(បាងកក)៖ ស្ថានទូតចិនប្រចាំប្រទេសថៃបានអំពាវនាវដល់អាជ្ញាធរថៃបើកការស៊ើបអង្កេតលើករណីដែលពលរដ្ឋចិនម្នាក់រងការប្រើប្រាស់ហិង្សាជ្រុលហួសហេតុពីសំណាក់បុគ្គលិកសន្តិសុខ ខណៈចូលរួម ពិព័រណ៌សៀវភៅមួយនៅទីក្រុងបាងកក។ នេះបើតាមការចេញផ្សាយដោយសារព័ត៌មានថៃ Khaosod។

នៅក្នុងសេចក្តីថ្លែងការណ៍មួយត្រូវបានបង្ហោះនៅថ្ងៃទី២៧ ខែកក្កដា ឆ្នាំ២០២៦ ស្ថានទូតចិនបានគូសបញ្ជាក់ថាពលរដ្ឋចិនដែលរងហិង្សាក្នុងឧប្បត្តិហេតុខាងលើដែលបានកើតឡើងកាលពីថ្ងៃទី២៥ ខែកក្កដា បានទំនាក់ទំនងមកខាងស្ថានទូតថារូបគេត្រូវបានបណ្ដេញទាំងបង្ខំឱ្យចេញពីពិព័រណ៌សៀវភៅ។ ស្ថានទូតចិនបន្ថែមថាខ្លួនបានអានសេចក្ដីថ្លែងការណ៍របស់ក្រុមអ្នករៀបចំពិព័រណ៌សៀវភៅ ដែលបានទទួលស្គាល់ពិតជាមានការប្រើប្រាស់កម្លាំងជ្រុលហួសហេតុពិតមែន។

ហេតុការណ៍ខាងលើត្រូវបានគេជឿថាចង់សំដៅលើជម្លោះមួយនៅព្រឹត្តិការណ៍ប្រលោមលោកអន្តរជាតិ២០២៦ (International Novel Festival 2026) ជាទីដែលមានការប្រឈមមុខគ្នារវាង អ្នកចូលរួមជនជាតិចិនម្នាក់ និងបុគ្គលិកសន្តិសុខប្រចាំព្រឹត្តិការណ៍នោះ ដោយបានបង្កឱ្យមានការជជែកដេញដោលយ៉ាងផុលផុសតាមអនឡាញ និងជំរុញឱ្យអ្នករៀបចំព្រឹត្តិការណ៍ចេញមុខសុំទោស។ ស្ថានទូតចិន បានជំរុញឱ្យអាជ្ញាធរថៃពាក់ព័ន្ធបើកការស៊ើបអង្កេតមួយដើម្បីស្វែងរកការពិត និងដោះស្រាយករណីនេះឱ្យបានត្រឹមត្រូវ។

ស្ថានទូតចិនក៏បានបញ្ជាក់ផងដែរថា ខ្លួននឹងផ្តល់ជំនួយកុងស៊ុលចាំបាច់នានាដល់ពលរដ្ឋចិន ក្នុងដែនសមត្ថកិច្ចរបស់ខ្លួន និងការពារសិទ្ធិ ក៏ដូចជាផលប្រយោជន៍ស្របច្បាប់របស់ពលរដ្ឋចិន នៅក្នុងប្រទេសថៃ៕