(កំពង់ឆ្នាំង)៖ នៅព្រឹកថ្ងៃទី២៨ ខែកក្កដា ឆ្នាំ២០២៦នេះ លោកឧត្តមសេនីយ៍ទោ ជិន វណ្ណៈ អនុប្រធាននាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ រួមជាមួយលោក ជិន សុផាត អតីតនាយការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកំពង់ឆ្នាំង និងក្រុមគ្រួសារ បាននាំយកអំពូលភ្លើងផ្ទាំងសូឡាចំនួន៣៨ដើម ទៅប្រគេនព្រះសង្ឃគង់នៅវត្តតុណ្ឌបព្វតារាម (ហៅវត្តភ្នំចំពុះ) ស្ថិតក្នុងភូមិគោកបន្ទាយ ឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង។

ការបរិច្ចាគនេះ ធ្វើឡើងក្នុងគោលបំណងបំភ្លឺផ្លូវចូលវត្តដែលមានចម្ងាយជាង១គីឡូម៉ែត្រ ចេញពីផ្លូវជាតិលេខ៥ ក៏ដូចជាបំភ្លឺជុំវិញបរិវេណវត្ត ដើម្បីសម្រួលដល់ការធ្វើដំណើររបស់ព្រះសង្ឃ ពុទ្ធបរិស័ទ និងប្រជាពលរដ្ឋក្នុងមូលដ្ឋាននាពេលរាត្រី ព្រមទាំងបង្កើនសោភ័ណភាពទីអារាមផងដែរ។ លោកឧត្តមសេនីយ៍ទោ ជិន វណ្ណៈ បានបញ្ជាក់ថា ថវិកាសម្រាប់ជាវអំពូលសូឡាទាំងអស់នេះ គឺបានមកពីការចូលរួមរបស់ក្រុមគ្រួសារលោកទាំងក្នុង និងក្រៅប្រទេស។

ព្រះចៅអធិការវត្តតុណ្ឌបព្វតារាម បានថ្លែងអំណរគុណយ៉ាងជ្រាលជ្រៅចំពោះសទ្ធាជ្រះថ្លារបស់លោកឧត្តមសេនីយ៍ទោ ជិន វណ្ណៈ និងក្រុមគ្រួសារ ដែលតែងតែបានចូលរួមចំណែកក្នុងការទ្រទ្រង់ និងលើកស្ទួយវិស័យព្រះពុទ្ធសាសនា។ ទង្វើដ៏ប្រពៃនេះ ត្រូវបានចាត់ទុកថាជាកុសលផលបុណ្យដ៏ធំធេង ដែលនាំមកនូវសេចក្តីសុខចម្រើនដល់ខ្លួនឯង គ្រួសារ និងសង្គមជាតិទាំងមូល៕