(តាកែវ)៖ ខណៈពេលដែលជំងឺគ្រុនឈាម កំពុងតែមានការឆ្លងរីករាលដាលយ៉ាងខ្លាំងក្លា នៅតាមបណ្ដាលខេត្តមួយចំនួនក្នុងប្រទេសកម្ពុជា ជាពិសេសបានផ្ទុះកើតមានឡើងខ្លាំងនៅក្នុងខេត្តកណ្ដាល ជាប់ខេត្តតាកែវ លោកឱសថការី ផាន់ វ៉ាន់ ប្រធានមន្ទីរសុខាភិបាលតាកែវ នៅថ្ងៃទី២៩ ខែកក្កដា ឆ្នាំ២០២៦នេះ បានបើកកិច្ចប្រជុំត្រួតពិនិត្យផែនការយុទ្ធនាការលុបបំបាត់ជំងឺគ្រុនឈាម រយៈពេល៣០ថ្ងៃ របស់មន្ទីរសុខាភិបាល ជាមួយមន្ដ្រីសុខាភិបាល ប្រធានមន្ទីរពេទ្យ ប្រធានការិយាល័យស្រុកប្រតិបត្តិទាំង៦ និងប្រធានកម្មវិធីគ្រុនឈាម ដោយបានដាក់ចេញនូវវិធានការមួយចំនួន ដើម្បីបង្ការការពារ និងទប់ស្កាត់ជំងឺគ្រុនឈាមនេះ កុំឲ្យឆ្លងរីករាលដាលទៅលើប្រជាពលរដ្ឋនៅក្នុងខេត្តតាកែវ។

ដើម្បីឆ្លើយតបនឹងការឆ្លងរីករាលដាលជំងឺគ្រុនឈាមទៅលើប្រជាពលរដ្ឋ​​ លោកឱសថការី ផាន់ វ៉ាន់ បានណែនាំឲ្យមណ្ឌលសុខភាព និងមន្ទីរ​ពេទ្យបង្អែកនៅក្នុងខេត្តទាំងអស់ ត្រូវធ្វើសកម្មភាពសម្អាត បរិស្ថាន បំបាត់ជំរកមូស បំបាត់វត្ថុដក់ទឹក ដូចសំបកកង់ឡានចាស់ ត្រឡោង ថង់ ដើរដាក់ថ្នាំអាប៊ែតក្នុងពាង ឬអាងទឹក តាមខ្នងផ្ទះរបស់ប្រជាពលរដ្ឋ។

លោកប្រធានមន្ទីរសុខាភិបាលខេត្តតាកែវ បានណែនាំដល់គ្រប់មណ្ឌលសុខភាព និងមន្ទីរពេទ្យបង្អែកក្នុងខេត្តតាកែវ ត្រូវ​ត្រៀម​សម្ភារៈឱសថ​ និង​ក្រុម​គ្រូពេទ្យឲ្យបាន​គ្រប់គ្រាន់​ ដើម្បីធ្វើការ​សង្រ្គោះ​ និងព្យាបាលជូន​ប្រជាពលរដ្ឋឲ្យបានទាន់ពេល​វេលា​ ហើយមន្រ្តីសុខាភិបាលនៅមូលដ្ឋាន ត្រូវរួមសហការ​ជាមួយ​អាជ្ញាធរ​ដែនដី ​បន្តចូលរួមក្នុងការអប់រំផ្សព្វផ្សាយដល់ប្រជាពលរដ្ឋ និងកូនសិស្សតូចៗ នៅតាមសាលាបឋមសិក្សាអំពីការបង្កា និងទប់ស្កាត់ នៃជំងឺគ្រុនឈាម ដែលបណ្តាលមកពីមូសខ្លា​ ហើយត្រូវបន្តសកម្មភាពចុះអនុវត្តយុទ្ធនាការដាក់​ថ្នាំ​អាបែត​តាម​ផ្ទះ បាញ់ថ្នាំកំចាត់មូសតាមភូមិ ឃុំ សាលារៀន និងផ្ទះរបស់ប្រជាពលរដ្ឋ ដើម្បីកំចាត់ជំរកមូសខ្លាឲ្យអស់ផងដែរ។

បើតាមលោកឱសថការី ផាន់ វ៉ាន់, សម្រាប់ខេត្តតាកែវ មានករណីសង្ស័យជំងឺគ្រុនឈាម ចំនួន៥៦២ករណី ហើយរហូតមកដល់ពេលនេះមិនមានអ្នកជំងឺគ្រុនឈាមរងគ្រោះដល់អាយុជីវិតនោះទេ៕