លោក ងួន ណារ៉ា និងលោក ច្រឹង ខ្មៅ ដឹកនាំកិច្ចប្រជុំបូកសរុបលទ្ធផលអនុវត្តយុទ្ធនាការក្នុងឆមាសទី១ ឆ្នាំ២០២៦ និងកំណត់ទិសដៅការងារបន្ត
27-07-2026 20:07
(ភ្នំពេញ)៖ នាព្រឹកថ្ងៃទី២៧ ខែកក្កដា ឆ្នាំ២០២៦ លោក ងួន ណារ៉ា ប្រធានសាលាដំបូងរាជធានីភ្នំពេញ និងលោក ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ បានដឹកនាំកិច្ចប្រជុំបូកសរុបលទ្ធផលអនុវត្តយុទ្ធនាការក្នុងឆមាសទី១ ឆ្នាំ២០២៦ និងកំណត់ទិសដៅការងារសម្រាប់ឆមាសទី២ ឆ្នាំ២០២៦ ដោយមានការចូលរួមពីថ្នាក់ដឹកនាំ ចៅក្រម ព្រះរាជអាជ្ញារង ក្រឡាបញ្ជី និងមន្ត្រីរាជការនៃសាលាដំបូងរាជធានីភ្នំពេញ សរុបចំនួន ២៨៩ រូប។
ក្នុងកិច្ចប្រជុំ លោក ងួន ណារ៉ា បានលើកឡើងពីគោលបំណង និងសារៈសំខាន់នៃការបូកសរុបលទ្ធផលការងារ ដើម្បីវាយតម្លៃសមិទ្ធផល ស្វែងរកបញ្ហាប្រឈម និងកំណត់ទិសដៅអនុវត្តការងារបន្ត។ បន្ទាប់មក លោក អ៊ី រិន្ទ ប្រធានលេខាធិការដ្ឋានរដ្ឋបាល បានធ្វើបទបង្ហាញអំពីរបាយការណ៍លទ្ធផលអនុវត្តយុទ្ធនាការក្នុងឆមាសទី១ និងទិសដៅការងារសម្រាប់ឆមាសទី២ ឆ្នាំ២០២៦។
កិច្ចប្រជុំក៏បានផ្តល់ឱកាសឱ្យថ្នាក់ដឹកនាំ ចៅក្រម ព្រះរាជអាជ្ញា ក្រឡាបញ្ជី និងមន្ត្រីពាក់ព័ន្ធ ពិភាក្សា ផ្លាស់ប្តូរយោបល់ និងចែករំលែកបទពិសោធន៍ក្នុងការអនុវត្តការងារ ដើម្បីស្វែងរកដំណោះស្រាយ និងពន្លឿនការចាត់ចែងសំណុំរឿងឱ្យកាន់តែមានប្រសិទ្ធភាព។
លោក ច្រឹង ខ្មៅ បានណែនាំឱ្យមន្ត្រីទាំងអស់បន្តពន្លឿនចំណាត់ការសំណុំរឿង ប្រកាន់ខ្ជាប់វិន័យ ក្រមសីលធម៌វិជ្ជាជីវៈ និងគោរពពេលវេលាការងារ។ លោកក៏បានលើកទឹកចិត្តដល់មន្ត្រីដែលមិនទាន់សម្រេចបានលទ្ធផលល្អក្នុងឆមាសទី១ ឱ្យបន្តខិតខំប្រឹងប្រែង ដើម្បីសម្រេចបានសមិទ្ធផលកាន់តែល្អប្រសើរក្នុងឆមាសទី២។
ជាមួយគ្នានេះ លោក ងួន ណារ៉ា បានដាក់ចេញនូវទិសដៅសំខាន់ៗ ដោយជំរុញឱ្យមន្ត្រីគ្រប់រូបបន្តពន្លឿនចំណាត់ការសំណុំរឿងគ្រប់ប្រភេទឱ្យបានឆាប់រហ័ស ម៉ឺងម៉ាត់ និងស្របតាមច្បាប់ ជាពិសេសសំណុំរឿងអាទិភាព រួមមាន សំណុំរឿងអត្រានុកូលដ្ឋាន សំណុំរឿងចរាចរណ៍ សំណុំរឿងគ្រឿងញៀន សំណុំរឿងក្មេងទំនើង និងសំណុំរឿងឆបោកតាមប្រព័ន្ធបច្ចេកវិទ្យា (Online Scams)។
លោកក៏បានកោតសរសើរចំពោះមន្ត្រីដែលបានបំពេញការងារប្រកបដោយការទទួលខុសត្រូវ គោរពក្រមសីលធម៌វិជ្ជាជីវៈ និងឆ្លើយតបសំណើរបស់ភាគីបានទាន់ពេលវេលា ព្រមទាំងបានណែនាំឱ្យបន្តប្រើប្រាស់ប្រព័ន្ធគ្រប់គ្រងសំណុំរឿងឱ្យមានប្រសិទ្ធភាព ពង្រឹងកិច្ចសហការផ្ទៃក្នុង លើកកម្ពស់ស្មារតីទទួលខុសត្រូវ និងភាពជាម្ចាស់ការ ដើម្បីធានាឱ្យការផ្តល់សេវាយុត្តិធម៌មានគុណភាព ប្រសិទ្ធភាព និងទទួលបានទំនុកចិត្តពីប្រជាពលរដ្ឋ។
ទន្ទឹមនឹងនេះ លោកក៏បានរំលឹកអំពីអនុសាសន៍របស់លោក កើត រិទ្ធ ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌ ស្តីពីការបន្តអនុវត្តយុទ្ធនាការជំរុញ និងពន្លឿនចំណាត់ការរឿងក្តីនៅតាមសាលាជម្រះក្តីទូទាំងប្រទេស ដោយផ្តោតលើសំណុំរឿងអាទិភាព ដើម្បីធានាឱ្យការសម្រេចរឿងក្តីប្រកបដោយប្រសិទ្ធភាព ឆាប់រហ័ស តម្លាភាព និងស្របតាមច្បាប់។
កិច្ចប្រជុំបានបញ្ចប់ក្នុងបរិយាកាសប្រកបដោយស្មារតីទទួលខុសត្រូវ សាមគ្គីភាព និងកិច្ចសហការល្អ ដោយអ្នកចូលរួមទាំងអស់បានបង្ហាញការប្តេជ្ញាចិត្តអនុវត្តទិសដៅ និងអនុសាសន៍របស់ថ្នាក់ដឹកនាំ ដើម្បីបន្តលើកកម្ពស់គុណភាព ប្រសិទ្ធភាព និងភាពជឿជាក់នៃការផ្តល់សេវាយុត្តិធម៌ជូនប្រជាពលរដ្ឋ៕
