(ពោធិ៍សាត់)៖ ជាពុទ្ធសាសនិកប្រកបដោយសទ្ធាជ្រះថ្លា លោកអ្នកឧកញ៉ា ទ្រី ភាព ទីប្រឹក្សា និងជាបេសកជនពិសេសសម្តេចតេជោ ហ៊ុន សែន ប្រធានព្រឹទ្ធ​សភា និងអ្នកឧកញ៉ា គៀន ស្រីនាង តែងតែគោរពប្រណិប័តន៍ និងចូលរួម​បំពេញបុណ្យរាល់កម្មវិធីរបស់ព្រះពុទ្ធសាសនា។ ក្នុងនោះក្នុង​ពិធី​បុណ្យ​ចូល​ព្រះវស្សាដែលជាពុទ្ធប្បវេណីរបស់ខ្មែរ លោកអ្នកឧកញ៉ា ទ្រី ភាព និងអ្នក​ឧក​ញ៉ា គៀន ស្រីនាង តែងប្រគេនទៀនព្រះវស្សា និងទេយ្យទានតាមទីអារាម​នា​នា។

នៅឆ្នាំនេះពិធីបុណ្យចូលព្រះវស្សា នឹងត្រូវប្រារព្ធធ្វើចាប់ពីថ្ងៃព្រហស្បតិ៍ ១រោច ខែទុតិយាសាឍ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី៣០ ខែកក្កដា ឆ្នាំ២០២៦នេះតទៅ។ ក្នុងកំឡុងពិធីបុណ្យដែលមានរយៈពេល ៣ខែនេះ ព្រះសង្ឃមិននិមន្តចាកចេញពីវត្តអារាម ដើម្បីនិមន្តបិណ្ឌ​បាត្រ​ដូចពេលធម្មតាបាននោះទេ។ ព្រះសង្ឃត្រូវគង់ក្នុងបរិវេណវត្តអារាម ទោះជា​យ៉ាងណាក៏ដោយ ព្រះសង្ឃអាចទទួលយកការនិមន្ត​របស់អ្នកកាន់សាសនា និងនិមន្តចេញនៅពេលថ្ងៃ ប៉ុន្តែមិនអាចនិមន្តទៅទីឆ្ងាយដោយដាច់​រាត្រីឆ្លង​ថ្ងៃនោះឡើយ។

ក្នុងកំលុងពេលនេះ អ្នកកាន់ព្រះពុទ្ធសាសនានឹងប្រគេនទៀនព្រះវស្សា ជា​ទៀនធំ ដែលត្រូវបំភ្លឺពេញមួយថ្ងៃ និងយប់ ព្រមទាំងប្រេង ស្បង់ចីពរ និងគ្រឿងឧបភោគបរិភោគផ្សេងៗដល់ព្រះសង្ឃ។

ដើម្បីចូលរួមចំណែកទ្រទ្រង់ដល់ព្រះសង្ឃដែលនឹងត្រូវគង់ចាំព្រះវស្សានាពេលខាងមុខនេះ ក្នុងនាមជាពុទ្ធសាសនិក នាព្រឹកថ្ងៃចន្ទ និងថ្ងៃអង្គារ ១៣-១៤​កើត ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី​២៧-២៨ ខែ​កក្កដា ឆ្នាំ២០២៦ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រី​នាង បានចាត់លោក ឃៀង សុជីវ័ន្ត អគ្គនាយករងក្រុមហ៊ុន ទ្រី ភាព គ្រុប នាំយកទៀនព្រះវស្សា និងទេយ្យទាន ទៅប្រគេនព្រះសង្ឃគង់​ចាំព្រះវស្សា​ចំនួន ១១វត្ត និងបូជនីយដ្ឋានចំនួន២ ក្នុងក្រុងពោធិ៍សាត់ ស្រុកវាលវែង និង​ស្រុកភ្នំក្រវាញ ខេត្តពោធិ៍សាត់។

