(សៀមរាប)៖ កងរាជអាវុធហត្ថខេត្តសៀមរាប បានបន្តបេសកកម្មបម្រើ និងការពារប្រជាពលរដ្ឋយ៉ាងសកម្ម ដោយបានចុះជួយអន្តរាគមន៍ និងដោះស្រាយករណីបន្ទាន់ជូនប្រជាពលរដ្ឋសរុបចំនួន ៣៥៦ករណី ក្នុងរយៈពេល ៦ខែ ដើមឆ្នាំ២០២៦ នេះ។ ការដោះស្រាយបញ្ហាប្រឈមនានាទាំងនេះ ត្រូវបានធ្វើឡើងយ៉ាងឆាប់រហ័ស និងទាន់សភាពការណ៍ តាមរយៈលេខទូរស័ព្ទបន្ទាន់ ១២៩៦ ដែលជាមធ្យោបាយដ៏សំខាន់សម្រាប់ប្រជាពលរដ្ឋ ក្នុងការទំនាក់ទំនង។

លេខទូរស័ព្ទបន្ទាន់ ១២៩៦ ត្រូវបានបង្កើតឡើងក្នុងគោលបំណងផ្តល់ភាពងាយស្រួលដល់ប្រជាពលរដ្ឋក្នុងការរាយការណ៍អំពីហេតុការណ៍បន្ទាន់ ឬបទល្មើសគ្រប់ប្រភេទ ក៏ដូចជាប្តឹងបន្ទាន់ចំពោះបញ្ហាដែលពួកគាត់ ជួបប្រទះក្នុងជីវភាពប្រចាំថ្ងៃ។ រាល់សេចក្តីរាយការណ៍ និងបណ្តឹងដែលទទួលបាន ត្រូវបានកម្លាំងអាវុធហត្ថខេត្តសៀមរាប ចុះជួយដោះស្រាយជូនប្រជាពលរដ្ឋភ្លាមៗ ប្រកបដោយភាពកក់ក្តៅ និងប្រសិទ្ធភាពខ្ពស់។

ក្នុងចំណោម ៣៥៦ករណី ដែលបានដោះស្រាយនោះ រួមមានករណីជាច្រើនប្រភេទដូចជា៖ ករណីហិង្សា, ករណីបែកថ្នាំអុកឡុកគ្រួសារ, ករណីក្មេងទំនើង, ករណីគ្រោះថ្នាក់ចរាចរណ៍, ករណីអគ្គិភ័យ, ករណីចាក់ធុងបាសរំខានអ្នកជិតខាង, ករណីទំនាស់អ្នកជិតខាង, ករណីចែកចាយនិងប្រើប្រាស់គ្រឿងញៀន, ករណីលួច ឆក់ និងករណីផ្សេងៗទៀតជាច្រើន ដែលជាកង្វល់របស់ប្រជាពលរដ្ឋត្រូវការជំនួយជាចាំបាច់។

កងរាជអាវុធហត្ថខេត្តសៀមរាប សូមអំពាវនាវដល់បងប្អូនប្រជាពលរដ្ឋក្នុងខេត្តសៀមរាប បើសិនជាជួបហេតុការណ៍ត្រូវការអន្តរាគមន៍បន្ទាន់ សូមទំនាក់ទំនងមកកាន់លេខ ១២៩៦។ ក្រៅពីនេះ ប្រជាពលរដ្ឋក៏អាចទាក់ទងតាមបណ្តាញ Telegram, WhatsApp, CoolApp តាមរយៈលេខទូរស័ព្ទ ០៨៨ ៩៣ ៩៤ ៥៦៧ ឬឆាតទៅកាន់ផេកហ្វេសប៊ុករបស់កងរាជអាវុធហត្ថខេត្តសៀមរាប ដែលមានឈ្មោះថា Siem Reap Gendarmeries Royale Page ផងដែរ។

កងរាជអាវុធហត្ថខេត្តសៀមរាប ក៏សូមស្នើសុំកុំឱ្យមានការហៅទូរស័ព្ទរំខានក្រុមការងារ ប្រសិនបើពុំមានការចាំបាច់ជាក់ស្តែង ដើម្បីទុកពេលវេលាឱ្យក្រុមការងារបម្រើពលរដ្ឋផ្សេងទៀតដែលត្រូវការជំនួយបន្ទាន់ពិតប្រាកដ៕