(កណ្ដាល)៖ បន្ទាប់ពីមានសេចក្តីរាយការណ៍អំពីករណីសង្ស័យថាមានការបញ្ចេញសំណល់រាវចូលទឹកទន្លេបាទី នាថ្ងៃទី២៧ ខែកក្កដា ឆ្នាំ២០២៦ ក្រុមការងារអធិការកិច្ចនៃអគ្គនាយកដ្ឋានគាំពារបរិស្ថាន ដឹកនាំដោយលោក ឡៅ គឹមឈី អនុប្រធាននាយកដ្ឋាន រួមជាមួយមន្ទីរបរិស្ថានខេត្តកណ្ដាល បានចុះត្រួតពិនិត្យក្រុមហ៊ុន KICYN (CAMBODIA) CO., LTD. ដែលជាប្រភេទរោងចក្រផលិតបោកគក់សម្លៀកបំពាក់ ស្ថិតនៅភូមិកោះខ្នុរ ឃុំព្រែករកា ស្រុកកណ្ដាលស្ទឹង ខេត្តកណ្ដាល។

ក្នុងពេលចុះត្រួតពិនិត្យ ក្រុមការងារបានពិនិត្យឃើញមានទឹកថ្លាមានពពុះ និងមានក្លិនអូសាវែល ហូរចេញពីលូអាងប្រព្រឹត្តិកម្មសម្អាតសំណល់រាវចុងក្រោយរបស់ក្រុមហ៊ុន ចូលទៅក្នុងទន្លេបាទី។ ក្រុមការងារបានយកសំណាកទឹកចំនួនមួយសំណាក នៅទីតាំងខាងចុង មុនបង្ហូរចូលទន្លេបាទី មកវិភាគនៅមន្ទីរពិសោធន៍ក្រសួងបរិស្ថាន ដើម្បីកំណត់គុណភាពទឹក។

ក្រុមហ៊ុន KICYN បានប្រើប្រាស់ម៉ាស៊ីនបោកចំនួន ៣៨ម៉ាស៊ីន​​​ សម្ងួតចំនួន ៤១ និងម៉ាស៊ីនពូតចំនួន ៧ ក្នុងផលិតកម្មរបស់ខ្លួន។ សំណល់រាវចេញពីផលិតកម្ម ត្រូវបានបង្ហូរចូលអាងប្រព្រឹត្តិកម្មបែបគីមីសាស្រ្ត ដោយប្រើប្រាស់សារធាតុ PAC, NAOH, PAM, SODA ASH និងបាញ់ខ្យល់ មុននឹងបង្ហូរតាមប្រព័ន្ធលូចូលទន្លេបាទី។

ក្រុមហ៊ុនក៏បានរៀបចំរបាយការណ៍ IEIA និងលិខិតអនុញ្ញាតបញ្ចេញសំណល់ពាក់ព័ន្ធត្រឹមត្រូវ ព្រមទាំងបានបំពាក់ឧបករណ៍តាមដានគុណភាពទឹកដោយស្វ័យប្រវត្តិ ដែលលទ្ធផលបឋមបង្ហាញថាអនុលោមតាមស្ដង់ដារ (pH=7.94)។

ទោះជាយ៉ាងណា ក្រសួងបរិស្ថានបានដាក់វិធានការមួយចំនួនចំពោះក្រុមហ៊ុន ដោយហាមដាច់ខាតមិនឱ្យបង្ហូរសំណល់រាវដោយផ្ទាល់ ដោយមិនឆ្លងកាត់ការធ្វើប្រព្រឹត្តិកម្មសម្អាតបានត្រឹមត្រូវតាមលក្ខណៈបច្ចេកទេសឡើយ។ ក្រុមហ៊ុននឹងទទួលខុសត្រូវតាមច្បាប់ ប្រសិនបើលទ្ធផលធ្វើតេស្តគុណភាពទឹកនៅមន្ទីរពិសោធន៍ក្រសួងបរិស្ថានរកឃើញថាលើសកម្រិតកំណត់ស្ដង់ដារ ដែលអាចបង្កផលប៉ះពាល់ដល់បរិស្ថាន៕