មន្ត្រីជាន់ខ្ពស់ក្រសួងកសិកម្ម ចុះពិភាក្សា ពិនិត្យនិងវាយតម្លៃសភាពការណ៍ទូទៅ លើការងារកសិកម្មក្នុងខេត្តព្រៃវែង
26-07-2026 17:15
(ព្រៃវែង)៖ លោក ហាស់ សារ៉េត រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៥ ខែកក្កដា ឆ្នាំ២០២៦ បានដឹកនាំកិច្ចប្រជុំចង្អៀតជាមួយថ្នាក់ដឹកនាំ មន្ទីរ និងការិយាល័យជំនាញក្រោមឱវាទមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង ដើម្បីពិភាក្សា ពិនិត្យ និងវាយតម្លៃសភាពការណ៍ទូទៅលើការងារកសិកម្មក្នុងខេត្តព្រៃវែង។
ក្នុងឱកាសនោះ លោក អ៊ុក សំណាង ប្រធានមន្ទីរសកម្ម រុក្ខាប្រមាញ់នឹងនេសាទខេត្តព្រៃវែង បានមានមតិស្វាគមន៍ និងរបាយការណ៍សង្ខេបអំពីស្ថានភាពការងារបង្កបង្កើនផលស្រូវរដូវវស្សា គិតត្រឹមថ្ងៃទី២១ ខែកក្កដា ឆ្នាំ២០២៦ ល្បឿនបង្កបង្កើនផលស្រូវរដូវវស្សា ផ្ទៃដីគ្រោងពង្រួសស្រូវសរុប ៣០០ ០០០ ហិកតា, ការពង្រួសស្រូវសរុប ២៣៤ ៥១៥ហិកតា ក្នុងនោះមានស្រូវស្រាល ៨៦ ៧៦១ ហិកតា, ស្រូវកណ្តាល ១២៧ ០៥៥ ហិកតា, ស្រូវធ្ងន់ ២០ ៦៩៩ ហិកតា គិតជាភាគរយស្មើរ ៧៨,១៧ %នៃផ្ទៃដីគ្រោង ៣០០ ០០០ ហិកតា, ការប្រមូលផលស្រូវស្រាលសរុប ៥ ០២៨ ហិកតា។
លោកបានបន្តថា ល្បឿនបង្កបង្កើនផល ដំណាំសាកវប្បកម្ម និងឧស្សាហកម្មរយ:ពេលខ្លី រដូវវស្សា រួមមាន៖
*ទី១. ដំណាំសាកវប្បកម្ម អនុវត្តសរុប ១ ៤៨៧ ហិកតា ក្នុងនោះមាន បន្លែគ្រប់មុខ ១ ២៩៧ ហិកតា ពោតស ១៩០ ហិកតា
*ទី២. ដំណាំឧស្សាហកម្ម បានអនុវត្តសរុប ៨ ០១៧ ហិកតា ពោតក្រហម ២ ៧៦៥ ហិកតា ដំឡូងមី ១១ ហិកតា សណ្ដែកបាយ ៧០ ហិកតា សណ្ដែកដី ១០ ហិកតា ល្ង ៧២ ហិកតា អំពៅ ៥៣៧ ហិកតាឈូក ៤ ៥៥២ ហិកតា។
ជាមួយគ្នានេះ ល្បឿនប្រមូលផល ដំណាំសាកវប្បកម្ម និងឧស្សាហកម្មរយ:ពេលខ្លីរដូវប្រាំង គិតពីថ្ងៃទី២១ ខែកក្កដា ឆ្នាំ២០២៦ ដំណាំរួមផ្សំរួមមាន ប្រមូលផលសរុប ៧ ១៩២ ហិកតា បន្លែគ្រប់មុខ ៦ ៨៥៦ តោន ពោតសរ ៣៣៦ តោន ប្រមូលផលសរុប ៨ ២៦១ តោន អំពៅ ២ ២៥០ តោន ល្ង ២៧ តោន ឈូក ៥ ៩៨៣តោន។
