(កៀហ្ស៊ីស៊ីស្ថាន)៖ ប្រតិភូក្រសួងព័ត៌មាននៃព្រះរាជាណាចក្រកម្ពុជា ដឹកនាំដោយលោក ប្រាក់ ថាវអមិដា អនុរដ្ឋលេខាធិការ និងជាតំណាងលោក នេត្រ ភក្ត្រា រដ្ឋមន្ត្រីក្រសួងព័ត៌មាន បានអញ្ជើញចូលរួមក្នុងកិច្ចប្រជុំកំពូលប្រព័ន្ធផ្សព្វផ្សាយ និងវិទ្យាស្ថានស្រាវជ្រាវនៃអង្គការសហប្រតិបត្តិការសៀងហៃ ឆ្នាំ២០២៦ (SCO Media and Think Tank Summit 2026)។

កិច្ចប្រជុំដ៏មានសារៈសំខាន់នេះ ប្រព្រឹត្តទៅចាប់ពីថ្ងៃទី២៧ ដល់ថ្ងៃទី២៩ ខែកក្កដា ឆ្នាំ២០២៦ នៅទីក្រុងប៊ីស្កែក សាធារណរដ្ឋកៀហ្ស៊ីស៊ីស្ថាន។

កិច្ចប្រជុំកំពូលនេះ រៀបចំឡើងដោយទីភ្នាក់ងារព័ត៌មាន ស៊ីនហួ សហការជាមួយទីភ្នាក់ងារព័ត៌មានជាតិ Kabar របស់កៀហ្ស៊ីស៊ីស្ថាន ក្រោមមូលបទ «សារៈសំខាន់នៃស្មារតីសៀងហៃក្នុងយុគសម័យថ្មី៖ ពីការឯកភាពលើតម្លៃ ឆ្ពោះទៅការអនុវត្តកិច្ចសហប្រតិបត្តិការ»។

វេទិកានេះបានផ្តោតលើប្រធានបទសំខាន់ៗចំនួនបួន រួមមាន សមាហរណកម្មប្រព័ន្ធផ្សព្វផ្សាយឆ្លាតវៃ កិច្ចសហប្រតិបត្តិការផ្តោតលើលទ្ធផលជាក់ស្តែង អភិបាលកិច្ចសកល និងការបើកចំហ និងកិច្ចសហប្រតិបត្តិការឈ្នះ-ឈ្នះ។

ការចូលរួមរបស់ប្រតិភូកម្ពុជា គឺជាឱកាសដ៏សំខាន់ក្នុងការសិក្សាស្វែងយល់ពីគោលនយោបាយ និងវឌ្ឍនភាពនៃការអភិវឌ្ឍវិស័យព័ត៌មាន ជាពិសេសការធ្វើបរិវត្តកម្មឌីជីថល ការលើកកម្ពស់ក្រមសីលធម៌វិជ្ជាជីវៈ និងការពង្រឹងសមត្ថភាពប្រព័ន្ធផ្សព្វផ្សាយ។

វេទិកានេះក៏ផ្តល់នូវបទពិសោធល្អៗ តាមរយៈការផ្លាស់ប្តូរទស្សនៈ និងបទពិសោធរបស់អ្នកដឹកនាំស្ថាប័នសារព័ត៌មាន អ្នកស្រាវជ្រាវ និងតំណាងរដ្ឋាភិបាលមកពីបណ្តាប្រទេសនានា ពាក់ព័ន្ធនឹងការប្រើប្រាស់បច្ចេកវិទ្យាឌីជីថល បញ្ញាសិប្បនិម្មិត និងការឆ្លើយតបនឹងបញ្ហាប្រឈមនៃព័ត៌មានក្លែងក្លាយ។

វត្តមានរបស់ប្រតិភូក្រសួងព័ត៌មានកម្ពុជា នៅក្នុងវេទិកាអន្តរជាតិនេះ ក៏ជាផ្នែកមួយនៃការពង្រីកបេសកកម្ម «ការទូតព័ត៌មាន» របស់កម្ពុជា ដោយប្រើប្រាស់ប្រព័ន្ធផ្សព្វផ្សាយជាស្ពានតភ្ជាប់ការយល់ដឹង ការកសាងទំនុកចិត្ត និងការពង្រឹងមិត្តភាពរវាងប្រជាជន និងប្រជាជន។

លើសពីនេះ កម្ពុជាអាចបន្តពង្រីកបណ្តាញភាពជាដៃគូជាមួយស្ថាប័នសារព័ត៌មាន និងវិទ្យាស្ថានស្រាវជ្រាវនៅក្នុងតំបន់ និងអន្តរជាតិ ដើម្បីជំរុញកិច្ចសហប្រតិបត្តិការឱ្យកាន់តែស៊ីជម្រៅ និងមានប្រសិទ្ធភាព។

ការចូលរួមរបស់ប្រតិភូកម្ពុជា ក្នុងកិច្ចប្រជុំកំពូលប្រព័ន្ធផ្សព្វផ្សាយ និងវិទ្យាស្ថានស្រាវជ្រាវ SCO ឆ្នាំ២០២៦ ឆ្លុះបញ្ចាំងពីការប្តេជ្ញាចិត្តរបស់កម្ពុជា ក្នុងការពង្រីកកិច្ចសហប្រតិបត្តិការអន្តរជាតិ ពង្រឹងការទូតព័ត៌មាន និងលើកកម្ពស់តួនាទីរបស់ប្រព័ន្ធផ្សព្វផ្សាយ ក្នុងការកសាងសន្តិភាព ការយល់ដឹងគ្នា និងកិច្ចសហប្រតិបត្តិការដើម្បីផលប្រយោជន៍រួម៕