(ភ្នំពេញ)៖ ការកែទម្រង់សេវាសាធារណៈ គឺជាគន្លឹះយ៉ាងសំខាន់សម្រាប់ការអភិវឌ្ឍន៍ជាតិ, ជុំវិញការធ្វើកំណែរទម្រង់នេះលោក សារិន វណ្ណា ប្រធានមន្ទីររៀបចំដែនដីរាជធានីភ្នំពេញ បានបង្ហាញទស្សនៈផ្ទាល់ខ្លួនសំខាន់ៗចំនួន ៦ចំណុច សំដៅឱ្យការកែទម្រង់សេវាសាធារណៈកាន់តែមានប្រសិទ្ធភាព។

តាមរយៈបណ្តាញសង្គមផ្លូវការរបស់ខ្លួន លោក សារិន វណ្ណា បានបញ្ជាក់ដូចនេះថា ការកែទម្រង់សេវាសាធារណៈ គឺជាគន្លឹះសម្រាប់ការអភិវឌ្ឍន៍ជាតិ ដូចនេះមុនធ្វើកំណែទម្រង់លើមុខសេវាដែលកន្លងមកពាក់ព័ន្ធ ការសម្រេចដោយអន្តរវិស័យគួរត្រូវបាន៖

១៖ រក្សាលិខិតបទដ្ឋានគតិយុត្តិចាស់ ដែលមានកន្លងមកទុកមួយឡែកសិន។
២៖ ខិតខំកសាងលិខិតបទដ្ឋានគតិយុត្តិថ្មី តាមតម្រូវការចាំបាច់សម្រាប់ប្រទេសកំពុងអភិវឌ្ឍន៍។
៣៖ សេវាណាមានភាពស្មុគស្មាញ ដែលត្រូវសម្រេចដោយអន្តរវិស័យ ត្រូវកាត់បន្ថយមកត្រឹមជំនាយទទួលខុសត្រូវចុងក្រោយ។
៤៖ កសាងទម្រង់បែបបទថ្មី បរិបឋថ្មី និង រយៈពេលផ្តល់សេវា ដោយកាត់បន្ថយយ៉ាងតិច ៥០%។
៥៖ សេវាសាធារណៈតាមប្រព័ន្ធ ឌីជីថល ត្រូវខិតខំធ្វើអោយបាន និងភ្ជាប់តំណរគ្រប់ស្ថាប័នរបស់រាជរដ្ឋាភិបាល។
៦៖ ត្រូវព្យាយាមបណ្តុះបណ្តាលមន្ត្រីបន្តវេណ អោយក្លាយជាធនធានមនុស្សពិតប្រាកដ។

លោក សារិន វណ្ណា បានបន្ថែមថា ប្រសិនបើយើងមិនកសាងលិខិតបទដ្ឋានគតិយុត្តិថ្មីឱ្យរួចរាល់ទេ នោះអ្នកមានសិទ្ឋិសម្រេចមិនហ៊ានធ្វើអ្វីខុសច្បាប់ ដែលនាំឱ្យការធ្វើកំណែទម្រង់ (ប្រើលិខិតបទដ្ឋានគតិយុត្តិចាស់) មិនអាចទៅរួច៕