(កូរ៉េខាងត្បូង)៖ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ នៅថ្ងៃទី ២៧ ខែកក្កដា ឆ្នាំ២០២៦ បានទទួលជួបសម្តែងការគួរសម និងពិភាក្សាការងារជាមួយលោក Kim Dohyung ប្រធានក្រុមប្រឹក្សាសេដ្ឋកិច្ចកម្ពុជា-កូរ៉េ នៅស្ថានទូតកម្ពុជា ក្នុងទីក្រុងសេអ៊ូល។

ក្នុងឱកាសនៃជំនួប លោក Kim បានជម្រាបជូនលោកឯកអគ្គរាជទូត អំពីគម្រោងដឹកនាំគណៈប្រតិភូក្រុងផ្យង់ថេក​ ទៅបំពេញទស្សនកិច្ចនៅទីក្រុងភ្នំពេញ ប្រទេសកម្ពុជា នៅខែសីហាខាងមុខនេះ ក្នុងគោលបំណងបង្កើតកិច្ចសហប្រតិបត្តិការជាមួយសាលារាជធានីភ្នំពេញ សាកលវិទ្យាល័យ អង្គការសង្គមស៊ីវិល និងស្ថាប័នពាក់ព័ន្ធដទៃទៀតក្នុងរាជធានីភ្នំពេញ។

លោកបានលើកឡើងអំពី កំណើននៃតម្រូវការពលករបរទេស E-9 សម្រាប់បំរើការងារក្នុងវិស័យឧស្សាហកម្មនៅតំបន់ផ្យង់ថេកផងដែរ ហើយលោកមានបំណងចង់ជំរុញឱ្យមានកូតាបន្ថែមចំនួនពលករកម្ពុជាក្នុងទីក្រុងផ្យង់ថេក ពីព្រោះលោកទទួលបានការកោតសសេីរពីសំណាក់ថៅកែជាច្រើន​ ចំពោះពលករកម្ពុជា​ ដែលឧស្សាហ៍ព្យាយាម និងស្មោះត្រង់ចំពោះការងារ៕