រដ្ឋមន្រ្តីសុខាភិបាល បន្តលើកទឹកចិត្តដល់មន្ត្រីរបស់ខ្លួន បង្កើតទម្លាប់ល្អក្នុងការងារ ជាគន្លឹះសម្រាប់ការបង្កើនគុណភាព ប្រសិទ្ធភាព និងសក្ដិ សិទ្ធិ ភាពនៃសមិទ្ធផល
28-07-2026 21:36
(ភ្នំពេញ)៖ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានគូសបញ្ជាក់ទៅកាន់ មន្ត្រី បុគ្គលិក ក្រុមគ្រូពេទ្យថា ការបង្កើតទម្លាប់ល្អក្នុងការងារ ជាគន្លឹះសម្រាប់ការបង្កើនគុណភាព ប្រសិទ្ធភាព និងសក្ដិ សិទ្ធិ ភាពនៃសមិទ្ធផល។
ការលើកឡើងយ៉ាងដូច្នេះរបស់លោកសាស្ត្រាចារ្យរដ្ឋមន្ត្រី ក្នុងឳកាសដឹកនាំវគ្គភាពអ្នកដឹកនាំ និងនវានុវត្តន៍លើកទី១២៥ ដែលមានមន្រ្តីសុខាភិបាលគ្រប់ឋានានុក្រម ក្រោមឱវាទក្រសួងសុខាភិបាលចូលរួមតាមប្រព័ន្ធវីដេអូ សន្និសីទ(Zoom) សរុបចំនួន ២៩៦៧ នាក់ នាថ្ងៃអង្គារ១៤ កើត ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៨ ខែកក្កដា ឆ្នាំ២០២៦ ចាប់ពីម៉ោង ២៖០០នាទីរសៀល។
លើសពីនេះលោកសាស្រ្តាចារ្យ ក៏បានរំលឹក អង្គភាពបម្រើសេវាសុខាភិបាលទាំងសេវាសាធារណៈ និងឯកជនទាំងអស់ ឲ្យយកចិត្តទុកដាក់ខ្ពស់លើភាពត្រឹមត្រូវ នៃការថែទាំ និងព្យាបាលឲ្យស្របទៅនឹងនិយាមស្តង់ដារជាតិ និងប្រើប្រាស់ភាពបុរេសកម្មក្នុងការត្រៀមលក្ខណឆ្លើយតបទៅនឹងស្ថានភាពរាតត្បាតនៃជំងឺគ្រុនឈាម ដែលអាចប្រែប្រួលនាពេលខាងមុខ។
ជុំវិញនឹងបញ្ហានេះលោកស្រីសាស្រ្តាចារ្យ អុឹម សិទ្ធិការ្យ ក៏បានបង្ហាញជូននូវវឌ្ឍនភាព នៃស្ថានភាពការរាតត្បាតជំងឺគ្រុនឈាម និងផែនការបន្តសម្រាប់អនុវត្ត។
នាឳកាសនោះលោកសាស្រ្តាចារ្យរដ្ឋមន្រ្តី ក៏បានលើកយកប្រធានបទទាក់ទងនឹងជំហ៊ាននៃការធ្វើផែនការ ដោយបកស្រាយលម្អិតពីគន្លឹះក្នុងការបង្កើតទម្លាប់ល្អ និងការរៀបចំកិច្ចសហប្រតិបត្តិការ ក្នុងក្រុមការងារ។
ក្នុងនោះមណ្ឌលសុខភាពសំរោង ក៏បានចែករំលែកនូវបទពិសោធន៍នៃការផ្តល់សេវាសុខាភិបាលដើម្បីក្លាយជាមណ្ឌលសុខភាពជ័យលាភី អង្គភាពផ្តល់សេវាសាធារណៈគំរូ ក្នុងវិស័យសុខាភិបាលឆ្នាំ២០២៥ ដោយបង្ហាញនូវកិច្ចខិតខំកែលម្អសេវាជាជំហ៊ានៗ មិនឈប់ឈរ ប្រើប្រាស់នវានុវត្តន៍ និងបង្កើនសាមគ្គីភាពរវាងបុគ្គលិក និងសហគមន៍។
សូមជម្រាបថាមុននឹងបញ្ចប់នូវវគ្គបណ្តុះបណ្តាលនេះ លោកសាស្រ្តាចារ្យរដ្ឋមន្រ្តី ក៏បានថ្លែងនូវការកោតសរសើរ និងអរគុណដល់ថ្នាក់ដឹកនាំសុខាភិបាលគ្រប់កម្រិត ប្រធានមន្ទីរពេទ្យ មន្ត្រីសុខាភិបាល អាជ្ញាធរមូលដ្ឋាន ព្រមភាគីពាក់ព័ន្ធទាំងអស់ ដែលបានចូលរួមក្នុងការឆ្លើយតបទៅនឹងយុទ្ធនាការទប់ស្កាត់ការរាតត្បាតជំងឺគ្រុនឈាមយ៉ាងសកម្ម និងការសហការរួមគ្នា៕