លោកបានបញ្ជាក់ថា ស្ថានភាពការនាំចេញផលិតផលកសិកម្មក្រៅផ្លូវការទៅប្រទេសវៀតណាម គិតថ្ងៃទី១ ខែមករា ដល់ថ្ងៃទី១៩ ខែកក្កដា ឆ្នាំ២០២៦ រួមមាន៖ នាំចេញផ្លែស្វាយកែវរមៀតសរុប ១៦៦ ៨៣០ តោន តម្លៃ៦៥២ (រៀល/គីឡូក្រាម) ការនាំស្រូវចេញគិតចាប់ពីថ្ងៃទី១ ខែមករា ដល់ថ្ងៃទី១៩ ខែកក្កដា ឆ្នាំ២០២៦ សរុប ៧៨៣ ៤៥៧ តោន ក្នុងនោះតម្លៃស្រូវ IR504 មានតម្លៃ ៨៥០ រៀល តម្លៃស្រូវ OM5451 មានតម្លៃ ៨៥០រៀល។
ក្នុងឱកាសនោះ លោក ហាស់ សារ៉េត បានដឹកនាំពិភាក្សាក្នុងអង្គប្រជុំ នូវចំណុចអទិភាពការងារកសិកម្មខេត្តព្រៃវែងចំនួន៤ រួមមាន៖
*ទី១. ការងារបង្កបង្កើនផលស្រូវ ដោយបានពិភាក្សាលើបញ្ហាប្រឈមដែលរងផលប៉ះពាល់ពីការប្រែប្រួលអាកាសធាតុ (គ្រោះរាំងស្ងួត)។បន្តកិច្ចសហការជាមួយមន្ទីរធនធានទឹក និងឧតុនិយម ដើម្បីត្រៀមលក្ខណៈសង្គ្រោះស្រូវក្នុងករណីគ្មានភ្លៀងធ្លាក់។
*ទី២. ស្ថានភាពចំពោះមុខ មានភ្លៀងធ្លាក់រលឹមតិចតួច ដែលមិនទាន់បណ្តាលឱ្យស្រូវស្ងួតងាប់នៅឡើយទេ។ ការងារចិញ្ចឹមសត្វ បានយកចិត្តទុកដាក់ខ្ពស់លើការបន្តចុះចាក់វ៉ាក់សាំងការពារជំងឺសត្វជូនប្រជាពលរដ្ឋ ផ្តល់ការគាំទ្របច្ចេកទេសចិញ្ចឹមសត្វ (ជ្រូក មាន់ ទា) ក្នុងបរិបទនៃការទប់ស្កាត់ការនាំចូលសត្វពីប្រទេសជិតខាង។
*ទី៣. ការងារដាំបន្លែសុវត្ថិភាព បានលើកកម្ពស់ការដាំបន្លែសុវត្ថិភាពដើម្បីបម្រើតម្រូវការទីផ្សារ។ ស្វែងរកបច្ចេកវិទ្យាថ្មីវៃឆ្លាត ដើម្បីបណ្តុះបណ្តាលកសិករ ក្នុងគោលបំណងកាត់បន្ថយថ្លៃដើមផលិតកម្ម និងបង្កើនទិន្នផលឱ្យកាន់តែប្រសើរ។
*ទី៤. ការងារជលផល បានផ្តោតលើការលើកកម្ពស់វារីវប្បកម្ម (ការចិញ្ចឹមត្រី និងកង្កែប) ដើម្បីបម្រើតម្រូវការទីផ្សារក្នុង និងក្រៅខេត្ត និងបានស្វែងរកដៃគូទិញផលដំណាំ ផលជលផល ដើម្បីផ្សារភ្ជាប់ទំនាក់ទំនងរវាងអ្នកទិញ និងអ្នកផលិត សំដៅបង្កើតបរិយាកាសទីផ្សារប្រកបដោយចីរភាព និងរក្សាផលប្រយោជន៍ទាំងសងខាង។
បន្ថែមលើសពីនេះ លោករដ្ឋលេខាធិការ បានផ្តល់អនុសាសន៍ណែនាំដល់មន្ទីរ ត្រូវបន្តរៀបចំវគ្គបណ្តុះបណ្តាលពង្រឹងបច្ចេកទេសកសិកម្ម (ការដាំដុះ និងការចិញ្ចឹមត្រី) ដោយសិក្សាពីវិធីកាត់បន្ថយថ្លៃដើម ដើម្បីធានាបានប្រាក់ចំណេញសម្រាប់កសិករ។ ជាមួយគ្នានេះ ត្រូវបន្តតាមដានសភាពការណ៍រាំងស្ងួតយ៉ាងយកចិត្តទុកដាក់ និងប្រមូលស្រង់ទិន្នន័យស្ថិតិឱ្យមានសុក្រឹតភាពខ្ពស់ផងដែរ៕
