(តាកែវ)៖ លោក វ៉ី សំណាង អភិបាលខេត្តតាកែវ អមដំណើរដោយមន្ត្រីជំនាញពាក់ព័ន្ធ នៅថ្ងៃទី២៨ ខែកក្កដា ឆ្នាំ២០២៦នេះ បានអញ្ជើញចុះពិនិត្យការដ្ឋានសាងសង់ផ្លូវបេតុងអាមេមួយខ្សែ ប្រវែង ៥គីឡូម៉ែត្រ និងទទឹង ៦ម៉ែត្រ ស្ថិតក្នុងស្រុកកោះអណ្ដែត។

ផ្លូវមួយខ្សែនេះ គឺជាអំណោយដ៏ថ្លៃថ្លារបស់លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ដែលបានផ្តល់ជូនប្រជាពលរដ្ឋក្នុងមូលដ្ឋាន ដើម្បីសម្រួលដល់ការធ្វើដំណើរ និងលើកកម្ពស់ជីវភាពរស់នៅ។

បើយោងតាមអាជ្ញាធរស្រុកកោះអណ្ដែត ផ្លូវបេតុងនេះបានលាតសន្ធឹងឆ្លងកាត់ឃុំចំនួន២ និងភូមិចំនួន៤ ដោយចាប់ពីភូមិទួលកណ្ដាល ឃុំព្រៃខ្លា រហូតដល់ភូមិព្រៃម្លូ ឃុំក្រពុំឈូក ស្រុកកោះអណ្ដែត។ ផ្លូវនេះនឹងផ្តល់ផលប្រយោជន៍ដោយផ្ទាល់ជូនប្រជាពលរដ្ឋរស់នៅជុំវិញចំនួន ១.៦២៣គ្រួសារ ស្មើនឹង ៦.៧៦២នាក់។

ក្នុងឱកាសចុះពិនិត្យនោះ លោក វ៉ី សំណាង បានថ្លែងអំណរគុណយ៉ាងជ្រាលជ្រៅបំផុតចំពោះលោកអភិសន្តិបណ្ឌិត ស សុខា និងលោកជំទាវ ដែលតែងតែយកចិត្តទុកដាក់ខ្ពស់លើសុខទុក្ខ និងការអភិវឌ្ឍហេដ្ឋារចនាសម្ព័ន្ធក្នុងខេត្តតាកែវ។

លោកអភិបាលខេត្តបានចាត់ទុកថា ផ្លូវបេតុងអាមេនេះ គឺជាសមិទ្ធផលប្រវត្តិសាស្ត្រថ្មីមួយទៀតសម្រាប់បងប្អូនប្រជាពលរដ្ឋក្នុងស្រុកកោះអណ្ដែត ដែលមិនត្រឹមតែជួយសម្រួលដល់ការធ្វើដំណើរ ដឹកជញ្ជូនកសិផល និងទំនិញផ្សេងៗទៅកាន់ទីផ្សារឱ្យបានលឿនរហ័សប៉ុណ្ណោះទេ ប៉ុន្តែថែមទាំងជាកាតាលីករយ៉ាងសំខាន់ក្នុងការលើកកម្ពស់ជីវភាពរស់នៅ និងប្រែក្លាយមុខមាត់មូលដ្ឋានឱ្យកាន់តែមានការអភិវឌ្ឍរីកចម្រើនយ៉ាងឆាប់រហ័ស។

ឆ្លៀតក្នុងឱកាសនោះ លោកអភិបាលខេត្តក៏បានអំពាវនាវដល់បងប្អូនប្រជាពលរដ្ឋទាំងអស់ដែលរស់នៅអមសងខាងផ្លូវ និងអ្នកប្រើប្រាស់ផ្លូវនេះ សូមរួមគ្នាជួយថែរក្សាការពារផ្លូវបេតុងនេះឱ្យបានល្អប្រសើរ ដើម្បីឱ្យផ្លូវនេះស្ថិតស្ថេរគង់វង្ស និងបម្រើផលប្រយោជន៍រួមបានយូរអង្វែង ព្រមទាំងបានរំលឹកឱ្យបើកបរដោយមានការប្រុងប្រយ័ត្ន និងគោរពច្បាប់ចរាចរណ៍ទាំងអស់គ្នាផងដែរ៕