(ភ្នំពេញ)៖ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) បានរៀបចំពិធីប្រគល់រង្វាន់លើកទឹកចិត្តជូនដល់អ្នកចូលរួមទី១លាន ក្នុងសកម្មភាពផ្សព្វផ្សាយរបស់ខ្លួន ដើម្បីអបអរសាទរសមិទ្ធផលដ៏សំខាន់នេះ និងថ្លែងអំណរគុណចំពោះសាធារណជនដែលបានចូលរួម និងគាំទ្រសកម្មភាពអប់រំ និងផ្សព្វផ្សាយរបស់អង្គជំនុំជម្រះយ៉ាងសកម្ម។

​អ្នកដែលបានទទួលរង្វាន់លើកទឹកចិត្តក្នុងនាមជាអ្នកចូលរួមទី១លាន គឺយុវសិស្ស ហ៊ង សុវណ្ណារាជ។ យុវសិស្សរូបនេះបានចូលរួមកម្មវិធី មជ្ឈមណ្ឌលធនធានចល័ត របស់អ.វ.ត.ក. ក្នុងអំឡុងពេលចុះផ្សព្វផ្សាយនៅវិទ្យាល័យចំបក់ ស្ថិតក្នុងស្រុកសំបូរ ខេត្តក្រចេះ។

ថ្លែងក្នុងឱកាសនោះ លោក ក្រាញ់ តូនី រដ្ឋលេខាធិការទីស្តីការគណៈរដ្ឋមន្ត្រី និងជាប្រធានរដ្ឋបាលស្តីទី អ.វ.ត.ក. បានសម្តែងនូវក្តីរីករាយចំពោះយុវសិស្ស ហ៊ង សុវណ្ណារាជ ដែលបានក្លាយជាអ្នកចូលរួមទី១លាន និងទទួលបានរង្វាន់លើកទឹកចិត្ត។
លោកបានគូសបញ្ជាក់ថា សមិទ្ធផលនេះឆ្លុះបញ្ចាំងពីប្រសិទ្ធភាពនៃសកម្មភាពផ្សព្វផ្សាយ និងអប់រំរបស់អង្គជំនុំជម្រះ ព្រមទាំងការជឿទុកចិត្ត និងការគាំទ្ររបស់សាធារណជនចំពោះបេសកកម្មរបស់ អ.វ.ត.ក. ក្នុងការបន្សល់ទុកមរតកចំណេះដឹង និងបទពិសោធអំពីយុត្តិធម៌អន្តរកាលសម្រាប់មនុស្សជំនាន់ក្រោយ។

ជាមួយគ្នានោះដែរ យុវសិស្ស ហ៊ង សុវណ្ណារាជ បានសម្តែងនូវក្តីរីករាយ និងថ្លែងអំណរគុណចំពោះ អ.វ.ត.ក. ដែលបានផ្តល់រង្វាន់លើកទឹកចិត្ត។ យុវសិស្សរូបនេះបានលើកឡើងថា ការចូលរួមក្នុងកម្មវិធីផ្សព្វផ្សាយរបស់ អ.វ.ត.ក. បានជួយឱ្យខ្លួនយល់ដឹងកាន់តែច្បាស់អំពីប្រវត្តិសាស្ត្រកម្ពុជាក្នុងរបបខ្មែរក្រហម ដំណើរការស្វែងរកយុត្តិធម៌ និងតម្លៃនៃសន្តិភាព។

ការឈានដល់អ្នកចូលរួមទី១លាន គឺជាសមិទ្ធផលដ៏មានន័យ ដែលឆ្លុះបញ្ចាំងពីការចាប់អារម្មណ៍ និងការចូលរួមកាន់តែទូលំទូលាយពីសិស្ស និស្សិត យុវជន មន្ត្រីរាជការ ដៃគូអភិវឌ្ឍន៍ និងសាធារណជនទូទៅ ក្នុងកម្មវិធីផ្សព្វផ្សាយនានារបស់ អ.វ.ត.ក.។ សកម្មភាពទាំងនេះមានគោលបំណងលើកកម្ពស់ការយល់ដឹងអំពីប្រវត្តិសាស្ត្រកម្ពុជាក្នុងរបបខ្មែរក្រហម ដំណើរការស្វែងរកយុត្តិធម៌ និងការលើកស្ទួយតម្លៃសន្តិភាព ការផ្សះផ្សាជាតិ និងនីតិរដ្ឋ។

អ.វ.ត.ក. នឹងបន្តរៀបចំសកម្មភាពផ្សព្វផ្សាយ និងអប់រំឱ្យកាន់តែទូលំទូលាយ និងមានភាពច្នៃប្រឌិតបន្ថែមទៀត ដើម្បីលើកកម្ពស់ការយល់ដឹងរបស់សាធារណជន ជាពិសេសយុវជន អំពីសមិទ្ធផល និងមរតករបស់អង្គជំនុំជម្រះវិសាមញ្ញក្នុងតុលាការកម្ពុជា និងរួមចំណែកលើកស្ទួយវប្បធម៌សន្តិភាព ការចងចាំប្រវត្តិសាស្ត្រ និងការទប់ស្កាត់មិនឱ្យអំពើឃោរឃៅស្រដៀងគ្នានេះកើតឡើងម្តងទៀត។