(កំពង់ឆ្នាំង)៖ លោកបណ្ឌិត ហ៊ឺ វីរៈ តំណាងរាស្ត្រមណ្ឌលខេត្តកំពង់ឆ្នាំង និងលោកស្រី យី សុភា ទីប្រឹក្សាផ្ទាល់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា ព្រមទាំងក្រុមការងារ នៅថ្ងៃទី២៧ ខែកក្កដា ឆ្នាំ២០២៦ បានអញ្ជើញប្រគេនទៀនវស្សា និងគ្រឿងទេយ្យទាន ដល់ព្រះសង្ឃចំនួន ៧វត្ត មកពីឃុំចំនួន ៣ រួមមាន ឃុំច្រេស ឃុំពានី និងឃុំថ្មឥដ្ឋ។

ពិធីនេះបានប្រារព្ធធ្វើឡើងនៅវត្តសិរីគង្គា ស្ថិតនៅឃុំថ្មឥដ្ឋ ស្រុកកំពង់ត្រឡាច ខេត្តកំពង់ឆ្នាំង ដោយមានការអញ្ជើញចូលរួមពីលោក ប្រាក់ វ៉ុន ប្រធានក្រុមការងារចុះមូលដ្ឋានឃុំច្រេស លោក ម៉ៅ សំបុណ្យ ប្រធានក្រុមការងារគណបក្សចុះមូលដ្ឋានឃុំថ្មឥដ្ឋ រដ្ឋបាលស្រុកកំពង់ត្រឡាច រដ្ឋបាលឃុំច្រេស ឃុំពានី ឃុំថ្មឥដ្ឋ និងយុវជន ស.ស.យ.ក.។

ក្នុងឱកាសនោះលោកបណ្ឌិត ក៏មានមតិសំណេះសំណាល និងនាំនូវប្រសាសន៍ផ្ដាំផ្ញើការសួរសុខទុក្ខរបស់សម្ដេចតេជោ ហ៊ុន សែន ប្រធានព្រឹទ្ធសភា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង ប្រគេនដល់ព្រះតេជគុណដែលនិមន្តមកទាំង ៧វត្ត និងជូនដល់លោកយាយ លោកតា ដែលបានចូលរួមក្នុងកម្មវិធីនេះផងដែរ។

ចំពោះគ្រឿងទេយ្យទាន និងបច្ច័យដែលបានប្រគេនដល់ព្រះសង្ឃ ក្នុងវត្តៗទទួលបាន ទៀនវស្សា ១គូ អង្ករ ១០០ គីឡូក្រាម មីជាតិ ២កេស ត្រីខ ២យួរ ទឹកត្រី ២យួរ ទឹកស៊ីអ៊ីវ ២យួរ ប្រេងឆា ១ដប ស្ករស ១គីឡូក្រាម ទឹកសុទ្ធ ២កេស ទឹកក្រូច ២កេស តែ ១កញ្ចប់ កាហ្វេ ១កញ្ចប់ ធូប ១ដុំ ទៀនតូច ១ដុំ សាដក ១ ព្រមទាំងបច្ច័យចំនួន ៤៥០,០០០រៀល។

នៅថ្ងៃនោះដែរលោកបណ្ឌិត និងក្រុមការងារ បានចុះពិនិត្យ និងប្រគល់ថវិកា ៥០០ដុល្លារអាម៉េរិក តាមការសន្យាក្នុងការជួយជួសជុលពិតាន សាលាពុទ្ធិកបឋមសិក្សាវត្តពានី ស្ថិតនៅភូមិពានី ឃុំពានី ស្រុកកំពង់ត្រឡាច ដែលចាស់ទ្រុឌទ្រោម មានសត្វប្រចៀវរស់នៅបង្កក្លិនមិនល្អប៉ះពាល់ដល់សុខភាពសមណសិស្សកាលពីខែមុន៕