(ភ្នំពេញ)៖ លោក ទីវ តារារិទ្ធ អ្នកជិះកង់ផ្សងព្រេងឆ្លងទ្វីបតែម្នាក់ឯងពីកម្ពុជាទៅកាន់ទ្វីបអឺរ៉ុប និងបញ្ចប់នៅតំបន់អាហ្វ្រិកខាងត្បូង បានប្រកាសពីគម្រោងចងក្រងសៀវភៅ និងផលិតភាពយន្តឯកសារដែលមានចំណងជើងថា «២ឆ្នាំ ជាមួយកង់» (TWO YEARS ON A BIKE)។ ថវិកាដែលបានពីការលក់សៀវភៅនេះ នឹងត្រូវបែងចែកមួយចំណែកសម្រាប់ជួយដល់កុមារកម្ពុជា ដែលឆ្លុះបញ្ចាំងពីបេសកកម្មមនុស្សធម៌ដ៏ថ្លៃថ្លារបស់លោក។

បេសកកម្មដ៏វែងឆ្ងាយនេះ មិនត្រឹមតែជាការងារសប្បុរសធម៌ប៉ុណ្ណោះទេ តែជាកំណត់ត្រាប្រវត្តិសាស្ត្រថ្មីមួយសម្រាប់កម្ពុជា ដោយលោក ទីវ តារារិទ្ធ ជាយុវជនខ្មែរដំបូងគេដែលបានធ្វើដំណើរដោយជិះកង់ឆ្លងកាត់ ៤០ប្រទេស ក្នុងរយៈចម្ងាយជិត ៦០,០០០គីឡូម៉ែត្រ។ ការធ្វើដំណើរនេះបានពាំនាំកេរ្តិ៍ឈ្មោះកម្ពុជាទៅកាន់ឆាកអន្តរជាតិ និងបានបង្ហាញពីស្មារតីតស៊ូរបស់យុវជនខ្មែរ។

លោកសង្ឃឹមថា យុវជនខ្មែរនឹងមានមោទនភាព និងមើលឃើញពីសមត្ថភាពរបស់ខ្លួនក្នុងការសម្រេចកិច្ចការធំៗ។

ក្នុងអំឡុងពេលនៃការធ្វើដំណើរ លោក ទីវ តារារិទ្ធ បានជួបប្រទះឧបសគ្គ និងគ្រោះថ្នាក់ជាច្រើន រួមមានការឡើងភ្នំហិមាល័យកម្ពស់ ៦,០០០ម៉ែត្រ ការធ្វើដំណើរក្នុងរដូវរងារនៅអាស៊ីកណ្តាលដែលមានសីតុណ្ហភាពចុះដល់ -៤០អង្សាសេ និងការធ្លាក់ខ្លួនឈឺដោយជំងឺគ្រុនចាញ់នៅទ្វីបអាហ្វ្រិក។ បទពិសោធន៍ទាំងនេះបានបង្ហាញពីការលះបង់ និងភាពក្លាហានរបស់លោក។

គួររំលឹកថា លោក ទីវ តារារិទ្ធ បានវិលត្រឡប់មកប្រទេសកម្ពុជាវិញកាលពីយប់ថ្ងៃទី២២ ខែមិថុនា ឆ្នាំ២០២៦ បន្ទាប់ពីបានចេញដំណើរពីមន្ទីរពេទ្យកុមារអង្គរ ខេត្តសៀមរាប កាលពីថ្ងៃទី០៦ ខែមិថុនា ឆ្នាំ២០២៤។

នារសៀលថ្ងៃទី២៧ ខែកក្កដា ឆ្នាំ២០២៦ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានដឹកនាំសម្របសម្រួលសន្និសីទសារព័ត៌មានបិទបញ្ចប់បេសកកម្មនេះ ដែលក្នុងនោះថវិការៃអង្គាសបានជាង ២៦ម៉ឺនដុល្លារ ត្រូវបានប្រគល់ជូនមូលនិធិគន្ធបុប្ផាកម្ពុជា។ បេសកកម្មជិះកង់ឆ្លង៣ទ្វីបនេះ បានបិទបញ្ចប់ជាស្ថាពរនៅថ្ងៃទី៣ ខែមិថុនា ឆ្នាំ២០២៦៕