(ភ្នំពេញ)៖ កម្លាំងកងរាជអាវុធហត្ថរាជធានីភ្នំពេញ នៅល្ងាចថ្ងៃទី២៨ ខែកក្កដា ឆ្នាំ២០២៦នេះ បានឃាត់ខ្លួនបុគ្គលម្នាក់ឈ្មោះ រតនៈ ពិសាល អាយុ១៧ឆ្នាំ ដែលបានអះអាងថាខ្លួនជា «កូនខ្លារបស់សមត្ថកិច្ច»។ ការឃាត់ខ្លួននេះធ្វើឡើងបន្ទាប់ពីបុគ្គលរូបនេះបានប្រព្រឹត្តអំពើហិង្សាទៅលើយុវជនពីរនាក់បណ្ដាលឱ្យរងរបួសធ្ងន់ ដោយម្នាក់ប្រកាច់។

យោងតាមប្រភពព័ត៌មាន បុគ្គល រតនៈ ពិសាល រួមជាមួយបក្ខពួក បានជិះម៉ូតូប្រដេញតាមយុវជនរងគ្រោះពីរនាក់ ហើយបានធាក់ផ្ដួលម៉ូតូ និងប្រើហិង្សាវាយដំរហូតបណ្ដាលឱ្យរងរបួសប្រកាច់។

ហេតុការណ៍ហិង្សានេះបានកើតឡើងកាលពីយប់រំលងអាធ្រាត្រឈានចូលថ្ងៃទី២៦ ខែកក្កដា ឆ្នាំ២០២៦ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

ក្រោយពីមានការស៊ើបអង្កេត និងស្រាវជ្រាវយ៉ាងយកចិត្តទុកដាក់ កម្លាំងអាវុធហត្ថរាជធានីភ្នំពេញ បានកំណត់អត្តសញ្ញាណ និងឈានដល់ការឃាត់ខ្លួនបុគ្គល រតនៈ ពិសាល ដើម្បីនាំយកមកសាកសួរ និងចាត់ការតាមនីតិវិធីច្បាប់។

សូមបញ្ជាក់ថា កូនខ្លាមេ០៧ មិនមែនពាក់ព័ន្ធជាមួយនាយឧត្តមសេនីយ៍ សៅ សុខា មេបញ្ជាការអាវុធហត្ថលើផ្ទៃប្រទេសនោះទេ។

គួររម្លឹកថា បុគ្គលឈ្មោះ រតនៈ ពិសាល រួមជាមួយបក្ខពួកបានអះអាងថាខ្លួនជាកូនខ្លារបស់សមត្ថកិច្ច ហើយបាន​ជិះ​ម៉ូតូ​ប្រដេញ​យុវជន​ពីរនាក់​ជិះ​ម៉ូតូ​មួយ​គ្រឿង​ហើយ​ធាក់ផ្ដួល និង​ប្រើ​ហិង្សា​វាយ​បណ្ដាលឱ្យរងរបួស​រហូតប្រកាច់ កាល​ពី​យប់​រំលង​អាធ្រាត្រ​ឈាន​ចូល​ ថ្ងៃ​ទី​២៦​ ខែកក្កដា​ ឆ្នាំ​២០២៦​ ស្ថិត​ក្នុង​សង្កាត់​ទន្លេ​បាសាក់​ ខណ្ឌ​ចំការមន​ រាជធានី​ភ្នំពេញ​៕