(ស្ទឹងត្រែង)៖ នៅថ្ងៃទី២៧ ខែកក្កដា ឆ្នាំ២០២៦ មន្ទីរទេសចរណ៍ខេត្តស្ទឹងត្រែង សហការជាមួយនាយកដ្ឋានបណ្ដុះបណ្ដាលជំនាញវិជ្ជាជីវៈ នៃក្រសួងទេសចរណ៍ និងរដ្ឋបាលខេត្តស្ទឹងត្រែង បានរៀបចំពិធីបើកវគ្គបណ្ដុះបណ្ដាល មគ្គុទ្ទេសក៍ទេសចរណ៍ថ្នាក់សហគមន៍ សម្រាប់អ្នកកំពុងបម្រើសេវាកម្មនាំភ្ញៀវទេសចរនៅក្នុងខេត្តស្ទឹងត្រែង ដើម្បីពង្រឹងសមត្ថភាពវិជ្ជាជីវៈ លើកកម្ពស់គុណភាពសេវាកម្ម និងបង្កើនស្តង់ដារការបម្រើភ្ញៀវទេសចរ ឱ្យស្របតាមស្តង់ដារជាតិ។

ដោយពិធីនេះប្រព្រឹត្តទៅក្រោមអធិបតីភាពលោកស្រី វណ្ណ សេរីរ័ត្ន អនុរដ្ឋលេខាធិការក្រសួងទេសចរណ៍ តំណាងលោក ហួត ហាក់ រដ្ឋមន្ត្រីក្រសួងទេសចរណ៍ និងមានការអញ្ជើញចូលរួមពី លោក សែន វ៉ាន់ស៊ីម អភិបាលរងខេត្ត តំណាងលោក សរ សុពុត្រា អភិបាលនៃគណៈអភិបាលខេត្តស្ទឹងត្រែង ព្រមទាំងថ្នាក់ដឹកនាំក្រសួង ថ្នាក់ដឹកនាំមន្ទីរទេសចរណ៍ គ្រូបង្គោល និងសិក្ខាកាមជាច្រើនរូប។

វគ្គបណ្ដុះបណ្ដាលនេះ មានគោលបំណងអភិវឌ្ឍចំណេះដឹង ជំនាញ និងក្រមសីលធម៌វិជ្ជាជីវៈរបស់មគ្គុទ្ទេសក៍ទេសចរណ៍ថ្នាក់សហគមន៍ ឱ្យអាចផ្ដល់សេវាកម្មប្រកបដោយវិជ្ជាជីវៈ និងគុណភាពខ្ពស់ ព្រមទាំងផ្សព្វផ្សាយអំពីប្រវត្តិសាស្ត្រ វប្បធម៌ ប្រពៃណី ធនធានធម្មជាតិ និងសក្ដានុពលទេសចរណ៍របស់ខេត្តស្ទឹងត្រែង។

ការរៀបចំវគ្គបណ្ដុះបណ្ដាលនេះ គឺជាផ្នែកមួយនៃការអនុវត្តគោលនយោបាយរបស់ក្រសួងទេសចរណ៍ ក្នុងការអភិវឌ្ឍធនធានមនុស្សក្នុងវិស័យទេសចរណ៍ ដែលជាកត្តាស្នូលក្នុងការលើកកម្ពស់គុណភាពសេវាកម្ម បង្កើនភាពប្រកួតប្រជែងរបស់គោលដៅទេសចរណ៍ និងរួមចំណែកជំរុញកំណើនសេដ្ឋកិច្ចមូលដ្ឋាន តាមរយៈការអភិវឌ្ឍទេសចរណ៍ប្រកបដោយនិរន្តរភាព។

ស្ទឹងត្រែង ជាខេត្តដែលមានសក្ដានុពលទេសចរណ៍ធម្មជាតិ និងទេសចរណ៍សហគមន៍យ៉ាងសម្បូរបែប។ ការបណ្ដុះបណ្ដាលមគ្គុទ្ទេសក៍ទេសចរណ៍ប្រកបដោយគុណភាព នឹងរួមចំណែកបង្កើតបទពិសោធន៍ដ៏ល្អសម្រាប់ភ្ញៀវទេសចរ នេះក៏នឹងជំរុញឱ្យវិស័យទេសចរណ៍ខេត្តស្ទឹងត្រែងកាន់តែរីកចម្រើន៕