(កណ្ដាល)៖ កម្លាំងនគរបាលស្រុកខ្សាច់កណ្តាល ខេត្តកណ្តាល កំពុងបន្តស្រាវជ្រាវស្វែងរកជនសង្ស័យចំនួន ៤នាក់ ដែលបានធ្វើសកម្មភាពលួចមានស្ថានទម្ងន់ទោស (គាស់ផ្ទះ) យកម៉ូតូចំនួន២គ្រឿង និងសម្ភារមួយចំនួន កាលពីយប់ថ្ងៃទី២៤ ខែកក្កដា ឆ្នាំ២០២៦ នៅភូមិអញ្ជែងលើ ឃុំពុកឫស្សី ស្រុកខ្សាច់កណ្តាល។

ករណីនេះបានកើតឡើងបន្ទាប់ពីមានគណនីហ្វេសប៊ុកមួយ បានស្នើសុំឱ្យស្នងការនគរបាលខេត្តកណ្តាល ជួយអន្តរាគមន៍លើករណីលួចខាងលើ។ ក្រោយទទួលបានព័ត៌មាន លោកវរសេនីយ៍ឯក ម៉ែន សុខឃឿន អធិការនគរបាលស្រុកខ្សាច់កណ្តាល បានបញ្ជាឱ្យកម្លាំងជំនាញចុះស្រាវជ្រាវជាបន្ទាន់។

តាមការស្រាវជ្រាវបានរកឃើញថា ពិតជាមានករណីលួចគាស់ផ្ទះកើតឡើងនៅវេលាម៉ោងប្រហែល ០២:០០ នាទីទាបភ្លឺថ្ងៃទី២៤ ខែកក្កដា ឆ្នាំ២០២៦ លើជនរងគ្រោះឈ្មោះ ម៉េង សម្បត្តិ ភេទប្រុស អាយុ ៥១ឆ្នាំ។ ជនសង្ស័យចំនួន ៤នាក់ មិនស្គាល់អត្តសញ្ញាណ បានធ្វើសកម្មភាពគាស់សោទ្វាររបងចូលលួចយកម៉ូតូម៉ាក Honda Scoopy i មួយគ្រឿង និងម៉ូតូម៉ាក Honda Dream មួយគ្រឿង រួមទាំងកាបូបដៃដែលមានប្រាក់ ៣០០,០០០ រៀល អត្តសញ្ញាណប័ណ្ណ និងប័ណ្ណ ប.ស.ស មួយចំនួនទៀត។

តាមរយៈកាមេរ៉ាសុវត្ថិភាព បានបង្ហាញយ៉ាងច្បាស់ពីសកម្មភាពរបស់ជនសង្ស័យទាំង ៤នាក់ ដែលបានជិះគេចខ្លួនទៅទិសខាងជើងក្រោយធ្វើសកម្មភាពរួច។

បច្ចុប្បន្ន កម្លាំងជំនាញ នៃអធិការដ្ឋាននគរបាលស្រុកខ្សាច់កណ្តាល កំពុងបន្តខិតខំប្រឹងប្រែងស្រាវជ្រាវយ៉ាងយកចិត្តទុកដាក់ ដើម្បីកំណត់អត្តសញ្ញាណ និងចាប់ខ្លួនជនសង្ស័យយកមកផ្ដន្ទាទោសតាមនីតិវិធីច្បាប់។
អធិការដ្ឋាននគរបាលស្រុកខ្សាច់កណ្តាល ក៏បានថ្លែងអំណរគុណចំពោះបងប្អូនប្រជាពលរដ្ឋដែលបានផ្តល់ព័ត៌មានជូនសមត្ថកិច្ច ដើម្បីរួមចំណែករក្សាសន្តិសុខសណ្តាប់ធ្នាប់ក្នុងមូលដ្ឋាន៕