ឧបនាយករដ្ឋមន្ត្រី ស៊ុន ចាន់ថុល៖ កម្ពុជាព្យាយាមកាត់បន្ថយភាពស្មុគស្មាញ ជូនដល់អ្នកវិនិយោគឲ្យកាន់តែងាយស្រួល និងមិនឈឺក្បាល (Video inside)
27-07-2026 18:02
(ភ្នំពេញ)៖ ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងថា ក្រុមប្រឹក្សាអភិវឌ្ឍន៍កម្ពុជា (CDC) បានធ្វើការកែសម្រួល ដើម្បីកាត់បន្ថយនីតិវិធី និងកាត់បន្ថយភាពស្មុគស្មាញ ជូនដល់អ្នកវិនិយោគ ដែលមកវិនិយោគនៅកម្ពុជា ឲ្យកាន់តែងាយស្រួល និងមិនឈឺក្បាល។
ការលើកឡើងបែបនេះ ធ្វើឡើងក្នុងឱកាសដែលឧបនាយករដ្ឋមន្ត្រី ស៊ុន ចាន់ថុល ធ្វើសន្និសីទសារព័ត៌មាន ស្ដីពី «អត្រាពន្ធគយថ្មី ក្នុងការនាំចូលពីកម្ពុជា ទៅសហរដ្ឋអាមេរិក បន្ទាប់ពីការស៊ើបអង្កេតអនុលោមភាព នៃមាត្រា ៣០១ ច្បាប់ពាណិជ្ជកម្ម សហរដ្ឋអាមេរិក» នាសៀលថ្ងៃទី២៧ ខែកក្កដា ឆ្នាំ២០២៦។
ឧបនាយករដ្ឋមន្ត្រី ស៊ុន ចាន់ថុល បានបញ្ជាក់យ៉ាងដូច្នេះថា «តាមការណែនាំអនុសាសន៍ និងបទបញ្ជាដ៏ខ្ពង់ខ្ពស់របស់សម្ដេចបវរធិបតី ហ៊ុន ម៉ាណែត ថាយើងត្រូវកែនីតិវិធី កាត់បន្ថយភាពស្មុគស្មាញ កាត់បន្ថយតម្លៃដឹកជញ្ជូន ទើបអាចទាក់ទាញអ្នកវិនិយោគបាន»។
ឧបនាយករដ្ឋមន្ត្រី ស៊ុន ចាន់ថុល បានលើកឡើងថា ក្រុមប្រឹក្សាអភិវឌ្ឍន៍កម្ពុជាកំពុងតែធ្វើការសិក្សា និងបានធ្វើការកែសម្រួល ដើម្បីកាត់បន្ថយនីតិវិធីកុំឲ្យអ្នកវិនិយោគ មានការរត់ពីមួយទៅមួយ ធ្វើឲ្យអ្នកវិនិយោគមានការឈឺក្បាល។
បន្ថែមពីនោះទៀត ឧបនាយករដ្ឋមន្ត្រី ស៊ុន ចាន់ថុល ជឿជាក់ថា «យើងធ្វើបាន យើងមានឆន្ទះ ដើម្បីទាក់ទាញអ្នកវិនិយោគ លើគ្រប់វិស័យទាំងអស់ ឲ្យមកបណ្ដាក់ទុនវិនិយោគ នៅក្នុងប្រទេសកម្ពុជា»។
ឧបនាយករដ្ឋមន្ត្រី ស៊ុន ចាន់ថុល បានឲ្យដឹងថា កម្ពុជាជាប្រទេសមួយនៅចំកណ្ដាលមហាអនុតំបន់មេគង្គ ដែលមានកម្ពុជា, វៀតណាម, ថៃ, ឡាវ, មីយ៉ាម៉ា, ផ្នែកខាងត្បូងនៃប្រទេសចិន ដែលមានប្រជាពលរដ្ឋ ២៥០លាននាក់ ដូច្នេះអ្នកមកបណ្ដាក់ទុនវិនិយោគនៅកម្ពុជា កុំបម្រើទីផ្សារតែ ១៧លាននាក់ ត្រូវបម្រើទីផ្សារទូទាំងពិភពលោក។
ឧបនាយករដ្ឋមន្ត្រី ស៊ុន ចាន់ថុល បានថ្លែងថា «កុំពឹងផ្អែកលើគេ ត្រូវពឹងផ្អែកលើខ្លួនឯង យើងធ្វើបាន កុំឲ្យអនាគតរបស់យើងនៅក្នុងដៃគេ អនាគតប្រទេសជាតិ នៅក្នុងដៃរបស់យើង យើងខិតខំរួមគ្នា សហការគ្នាឲ្យបានល្អ ដើម្បីមានឱកាសទាក់ទាញវិនិយោគ មកដាក់ទុននៅកម្ពុជា បង្កើតការងារជូនប្រជាពលរដ្ឋ»។
សូមជម្រាបថា ក្នុងឆមាសទី១ ឆ្នាំ២០២៦ គម្រោងវិនិយោគដែលត្រូវបានចុះបញ្ជី ដោយក្រុមប្រឹក្សាអភិវឌ្ឍន៍កម្ពុជា (ក.អ.ក.) និងអនុគណៈកម្មាធិការវិនិយោគរាជធានី ខេត្ត (អ.គ.វ.រ.ខ.) មានចំនួន២៧៦ ក្នុងទំហំទុនវិនិយោគសរុបប្រមាណ ៤ ៧ប៊ីលានដុល្លារអាម៉េរិក ដែលនឹងអាចបង្កើតការងារបានប្រមាណ១៦០ពាន់កន្លែង។
ក្នុងចំណោមគម្រោងវិនិយោគទាំង២៧៦ មានគម្រោងវិនិយោគចំនួន១៨១ ក្នុងទំហំទុនវិនិយោគប្រមាណ ៤.៤ប៊ីលានដុល្លារអាម៉េរិក និងអាចបង្កើតការងារបានប្រមាណ ជាង១២០ពាន់កន្លែង ត្រូវបានចុះបញ្ជីដោយក្រុមប្រឹក្សាអភិវឌ្ឍន៍កម្ពុជា៕
