(កំពង់ធំ)៖ លោក សាយ គឹមឡម ប្រធានគណៈបញ្ជាការឯកភាពរដ្ឋបាលស្រុកស្ទោង បានដាក់បទបញ្ជាយ៉ាងម៉ឺងម៉ាត់ដល់សមត្ថកិច្ចក្រោមឱវាទ ឲ្យបង្ក្រាបឲ្យខាងតែបាននូវក្រុម «ក្មេងទំនើង» ដែលបង្កការអសន្តិសុខក្នុងសង្គម បទល្មើសឆបោកតាមប្រព័ន្ធអ៊ិនធឺណិត (Online Scam) និងពង្រឹងការត្រួតពិនិត្យជនអន្តោប្រវេសន៍ខុសច្បាប់។

បទបញ្ជានេះត្រូវបានដាក់ចេញក្នុងកិច្ចប្រជុំប្រចាំខែកក្កដា កាលពីរសៀលថ្ងៃទី២៨ ខែកក្កដា ឆ្នាំ២០២៦ នៅអគាររដ្ឋបាលស្រុកស្ទោង។

លោក សាយ គឹមឡម បានសង្កត់ធ្ងន់ថា ដើម្បីធានាសុខសុវត្ថិភាព ស្ថិរភាពសង្គម និងការអភិវឌ្ឍប្រកបដោយចីរភាព អាជ្ញាធរត្រូវធ្វើសកម្មភាពយ៉ាងសកម្ម ក្នុងការបម្រើផលប្រយោជន៍ជូនប្រជាពលរដ្ឋដោយផ្ទាល់។ ក្រៅពីការបង្ក្រាបបទល្មើសខាងលើ អាជ្ញាធរក៏ត្រូវយកចិត្តទុកដាក់ខ្ពស់លើការកសាង និងស្តារប្រព័ន្ធធារាសាស្ត្រ ដើម្បីធានាទឹកគ្រប់គ្រាន់សម្រាប់បង្កបង្កើនផលគ្រប់រដូវកាល ដែលនឹងលើកកម្ពស់ជីវភាពប្រជាពលរដ្ឋក្នុងមូលដ្ឋាន។

ជាមួយគ្នានេះ លោកបានជំរុញឲ្យសហការីចូលរួមការពារធនធានធម្មជាតិ ទប់ស្កាត់ការរុករានទន្ទ្រានដីព្រៃឈើ និងបទល្មើសធនធានធម្មជាតិគ្រប់រូបភាព។ លើសពីនេះ អាជ្ញាធរភូមិឃុំ និងអង្គភាពជំនាញពាក់ព័ន្ធ ត្រូវផ្តល់សេវាសាធារណៈ និងកិច្ចការមនុស្សធម៌ឲ្យបានឆាប់រហ័ស តម្លាភាព និងគ្មានការរើសអើង ពិសេសដល់គ្រួសារងាយរងគ្រោះ។

លោកក៏បានជំរុញយុទ្ធនាការទប់ស្កាត់ជំងឺគ្រុនឈាម និងយកចិត្តទុកដាក់លើអតីតយុទ្ធជន និងនិវត្តន៍ជនផងដែរ។ រាល់សកម្មភាពទាំងអស់នេះ គឺក្នុងគោលបំណងតែមួយគត់ គឺ «បម្រើរាស្ត្រដោយស្មោះត្រង់» ដើម្បីសន្តិភាព ស្ថិរភាព និងការអភិវឌ្ឍសម្រាប់ប្រជាពលរដ្ឋគ្រប់រូប៕