(បន្ទាយមានជ័យ)៖ រដ្ឋបាលខេត្តបន្ទាយមានជ័យ កាលពីព្រឹកថ្ងៃទី២៨ ខែកក្កដា ឆ្នាំ២០២៦ បានប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២៦ ក្រោមប្រធានបទ «រួមគ្នាឆ្លើយតបបញ្ហាគ្រឿងញៀន ក្នុងបរិបទថ្មីប្រកបដោយភាពច្នៃប្រឌិត»។

ក្នុងឱកាសនោះ គ្រឿងញៀនសរុបចំនួន ១៤៨.៥ គីឡូក្រាម ត្រូវបានដុតបំផ្លាញចោលជាសាធារណៈ ដើម្បីបង្ហាញពីការប្តេជ្ញាចិត្តយ៉ាងមុតមាំក្នុងការប្រយុទ្ធប្រឆាំងបទល្មើសគ្រឿងញៀន។

ពិធីនេះបានប្រព្រឹត្តទៅក្រោមអធិបតីភាពឧត្តមសេនីយ៍ឯក នាក់ យុទ្ធា អគ្គលេខាធិការងអាជ្ញាធរជាតិប្រយុទ្ធប្រឆាំងគ្រឿងញៀន តំណាងសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន រួមជាមួយលោក ប្លែក វ៉ារី ប្រធានក្រុមប្រឹក្សាខេត្ត និងលោក លី សុវណ្ណារិទ្ធិ អភិបាលខេត្តស្តីទី ព្រមទាំងមន្ត្រីរាជការ និស្សិត សិស្សានុសិស្ស និងយុវជនជាច្រើននាក់។

ក្នុងឱកាសនោះឧត្តមសេនីយ៍ឯក នាក់ យុទ្ធា ក៏បានអានសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងបានផ្សព្វផ្សាយខ្លឹមសារផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ តាមរយៈគោលនយោបាយ «ភូមិ ឃុំ-សង្កាត់ មានសុវត្ថិភាព» ព្រមទាំងផលអវិជ្ជមាននៃការប្រើប្រាស់គ្រឿងញៀន និងកម្មវិធី App NoDrug។

លោក លី សុវណ្ណារិទ្ធិ បានដាក់ចេញនូវអនុសាសន៍ចំនួន ៦ចំណុច ដោយជំរុញឱ្យគ្រប់ភាគីពាក់ព័ន្ធ បង្កើនការអប់រំ យុវជនត្រូវធ្វើជាគំរូល្អ និងអាជ្ញាធរមូលដ្ឋានត្រូវបន្តអនុវត្តវិធានការបង្ការ ទប់ស្កាត់ និងបង្ក្រាបបទល្មើសគ្រឿងញៀនឱ្យបានម៉ឺងម៉ាត់។

ការប្រារព្ធទិវានេះ គឺជាការបង្ហាញពីការប្តេជ្ញាចិត្តរួមគ្នាក្នុងការប្រយុទ្ធប្រឆាំងគ្រឿងញៀន ដើម្បីធានាបាននូវសន្តិសុខ សណ្តាប់ធ្នាប់សាធារណៈ និងសុខុមាលភាពសង្គម ស្របតាមចក្ខុវិស័យរបស់រាជរដ្ឋាភិបាលកម្ពុជា៕