(ភ្នំពេញ)៖ សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានប្រកាសជាផ្លូវការនូវសេចក្តីសម្រេចស្តីពីការតែងតាំងអ្នកឧកញ៉ាបណ្ឌិត សំ សុខនឿន ជាអនុប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា កាលពីថ្ងៃទី២៧ ខែកក្កដា ឆ្នាំ២០២៦ នៅរាជធានីភ្នំពេញ។ ការតែងតាំងដ៏សំខាន់នេះ គឺដើម្បីពង្រឹងរចនាសម្ព័ន្ធគ្រប់គ្រង និងជំរុញសកម្មភាពរបស់សម្ព័ន្ធសមាគមឲ្យកាន់តែមានប្រសិទ្ធភាពខ្ពស់។

ក្នុងតួនាទីថ្មីនេះ អ្នកឧកញ៉ាបណ្ឌិត សំ សុខនឿន នឹងទទួលបន្ទុកលើកិច្ចការទំនាក់ទំនងធុរកិច្ច និងពាណិជ្ជកម្មអន្តរជាតិ។ នេះជាការឆ្លើយតបទៅនឹងភាពចាំបាច់របស់សម្ព័ន្ធសមាគមក្នុងការរៀបចំធនធានមនុស្ស និងរចនាសម្ព័ន្ធគ្រប់គ្រងឲ្យបានប្រសើរ ដើម្បីសម្រេចបាននូវគោលដៅយុទ្ធសាស្ត្ររបស់ខ្លួន ក្នុងការគាំទ្រ និងលើកកម្ពស់វិស័យសហគ្រាសធុនតូច និងមធ្យមនៅកម្ពុជា។

ការចូលរួមរបស់អ្នកឧកញ៉ាបណ្ឌិត សំ សុខនឿន ត្រូវបានគេរំពឹងថា នឹងនាំមកនូវបទពិសោធន៍ និងចំណេះដឹងដ៏ទូលំទូលាយ ពិសេសក្នុងការកសាងបណ្តាញទំនាក់ទំនងធុរកិច្ចទាំងក្នុងស្រុក និងក្រៅស្រុក ក៏ដូចជាការស្វែងរកឱកាសពាណិជ្ជកម្មថ្មីៗសម្រាប់សមាជិករបស់ FASMEC។

សេចក្តីសម្រេចនេះមានប្រសិទ្ធិភាពអនុវត្តចាប់ពីថ្ងៃចុះហត្ថលេខានេះតទៅ ដែលបង្ហាញពីការប្តេជ្ញាចិត្តរបស់ FASMEC ក្នុងការបន្តពង្រឹងសមត្ថភាព និងពង្រីកវិសាលភាពការងាររបស់ខ្លួន ដើម្បីរួមចំណែកដល់ការអភិវឌ្ឍសេដ្ឋកិច្ចជាតិ។⁩