(កំពង់ស្ពឺ)៖ នៅវេលាទាបភ្លឺថ្ងៃទី២៧ ខែកក្កដា​ ឆ្នាំ២០២៦ កម្លាំងផ្នែកនគរបាលព្រហ្មទណ្ឌស្រុកសំរោងទង​ សហការជាមួយកម្លាំងនគរបាលប៉ុស្តិ៍ត្រពាំងគង​ និងសន្តិសុខ បានឃាត់ខ្លួនឈ្មោះ ជួន វីត អាយុ ២៩ឆ្នាំ ស្នាក់នៅបន្ទប់ជួលភូមិដំណាក់ជ័យ​ ឃុំព្រះនិពាន្វ​ ស្រុកគងពិសី​ ខេត្តកំពង់ស្ពឺ ដែលជាអ្នកចូលលួចកាត់ខ្សែភ្លើងក្នុងបន្ទប់ទួប៊ីនភ្លើង នៅក្នុងការដ្ឋានសាងសង់រោងចក្រមួយកន្លែង ខាងត្បូងភូមិត្រពាំងវែង ឃុំត្រពាំងគង ស្រុកសំរោងទង ខេត្តកំពង់ស្ពឺ។

លោកវរសេនីយ៍ឯក ឃុត សុផល អធិការស្រុកសំរោងទង បានឲ្យដឹងថា បន្ទាប់ពីសាកសួរជនសង្ស័យខាងលើ បានឆ្លើយសារភាពថា ពិតជាបានលួចកាត់ខ្សែភ្លើងពិតមែន ហើយមានបក្ខពួកចំនួន៥នាក់។ ភ្លាមៗកម្លាំង បានបន្តសហការជាមួយកម្លាំងនគរបាលស្រុកគងពិសី បន្តឃាត់ខ្លួនបាន៣នាក់៖ ឈ្មោះ​ ធី ថុង អាយុ២០ឆ្នាំ, ឈ្មោះ​ គីម វណ្ណនី អាយុ​២៥ឆ្នាំ, ឈ្មោះ​ បូ ឡេន អាយុ៤១ឆ្នាំ និងឈ្មោះ វ័ន្ត អាយុ២៥ឆ្នាំ មិនស្គាល់ទីលំនៅ (គេចខ្លួន)។

លោកអធិការបានបន្តថា ករណីឃាត់មនុស្សសរុប៤នាក់ ក្នុងនោះដកហូតវត្ថុតាងមាន ម៉ូទ័រកាត់​១​ កូនកាំបិតចុច១​ ដង្កាប់ ៤ ម៉ាលែត១​ កន្រ្តៃ ២ កូនសោរមួយចំនួន និង ម៉ូតូ ១គ្រឿង។ ករណីនេះកម្លាំងជំនាញ និងនគរបាលប៉ុស្តិ៍ បានកសាងសំណុំរឿងចាត់ការតាមនីតិវិធី៕