(ពោធិ៍សាត់)៖ នាថ្ងៃទី២៧ ខែកក្កដា ឆ្នាំ២០២៦ លោក ពៅ ពិសិដ្ឋ អភិបាលរងនៃគណៈអភិបាលខេត្ត និងជាតំណាងដ៏ខ្ពង់ខ្ពស់របស់ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំកិច្ចប្រជុំគណៈកម្មាធិការសម្របសម្រួលបច្ចេកទេសក្រុមប្រឹក្សាខេត្ត លើកទី៤ ឆ្នាំ២០២៦ នៅសាលប្រជុំកោះសំពៅមាស ជាន់ទី១ អគាររដ្ឋបាលខេត្ត។

កិច្ចប្រជុំនេះក៏មានការអញ្ជើញចូលរួមផងដែរពី លោក ចេង ឡៃ និងលោក ឃាង សុជីវ័ន្ត សមាជិកក្រុមប្រឹក្សាខេត្ត ព្រមទាំងលោក លោកស្រី ជាសមាជិក សមាជិកា គណៈកម្មាធិការសម្របសម្រួលបច្ចេកទេសក្រុមប្រឹក្សាខេត្ត។

ជាកិច្ចចាប់ផ្តើម លោក ពៅ ពិសិដ្ឋ បានគូសបញ្ជាក់ពីសារៈសំខាន់នៃកិច្ចប្រជុំប្រចាំខែនេះ គឺធ្វើឡើង២ខែម្តង មួយឆ្នាំ៦ដង ក្នុងការត្រួតពិនិត្យវឌ្ឍនភាពការងារ ក៏ដូចជាការដោះស្រាយបញ្ហាប្រឈមនានា ដើម្បីធានាថា រាល់គម្រោងអភិវឌ្ឍន៍ និងសេវាសាធារណៈទាំងអស់ក្នុងខេត្តពោធិ៍សាត់ ឆ្លើយតបបានចំគោលដៅ និងតម្រូវការជាក់ស្តែងរបស់ប្រជាពលរដ្ឋ។ លោកបានជំរុញឱ្យគ្រប់អង្គភាពពាក់ព័ន្ធ និងអាជ្ញាធរគ្រប់លំដាប់ថ្នាក់ បន្តពង្រឹងកិច្ចសហការគ្នាយ៉ាងជិតស្និទ្ធ រក្សាបាននូវសាមគ្គីភាពផ្ទៃក្នុង និងយកចិត្តទុកដាក់ខ្ពស់លើការអនុវត្តតួនាទីភារកិច្ចរបស់ខ្លួន ជាពិសេសការរៀបចំវេទិកាពិគ្រោះយោបល់ និងការកសាងកម្មវិធីវិនិយោគបីឆ្នាំរំកិលរបស់ខេត្តឱ្យទទួលបានលទ្ធផលល្អប្រសើរ។

យោងតាមរបៀបវារៈទាំង៦ របស់អង្គប្រជុំ រួមមាន៖ ១-ប្រកាសហេតុ ប្រកាសគណៈអធិបតី និងពិនិត្យកូរ៉ុម, ២-ប្រសាសន៍បើកកិច្ចប្រជុំ និងការពិនិត្យ អនុម័តរបៀបវារៈនៃកិច្ចប្រជុំ, ៣-របាយការណ៍ស្តីពីលទ្ធផលការងារសម្រេចបានឆ្លើយតបទៅនឹងទិសដៅដែលបានដាក់ចេញក្នុងកិច្ចប្រជុំលើកទី៣, ៤-សេចក្តីណែនាំស្តីពីការរៀបចំវេទិកាពិគ្រោះយោបល់ កម្មវិធីវិនិយោគបីឆ្នាំរំកិលខេត្ត និងសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិលថ្នាក់ក្រុង ស្រុក សម្រាប់ខេត្តពោធិ៍សាត់, ៥-មតិយោបល់ចូលរួមរបស់សមាជិក សមាជិកា, ៦-មតិបូកសរុប និងបិទកិច្ចប្រជុំ។

អង្គប្រជុំបានប្រព្រឹត្តទៅក្នុងបរិយាកាសរីករាយ និងស្ថាបនា ព្រមទាំងបានឯកភាពគ្នាខ្ពស់លើការដាក់ចេញនូវទិសដៅការងារបន្ត ដើម្បីជំរុញដំណើរការអភិវឌ្ឍន៍សេដ្ឋកិច្ច សង្គម និងការផ្តល់សេវាជូនប្រជាពលរដ្ឋក្នុងមូលដ្ឋានខេត្តពោធិ៍សាត់ឱ្យកាន់តែមានប្រសិទ្ធភាពខ្ពស់ថែមទៀត៕