(បរទេស)៖ ម្ចាស់ការពារតំណែងជើងឯក អាហ្សង់ទីន បានរងបរាជ័យ ០-១ ក្នុងម៉ោងថែម ក្រោមស្នាដៃរបស់អេស្ប៉ាញ របូតពាន World Cup 2026 កាលពីថ្ងៃទី២០ ខែកក្កដាកន្លងទៅថ្មីៗនេះ ស្របពេលអ្នកខ្លះបានមើលឃើញថា ក្រុមមកពីតំបន់អាមេរិកឡាទីន ពពកសមួយនេះ លេងទល់នឹងក្លិប FC Barcelona ទៅវិញ។

ទោះជាយ៉ាងណា ការប្រៀបធៀបនេះក៏មិនជាខុសទាស់អ្វីដែរ ព្រោះថា ១១នាក់លើទីលាន មានកីឡាករមកពីក្លិបអ្នកមានបុណ្យដល់ទៅ ៦នាក់ទៅហើយនោះ ហើយ Ferran Torres ដែលរកបានគ្រាប់ជ័យជម្នះក្នុងម៉ោងថែម ១៥នាទី ២ដងនោះ ក៏ត្រូវបានគ្រូបង្វឹក លោក Luis da la Fuente ជ្រើសរើសចេញពីក្រុមជើងឯកលីគ La Liga 2025-26 ដែរ។

យ៉ាងណាក៏ដោយ វាគ្រាន់តែជាការប្រៀបធៀបបែបលេងសើចនោះទេ ស្របពេលក្របខណ្ឌជម្រើសជាតិ និងក្លិប មិនអាចប្រឈមមុខដាក់គ្នាបានឡើយ។

Yamal, Curbasi, Olmo និងសមាជិកប្តូរចូលរួមមាន Pedri, Garcia និង Torres សុទ្ធសឹងកីឡាករចេញពីក្លិប Barcelona។ វាហាក់ដូចជាគាប់ជួនខ្លាំងពេក នៅពេល Iniesta ដែលរកបានគ្រាប់ជ័យជម្នះ ១-០ ទៅលើហូឡង់កាលអេស្ប៉ាញឈ្នះ World Cup លើកដំបូងក្នុងឆ្នាំ២០១០ ក៏ជ្រើសរើសចេញពីក្លិបក្នុងស្រុកនេះដែរ និងស្ថិតក្នុងម៉ោងថែម ១៥នាទី ២ដងថែមទៀត។

ចំណែកឯពពកសអាហ្សង់ទីនវិញ បានចាញ់ផ្តាច់ព្រ័ត្រដល់ទៅ ២លើក ក្នុងចំណោម World Cup ៤សម័យកាលចុង ក្រោយ ពោលគឺចាញ់អាល្លឺម៉ង់ ១-០ ក្នុងម៉ោងថែមនេះដែរកាលផ្តាច់ព្រ័ត្រឆ្នាំ២០១៤ នៅប្រទេសប្រេស៊ីល ហើយក៏ត្រូវបានគេប្រដូចថា លេងទល់នឹងក្លិប Bayern Munich ដែរ ព្រោះ ១១នាក់ក្នុងទីលាននៃក្រុមឥន្រ្ទីដែក មានកីឡាករ ៨នាក់ទៅហើយមកពីក្លិប Bayern។

ទស្សនៈយល់ឃើញ៖ ការជ្រើសរើសកីឡាករចេញពីក្លិបតែមួយ អាចជាយុទ្ធសាស្រ្តគ្រូបង្វឹក ព្រោះពួកគេមានភាពងាយស្រួល និងបត់បែនលើទីលាន ក៏ព្រោះតែយល់ចិត្តគ្នាស្រាប់មកពីក្នុងក្លិប៕