វត្ត និងបូជនីយដ្ឋាន ដែលបានប្រគេនទៀនព្រះវស្សា និងទេយ្យទាននោះ រួម​មាន៖ វត្តហ្លួង, វត្តសិរីគង្គារសេដ្ឋារាម, វត្តគិរីវង្គត់ឥសីសិទ្ធិ, វត្តគិរីបទុមពរ​, វត្ត​រស្មីសីលារតនារាម, វត្តគិរីបុទុមសីលារតនារាម, វត្តកែវជុំវត្តគិរីបទុមពិសី,វត្ត​ព្រះពុទ្ធប្រោសសត្វ, វត្តគិរីខណ្ឌសីមាវង្សាសែនជ័យ,វត្តលម្ពីនីវិសាលវ័ន​ណា​រាម, បូជនីយដ្ឋានឧកញ៉ា ឃ្លាំង មឿង និងបូជនីយដ្ឋានលោកតាគ្រី។

ទេយ្យទាន និងបច្ច័យដែលបានប្រគេនជូនក្នុងវត្តនីមួយៗរួមមាន៖ បច្ច័យ​ទ្រទ្រង់ចង្ហាន់ព្រះសង្ឃចំនួន ១.០០០.០០០រៀល, បច្ច័យបួនចំនួន ៥០០.០០០ រៀល, អាចារ្យចំនួន ១៨នាក់ ម្នាក់ៗទទួលបានថវិកា ១០០.០០០រៀល, ទៀនព្រះវស្សាចំនួន ១គូ, សាដកចំនួន ១កញ្ចប់, អង្ករផ្កាម្លិះចំនួន ១០០គីឡូ​ក្រាម, មីជាតិចំនួន ៣កេស, ទឹកដោះគោខាប់ ចំនួន ១កេសធំ, ទឹកក្រូច ៥កេស, ទឹកសុទ្ធ ៥កេស, សាច់ជ្រូកផាត់ចំនួន ៥គីឡូក្រាម, ប្រេងឆា ចំនួន ២ ដបធំ, ទឹកស៊ីអ៊ីវ ២យួរ, ទឹកត្រី ២យួរ និងប្រេងម៉ាស៊ូត​ចំនួន ៣០លីត្រ។

ក្នុងពិធីនោះ លោក ឃៀង សុជីវ័ន្ត បានថ្លែងអំណរគុណយ៉ាង​ជ្រាលជ្រៅ​ចំពោះ លោកអ្នកឧកញ៉ា និងលោកស្រី ព្រមទាំងសូមឧទ្ទិសនូវកុសល​ផល​បុណ្យ ដែលកើតចេញពីសទ្ធាជ្រះថ្លារបស់ លោកទាំងពីរជូនចំពោះ​បុព្វកា​រី​ជន និងញាតិសន្តានទាំងប្រាំពីរសន្តាន ដែលបានចែកឋានទៅកាន់​លោកខាង​មុខ និងបួងសួងសូមឱ្យអំណាចនៃកុសលផលបុណ្យនេះ ជួយតាមបីបាច់​ថែ​រក្សា លោកអ្នកឧកញ៉ា បណ្ឌិត ទ្រី ភាព និងអ្នកឧកញ៉ា គៀន ស្រីនាង ព្រម​ទាំង​បុត្រា-បុត្រី និងថ្នាក់ដឹកនាំ បុគ្គលិកគ្រប់លំដាប់ថ្នាក់នៃក្រុមហ៊ុន ទ្រី ភាព គ្រុប ជួបប្រទះតែសេចក្តីសុខ សេចក្តីចម្រើន និងសមប្រកបដោយ​ពុទ្ធ​ពរ​ទាំង​បួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ឆ្លៀតក្នុងឱកាសនោះ លោកអគ្គនាយករង ក៏បាននាំយកអំណោយ​សប្បុរស​ធម៌​រួមមាន ទឹកក្រូច និងថវិកាមួយចំនួន ជូនដល់ក្រុមគ្រួសារភៀសសឹកចំនួន ៨គ្រួសារ ដែលកំពុងស្នាក់នៅក្នុងបរិវេណវត្តផងដែរ។

សូមបញ្ជាក់ដែរថា ពិធីប្រគេនទៀនព្រះវស្សា និងទេយ្យទាន​ជូន​ដល់វត្ត និង​ថ្វាយ​ដល់បូជនីយដ្ឋាន ក្នុងខេត្តពោធិ៍សាត់ នាឱកាសនេះ លោកអ្នក​ឧកញ៉ា​បណ្ឌិត និងភរិយា បានចំណាយថវិកាសរុបប្រមាណ ៨០.០០០.០០០រៀល៕