(កណ្តាល)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងបញ្ជាក់ថា សម្តេចបាន​ប្រគល់ភារកិច្ចជូនក្រសួងរៀបចំដែនដី នគរូបនីយកម្ម និងសំណង់ ដើម្បីបញ្ចប់ការងារវាស់វែង និងចុះបញ្ជីដីធ្លីជូនប្រជាពលរដ្ឋ ដែលគិតមកដល់បច្ចុប្បន្ននេះការវាស់វែងដីសរុបបាន​ចំនួន ១៣ ៩៥៦ ៤៧៩ ក្បាល​ដី ស្មើនឹង ១០៣ភាគរយនៃក្បាលដីប៉ាន់ស្មាន, ​ចេញបណ្ណបន្ថែម ២លាន ៦សែនបណ្ណ សរុប​ចំនួន ៩ ៦៤១ ៨៥៧បណ្ណ និងចែកវិញ្ញាបនបត្រសម្គាល់ម្ចាស់អចលនវត្ថុ សរុបចំនួន ៨ ៧៦៥ ៤១៩បណ្ណ។

សម្តេចមហាបវរធិបតី ហ៊ុន ម៉ាណែត បានថ្លែងដូចនេះនៅព្រឹកថ្ងៃទី២៩ ខែកក្កដា ឆ្នាំ២០២៦នេះ នាឱកាសអញ្ជើញប្រគល់វិញ្ញាបនបត្រសម្គាល់​ម្ចាស់​​​អចល​នវត្ថុចំនួន ២៣ ០៧៦បណ្ណជូនប្រជាពលរដ្ឋក្នុងឃុំជ័យធំ ឃុំរ​កា​ជន្លឹង និងឃុំពុកឫស្សី ស្រុកខ្សាច់កណ្តាល ខេត្តកណ្តាល។

សម្តេចមហាបវរធិបតី ហ៊ុន ម៉ាណែត បានថ្លែងដូចនេះថា «ជាលទ្ធផលក្នុងរយៈពេលជិត ៣ឆ្នាំមកនេះ យើងបានវាស់វែងបន្ថែមចំនួន ៦.៣លានក្បាលដី ចឹងសរុបតាំងពីអាណត្តិមុនមកដល់ពេលនេះបាន ១៤លានក្បាលដី, យើងបានចេញបណ្ណបន្ថែម ២.៦លានបណ្ណ សរុបទាំងអស់ជិត ១០លានបណ្ណ ដែលយើងបានចេញ ហើយបានចែកវិញ្ញាបនបត្រសម្គាល់ម្ចាស់អចលនវត្ថុជិត ៩លានបណ្ណ ស្មើនឹង ៨៦%នៃក្បាលដី»។

សម្តេចមហាបវរធិបតី ហ៊ុន ម៉ាណែត បានបន្ថែមទៀតថា យើងនូវតែបន្តធ្វើតទៅទៀតដើម្បីធ្វើយ៉ាងណាឱ្យការវាស់វែង ការកំណត់ព្រំដី ការចុះបញ្ជី និងការចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋឱ្យបានចប់តាមទិសដៅដែលបានកំណត់ ដែលគ្រោងបញ្ចប់នៅឆ្នាំ២០២៧ខាងមុខនេះ ដើម្បីផ្តល់ភាពងាយស្រួលជូនពលរដ្ឋ និងឱ្យប្រជាពលរដ្ឋមានបណ្ណកម្មសិទ្ធក្នុងដៃតែម្តង ដែលនេះជាការប្តេជ្ញាចិត្តរបស់រាជរដ្ឋាភិបាល។

សម្តេចមហាបវរធិបតី ហ៊ុន ម៉ាណែត បានបញ្ជាក់ដែរថា អ្វីដែលយើងខិតខំប្រឹងប្រែងបានដូចនេះ ទោះបីជាការវាស់វែងបានច្រើនដូចនេះ ក៏យើងទទួលស្គាល់ថា យើងនៅមានបញ្ហាត្រូវដោះស្រាយបន្ថែម និងកែរសម្រួល សំដៅធ្វើយ៉ាងណាឱ្យប្រជាជន មានបណ្ណកម្មសិទ្ធគ្រប់គ្រាន់ ជាពិសេសការបញ្ជាក់នូវព្រំដីកុំឱ្យមានបញ្ហាតទៅទៀត៕