(ភ្នំពេញ)៖ អភិបាលរាជធានីភ្នំពេញ លោក ឃួង ស្រេង និងលោកស្រី បានអញ្ជើញប្រារព្ឋពិធីវេរទៀនវស្សាប្រគេនទេយ្យវត្ថុបច្ច័យ និងគ្រឿងបរិក្ខារ ចំពោះព្រះសង្ឃ ចំនួន១៥១វត្ត និងសាលាបុណ្យ ចំនួន៥ ក្នុងរាជធានីភ្នំពេញ សម្រាប់បុណ្យចូលព្រះវស្សា នៅវត្តច័ន្ទបុរីវង្ស នៅថ្ងៃចន្ទ ទី២៧ ខែកក្កដា ឆ្នាំ២០២៦ ស្ថិតក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ។

រៀងរាល់ឆ្នាំ តាមគន្លងប្រពៃណីរបស់ព្រះពុទ្ធសានា លោក ឃួង ស្រេង និងលោកស្រី ជា ស៊ីណា ឃួង ស្រេង អមដំណើរដោយមន្រ្តីក្រោមឱវាទ នៃរដ្ឋបាលរាជធានីភ្នំពេញ បានប្រគល់ជូនដល់អភិបាលខណ្ឌទាំង១៤ ដើម្បីអភិបាលខណ្ឌ បន្តប្រគេនទេយ្យទាន ទៀនព្រះវស្សា គ្រឿងឧបភោគ បរិភោគ និងបច្ច័យ ដល់ព្រះសង្ឃដែលគង់ចាំព្រះវស្សា នៅតាមវត្ត ចំនួន១៥១វត្ត និងសាលាបុណ្យ ចំនួន៥ ទូទាំងរាជធានីភ្នំពេញ ដើម្បីជួយទំនុកបំរុង និងបង្កលក្ខណៈងាយស្រសួលសម្រាប់ព្រះសង្ឃនៅរដូវវស្សានេះ។

សម្រាប់១៥១វត្ត និងសាលាបុណ្យ៥កន្លែង ក្នុងរាជធានីភ្នំពេញ លោក ឃួង ស្រេង និងលោកស្រី ជា ស៊ីណា ឃួង ស្រេង បានប្រគេនទៀនវស្សា បច្ច័យ និងទេយ្យទានទាំងក្នុងមួយវត្ត និងសាលាបុណ្យនីមួយៗ មានបច្ច័យ ៣០ម៉ឺនរៀល, ទៀនព្រះវស្សា ១គូ, អង្ករ១០០គីឡូក្រាម, សាដក១, ស្ករស១បា ស្មើ២៥គីឡូក្រាម, ទឹកដោះគោខាប់ ១កេស ស្មើ ៤៨កំប៉ុង, ទឹកក្រូច ៥កេស, ទឹកសុទ្ធ ៥កេស, មី៥កេស, ត្រីខកំប៉ុង ១កេស ស្មើ១០០កំប៉ុងផងដែរ។

គួរបញ្ជាក់ផងដែរថា ពិធីបុណ្យចូលព្រះវស្សា ប្រារព្ធធ្វើឡើងជារៀងរាល់ឆ្នាំ ដោយចាប់ផ្តើមពីថ្ងៃ១រោច ខែអាសាធ ដល់ថ្ងៃ១៥កើត ខែអស្សុជ។ ជាទំនៀមទំលាប់ ពិធីនេះ ត្រូវចាប់ផ្តើមនៅល្ងាចថ្ងៃទី១៥ កើត ខែអាសាឍ ដោយមានការចូលរួមពីសំណាក់បងប្អូន និងចាស់ទុំចំណុះជើងវត្ត នាំគ្នាហែរទៀនវស្សា សំពត់ សាដក និងសម្ភារៈប្រើប្រាស់ផ្សេងៗ ហែរជុំវិញព្រះវិហារ និងបន្ទាប់មកសម្តែងធម៌ទេសនា និងវេរទៀនវស្សា និងសម្ភារៈប្រគេនដល់ព្រះសង្ឃ។

ក្នុងឱកាសនោះ សម្ដេចព្រះពោធិវាំង ណយ ច្រឹកព្រះសង្ឃនាយករងទី១ នៃព្រះរាជាណាចក្រកម្ពុជា បានជូនពរសព្ទសាធុការដល់លោក ឃួង ស្រេង និងលោកស្រី ជា ស៊ីណា ឃួង ស្រេង និងកូនៗ ព្រមទាំងមន្រ្តីរាជការ ចំណុះឱ្យរដ្ឋបាលរាជធានីភ្នំពេញទាំងអស់។

ក្នុងអំឡុងពេលចូលវស្សានេះ មានរយៈ ៣ខែនេះ ប្រជាពលរដ្ឋដែលគោរពព្រះពុទ្ធសាសនា និយមធ្វើចង្ហាន់ នំចំណី និងគ្រឿងប្រើប្រាស់ផ្សេងៗ ទៅប្រគេនជាបន្តបន្ទាប់សម្រាប់ផ្គត់ផ្គង់ព្រះសង្ឃគង់ចាំព្រះវស្សា ក្នុងអំឡុងពេលនេះផងដែរ៕