាំ លោក អ៊ុង វុទ្ធី និងលោកលោក លំគន្ធារី អភិបាលរងខេត្តកំពង់ធំ និងលោក ប៉ឹក គឹមសាន ប្រធានមន្ទីរសុខាភិបាលខេត្តកំពង់ធំ បានចុះជួបសំណេះសំណាលជាមួយប្រជាពលរដ្ឋដែលមកទទួលសេវាពិនិត្យព្យាបាលដោយឥតគិតថ្លៃនៅមន្ទីរពេទ្យបង្អែកខេត្តកំពង់ធំ។
ប្រជាពលរដ្ឋដែលបានមកទទួលសេវាព្យាបាល បានបង្ហាញនូវភាពសប្បាយរីករាយ និងសាទរចំពោះការយកចិត្តទុកដាក់របស់ប្រមុខរាជរដ្ឋាភិបាលកម្ពុជា ដែលតែងតែគិតគូរអំពីសុខុមាលភាព និងជីវភាពរស់នៅរបស់ប្រជាពលរដ្ឋគ្រប់ទីកន្លែង។ ជាមួយគ្នានេះ ប្រជាពលរដ្ឋក៏បានជូនពរដល់ក្រុមគ្រូពេទ្យស្ម័គ្រចិត្តខេត្តឃ្យុងសាងប៊ុកដូ សូមមានសុខភាពល្អ និងទទួលបានជោគជ័យក្នុងបេសកកម្មមនុស្សធម៌ជាបន្តបន្ទាប់។
តាមរយៈ «កម្មវិធីអ្នកតំណាងរាស្ត្រដើម្បីសុខភាពប្រជាជន» ក្រុមគ្រូពេទ្យស្ម័គ្រចិត្តបានផ្តល់សេវាវេជ្ជសាស្ត្រជាច្រើនផ្នែក រួមមាន ជំងឺទូទៅ ជំងឺមាត់ធ្មេញ ការថតឆ្លុះក្រពះ និងពោះវៀន រោគស្ត្រី ជំងឺកុមារ ចក្ខុរោគ ការចាក់ម្ជុលវិទ្យាសាស្ត្រ ការពិនិត្យឈាមដោយប្រើប្រាស់បរិក្ខារវេជ្ជសាស្ត្រទំនើប ព្រមទាំងផ្តល់ឱសថដោយឥតគិតថ្លៃ ដើម្បីធានាឱ្យប្រជាពលរដ្ឋទទួលបានសេវាព្យាបាលប្រកបដោយគុណភាព និងប្រសិទ្ធភាព។
បន្ថែមពីលើបេសកកម្មផ្នែកវេជ្ជសាស្ត្រ ក្រុមគ្រូពេទ្យស្ម័គ្រចិត្តក៏បានប្រគល់ម៉ាស៊ីនត្រជាក់ចំនួន៣គ្រឿង ជូនមន្ទីរពេទ្យបង្អែកខេត្តកំពង់ធំ ដើម្បីគាំទ្រការលើកកម្ពស់បរិយាកាស និងគុណភាពនៃការផ្តល់សេវាសុខាភិបាល។ ទន្ទឹមនឹងនេះ ក្រុមការងារក៏បានផ្តល់អំណោយមនុស្សធម៌ជាច្រើន រួមមាន សម្ភារសិក្សា សម្លៀកបំពាក់កុមារ ប្រដាប់ក្មេងលេង ឈុតថ្នាំដុសធ្មេញ និងច្រាសដុសធ្មេញ ព្រមទាំងសម្ភារៈបរិក្ខារវេជ្ជសាស្ត្រ ដល់មន្ទីរពេទ្យ និងប្រជាពលរដ្ឋ ដើម្បីរួមចំណែកលើកកម្ពស់សុខុមាលភាព និងគាំទ្រការផ្តល់សេវាសុខាភិបាលក្នុងមូលដ្ឋាន។
ក្នុងរយៈពេល២ថ្ងៃ នៃការពិនិត្យព្យាបាល មានប្រជាពលរដ្ឋសរុបប្រមាណជាង ៣,២០០នាក់ បានមកទទួលសេវាពិនិត្យ និងព្យាបាលជំងឺដោយឥតគិតថ្លៃ ក្នុងនោះថ្ងៃទី១ មានចំនួន ១,៥០០នាក់ និងថ្ងៃទី២ មានចំនួន ១,៧០០នាក់៕
