(ពោធិ៍សាត់)៖ នៅថ្ងៃទី២៧ ខែកក្កដា ឆ្នាំ២០២៦ កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានបន្តអញ្ជើញចុះពិនិត្យស្ថានភាពផលប៉ះពាល់ដំណាំស្រូវរបស់កសិករ ដោយសារកង្វះទឹកស្រោចស្រព និងពិនិត្យទ្វារទឹក ក្នុងភូមិចំការលើ ឃុំបឹងខ្នារ ស្រុកបាកាន ខេត្តពោធិ៍សាត់។

យោងតាមការពិនិត្យជាក់ស្តែង ក្នុងចំណោមបណ្តាក្រុង-ស្រុក ក្នុងខេត្តពោធិ៍សាត់ គឺស្រុកបាកាន បានប៉ះពាល់ និងខូចខាតច្រើនជាងគេ។

អំឡុងពេលចុះពិនិត្យ ទេសរដ្ឋមន្ត្រី គន់ គីម បានពិនិត្យឃើញថា ដំណាំស្រូវរបស់កសិករមិនអាចសង្គ្រោះបានក្នុងរយៈពេលខ្លីនោះទេ ដោយសារទ្វារទឹកស្រោចស្រពមិនអាចមានលទ្ធភាព ក្នុងការបញ្ជូនទឹកស្រោចស្រពនោះទេ។

ឆ្លើយតបចំពោះស្ថានភាពនេះ ទេសរដ្ឋមន្ត្រី បានលើកឡើងពីគោលការណ៍ និងវិធានការជួយសង្គ្រោះ ដើម្បីស្តារដំណាំស្រូវឡើងវិញ តាមរយៈស្បៀងបម្រុងរបស់រាជរដ្ឋាភិបាល ដើម្បីផ្តល់ជាពូជស្រូវជូនកសិករ។

ទេសរដ្ឋមន្ត្រី លើកឡើងថា ចំពោះមុខ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានផ្តល់អនុសាសន៍យ៉ាងម៉ឺងម៉ាត់ទៅក្រសួង-ស្ថាប័នពាក់ព័ន្ធ ដើម្បីសហការចុះអន្តរាគមន៍ទឹកឱ្យអស់ពីលទ្ធភាពពីប្រព័ន្ធធារាសាស្ត្រទាំងអស់ ព្រមទាំងមានវិធានការចាំបាច់ទៅលើការជួយបូមទឹកជូនកសិករផងដែរ។

ឆ្លៀតក្នុងឱកាសនោះ ទេសរដ្ឋមន្ត្រី បានណែនាំដល់រដ្ឋបាលខេត្ត និងមន្ទីរជំនាញពាក់ព័ន្ធ សហការគ្នាប្រមូលទិន្នន័យពីផលប៉ះពាល់ និងការខូចខាតឱ្យបានច្បាស់លាស់ ពិសេសដំណាំស្រូវនៅតំបន់ផ្សេងទៀតដែលអាចអន្តរាគមន៍ទឹកដោះស្រាយបាន គឺត្រូវវាយតម្លៃ និងកំណត់ពីវិធានការសង្គ្រោះស្រូវជូនប្រជាកសិករ។

សូមជម្រាបថា ខេត្តពោធិ៍សាត់ មានក្រុង និងស្រុកចំនួន៦ ដែលមានស្រូវប៉ះពាល់ និងខូចខាត ខណៈស្រុកបាកានមានស្រូវខូចខាតធ្ងន់ធ្ងរជាងគេចំនួន ៦,៩០៨ហិកតា។