(តាកែវ)៖ លោក អ៊ុំ ចំរើន អភិបាលស្រុកទ្រាំង នា​រសៀល​ថ្ងៃ​អង្គារ ទី​២៨ ខែកក្កដា ឆ្នាំ​២០២៦ នេះ បានដឹកនាំមន្ត្រីក្រោមឱវាទ ចុះសាកសួរសុខទុក្ខ និងនាំយកអំណោយជូនវីរកងទ័ពជួរមុខចំនួន ២រូប ដែលបានមកលេងស្រុកកំណើត ស្ថិតក្នុងភូមិសិរីដួច និងភូមិត្រពាំងស្នោ ឃុំអង្គកែវ ស្រុកទ្រាំង ខេត្តតាកែវ។

ក្នុងឱកាសដ៏មានអត្ថន័យនេះ លោក អ៊ុំ ចំរើន បានថ្លែងនូវការកោតសរសើរ និងដឹងគុណយ៉ាងជ្រាលជ្រៅចំពោះវីរភាពដ៏អង់អាចក្លាហាន និងការលះបង់ដ៏ធំធេងរបស់វីរកងទ័ពជាតិយើង ក្នុងការបំពេញភារកិច្ចបម្រើជាតិ មាតុភូមិ និងការពារបូរណភាពទឹកដីយ៉ាងរឹងមាំ។ ការលះបង់របស់ពួកគាត់បានធានានូវសុខសន្តិភាព និងសន្តិសុខជូនប្រជាពលរដ្ឋទូទាំងប្រទេស។

ជាមួយគ្នានេះដែរ លោកអភិបាលស្រុក ក៏បាននាំយកនូវសម្ភារប្រើប្រាស់ និងថវិកាឧបត្ថម្ភមួយចំនួន ដែលជាអំណោយរបស់ក្រុមការងាររដ្ឋបាលស្រុក ប្រគល់ជូនដល់វីរកងទ័ពទាំង ២រូប ដើម្បីជាការលើកទឹកចិត្ត និងជួយសម្រួលដល់ជីវភាពគ្រួសាររបស់ពួកគាត់។

លោកក៏បានជូនពរឱ្យវីរកងទ័ពទាំងអស់មានសុខភាពល្អបរិបូរណ៍ កម្លាំងពលំមាំមួន និងទទួលបានជោគជ័យគ្រប់ភារកិច្ចក្នុងកិច្ចការពារជាតិមាតុភូមិដ៏ឧត្តុង្គឧត្តម។ កាយវិការនេះបានឆ្លុះបញ្ចាំងពីការយកចិត្តទុកដាក់ខ្ពស់របស់អាជ្ញាធរមូលដ្ឋានចំពោះវីរបុរសជាតិ៕