(ភ្នំពេញ)៖ លោក រ៉ូហ្វី អូស្មាន អនុប្រធានសមាគមសម្ព័ន្ធយុវជនមុស្លិមកម្ពុជា (ស.ម.យ.ក) និងជាប្រធានសមាគមសម្ព័ន្ធយុវជនមុស្លិមកម្ពុជារាជធានីភ្នំពេញ នៅថ្ងៃទី២៦ ខែកក្កដា ឆ្នាំ២០២៦ បានអញ្ជើញជាអធិបតីភាពក្នុង «ពិធីប្រកាសសមាសភាពក្រុមការងារចំណុះ សមាគមសម្ព័ន្ធយុវជនមុស្លិមកម្ពុជា រាជធានីភ្នំពេញ» ដែលបានប្រព្រឹត្តទៅនៅមជ្ឈមណ្ឌលឥស្លាមភ្នំពេញ។

ពិធីនេះត្រូវបានរៀបចំឡើងក្នុងគោលបំណង ដើម្បីពង្រឹងរចនាសម្ព័ន្ធការងារ បង្កើនស្មារតីសាមគ្គីភាព និងលើកកម្ពស់ប្រសិទ្ធភាពនៃការដឹកនាំ-គ្រប់គ្រងសកម្មភាពយុវជនក្នុងរាជធានីភ្នំពេញ ឲ្យកាន់តែមានភាពរលូន និងឆ្លើយតបបានយ៉ាងល្អប្រសើរចំពោះទិសដៅអភិវឌ្ឍន៍របស់សមាគម។

ក្នុងឱកាសនោះ លោក រ៉ូហ្វី អូស្មាន បានសម្តែងនូវមោទនភាព និងការកោតសរសើរយ៉ាងខ្លាំងចំពោះសមិទ្ធផល ដែលសមាគមសម្ព័ន្ធយុវជនមុស្លិមកម្ពុជារាជធានីភ្នំពេញ សម្រេចបាននាពេលកន្លងមក។ ជាពិសេសលើ «ផ្នែកគ្រឹះស្ថានឧត្តមសិក្សា» ដែលបានបង្កើតឡើងតាំងពីឆ្នាំ២០២១ ដោយចាប់ផ្តើមដំបូងមានការចូលរួមត្រឹមតែ ១៣គ្រឹះស្ថានប៉ុណ្ណោះ ប៉ុន្តែរហូតមកដល់ឆ្នាំ២០២៦នេះ សមាគមបានពង្រីកខ្លួនរហូតដល់ ២០គ្រឹះស្ថានឧត្តមសិក្សា និងមានសមាជិកនិស្សិតសរុប ៦៥០នាក់។ លោកបានគូសបញ្ជាក់ថា កើនឡើងនៃតួលេខនេះគឺជាសក្ខីភាពបង្ហាញពីទំនុកចិត្ត ស្មារតីសាមគ្គីភាព និងការរីកលូតលាស់នៃធនធានយុវជនមុស្លីម ដើម្បីត្រៀមខ្លួនធ្វើជាសសរទ្រូងដ៏រឹងមាំសម្រាប់សង្គមជាតិ។

ដើម្បីឲ្យការដឹកនាំ និងការអនុវត្តការងារកាន់តែមានប្រសិទ្ធភាពខ្ពស់ លោកបានផ្តល់នូវអនុសាសន៍ និងការផ្តាំផ្ញើសំខាន់ៗចំនួន ៤ ចំណុច ដោយបានជំរុញឱ្យក្រុមការងារទាំងអស់ពង្រឹងសាមគ្គីភាព និងឯកភាពផ្ទៃក្នុង ដោយធ្វើការជាក្រុម និងស្អិតរមួតជាមួយគ្នាដើម្បីគោលដៅបម្រើសង្គម និងអភិវឌ្ឍយុវជន។ ជាមួយគ្នានេះ លោកបានដាស់តឿនឲ្យនិស្សិតខិតខំរៀនសូត្រទាំងជំនាញទន់ និងជំនាញរឹង ព្រមទាំងទាញយកផលប្រយោជន៍ពីបច្ចេកវិទ្យាឌីជីថល (Digital Literacy) ដើម្បីអភិវឌ្ឍសមត្ថភាពខ្លួនឯងឱ្យមានទាំងចំណេះដឹង សីលធម៌ និងគុណធម៌។

លោក រ៉ូហ្វី អូស្មាន បានបន្ថែមថា ផ្នែកគ្រឹះស្ថានឧត្តមសិក្សាត្រូវបន្តធ្វើជា «ផ្ទះទីពីរ» ដ៏កក់ក្តៅ និងជាទីបង្អែកសម្រាប់សិស្ស-និស្សិតដែលទើបផ្លាស់ប្តូរមកពីខេត្ត ហើយយុវជនទាំងអស់ត្រូវប្រើប្រាស់ចំណេះដឹង កម្លាំងកាយ និងបេះដូងមនុស្សធម៌ ចូលរួមយ៉ាងសកម្មក្នុងកិច្ចការសង្គម និងការងារស្ម័គ្រចិត្ត ដើម្បីចូលរួមជួយអភិវឌ្ឍន៍សហគមន៍ ក៏ដូចជាសង្គមជាតិទាំងមូល៕