(ពោធិ៍សាត់)៖ លោក ពៅ ពិសិដ្ឋ អភិបាលរងនៃគណៈអភិបាលខេត្ត និងជាប្រធានលេខាធិការដ្ឋាន នៃគណៈកម្មាធិការត្រួតពិនិត្យគ្រឿងញៀនខេត្តពោធិ៍សាត់ រួមជាមួយឧត្តមសេនីយ៍ឯក នាក់ យុទ្ធា អគ្គលេខាធិការរង នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន នាថ្ងៃទី២៧ ខែកក្កដា ឆ្នាំ២០២៦ បានអញ្ជើញជាអធិបតីក្នុងពិធីអបអរសាទរ ទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ២០២៦ ក្រោមប្រធានបទ «រួមគ្នាឆ្លើយតបបញ្ហាគ្រឿងញៀន ក្នុងបរិបទថ្មី ប្រកបដោយភាពច្នៃប្រឌិត»។

ពិធីដ៏មានអត្ថន័យនេះ ត្រូវបានប្រារព្ធធ្វើឡើងនៅសាលប្រជុំទេពឧកញ៉ា ឃ្លាំង មឿង សាលាខេត្តពោធិ៍សាត់ ដោយមានការអញ្ជើញចូលរួមយ៉ាងកុះករពីសំណាក់ ថ្នាក់ដឹកនាំមន្ទីរអង្គភាពនានាជុំវិញខេត្ត អភិបាលក្រុងស្រុក កងកម្លាំងប្រដាប់អាវុធទាំង៣ លោកគ្រូ អ្នកគ្រូ សិស្សានុសិស្ស និងយុវជនយ៉ាងច្រើនកុះករ។

ក្នុងរបាយការណ៍ស្វាគមន៍ របស់លោកវរសេនីយ៍ឯក ដោក យ៉េត ស្នងការរងនៃស្នងការដ្ឋាននគរបាលខេត្តពោធិ៍សាត់ ទទួលផែននគរបាលប្រយុទ្ធប្រឆាំងបទល្មើសគ្រឿងញៀន បានឱ្យដឹងថា ក្នុងរយៈពេលមួយឆ្នាំ២០២៥ កន្លងមកនេះ សមត្ថកិច្ចនគរបាល និងកងរាជអាវុធហត្ថខេត្ត សម្រេចបានលទ្ធផលបង្ក្រាបបទល្មើសសរុប២០៩ករណី, ជនសង្ស័យត្រូវឃាត់ខ្លួន៤១២នាក់ (ស្រី ៥៧នាក់), វត្ថុតាងចាប់យកគ្រឿងញៀនសរុបជាង៩,១គីឡូក្រាម, រថយន្ត២គ្រឿង, ម៉ូតូ៨៨គ្រឿង, ទូរស័ព្ទដៃ៣៥៩គ្រឿង, អាវុធផ្សេងៗ និងបានដុតបំផ្លាញចោលទម្ងន់២.៨៧៧,១ក្រាម។

លោកវរសេនីយ៍ឯកបន្តថា ចំពោះវិធានការអប់រំ និងរដ្ឋបាល យើងបានចុះផ្សព្វផ្សាយដល់ប្រជាពលរដ្ឋជាង៨៨ពាន់នាក់, គ្រប់គ្រងទីតាំងងាយរងគ្រោះ៣៤៤កន្លែង និងមុខសញ្ញា៤២៣នាក់។ ជុំវិញបញ្ហាប្រឈម គឺភូមិសាស្ត្រធំទូលាយស្មុគស្មាញ កម្លាំងជំនាញនៅមូលដ្ឋានមានតិច និងការខ្វះកិច្ចសហការពីអាណាព្យាបាលខ្លះ ក៏ដូចជាម្ចាស់ទីតាំងអាជីវកម្ម។

បន្ទាប់ពីការអានសារលិខិតរបស់ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដោយឧត្តមសេនីយ៍ឯក នាក់ យុទ្ធា និងការប្តេជ្ញាចិត្តរបស់តំណាងយុវសិស្សឆ្នើមរួចមក, លោក ពៅ ពិសិដ្ឋ បានគូសបញ្ជាក់ថា ការប្រយុទ្ធប្រឆាំងគ្រឿងញៀន មិនមែនជាភារកិច្ចរបស់បុគ្គលណាម្នាក់ ឬស្ថាប័នណាមួយនោះទេ ប៉ុន្តែជាកាតព្វកិច្ចរួមរបស់សង្គមជាតិទាំងមូល។

លោកអភិបាលរងខេត្ត បានបន្ថែមថា គ្រឿងញៀនគឺជាឧក្រិដ្ឋកម្មឆ្លងដែនដ៏ស្មុគស្មាញ ដែលបន្តរីករាលដាលតាមរយៈប្រព័ន្ធអនឡាញ កញ្ចប់បញ្ញើប្រៃសណីយ៍ និងជ្រាបចូលដល់តំបន់ដាច់ស្រយាល សហគមន៍ និងក្លឹបកម្សាន្ត។ ដើម្បីដោះស្រាយបញ្ហានេះ ប្រកបដោយប្រសិទ្ធភាព រាជរដ្ឋាភិបាលនិងរដ្ឋបាលខេត្ត មានផែនការបង្កើត «មណ្ឌលបន្សាបគ្រឿងញៀន នៅមណ្ឌលអប់រំកែប្រែទី៤» ស្ថិតក្នុងស្រុកតាលោសែនជ័យ ខេត្តពោធិ៍សាត់ ក្នុងពេលដ៏ខ្លីខាងមុខ ដើម្បីពង្រឹងការងារព្យាបាល និងស្តារនីតិសម្បទា។

លោកបានសង្កត់ធ្ងន់ថា ការបង្ក្រាប និងការអនុវត្តច្បាប់តែមួយមុខមិនគ្រប់គ្រាន់នោះឡើយ ទាមទារឱ្យមានការចូលរួមយ៉ាងសកម្មពីគ្រួសារ អាណាព្យាបាល វិស័យឯកជន សង្គមស៊ីវិល និងផ្នែកសាសនា ដោយគ្មានការលើកលែងចំពោះបទល្មើសគ្រឿងញៀនឡើយ។

ក្នុងនាមជាប្រធានលេខាធិការដ្ឋាន នៃគណៈកម្មាធិការត្រួតពិនិត្យគ្រឿងញៀនខេត្តពោធិ៍សាត់ លោកបានប្រកាសប្តេជ្ញាចិត្តប្រមូលផ្តុំកម្លាំងសរុប មធ្យោបាយសរុប និងវិធានការសរុប ដើម្បីអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ឆ្ពោះទៅកសាងខេត្តពោធិ៍សាត់មួយ ឱ្យក្លាយជា «សហគមន៍គ្មានគ្រឿងញៀន» យ៉ាងពិតប្រាកដ៕