(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានដាក់ចេញនូវវិធានការត្រៀមឆ្លើយតបជំងឺគ្រុនឈាម និងអំពាវនាវឱ្យមន្ត្រីសុខាភិបាលគ្រប់លំដាប់ថ្នាក់ រួមសាមគ្គីគ្នា និងបំពេញភារកិច្ចឱ្យអស់ពីសមត្ថភាព ដើម្បីប្រយុទ្ធនឹងជំងឺគ្រុនឈាម និងទប់ស្កាត់ការរីករាលដាលនៅក្នុងសហគមន៍ ខណៈជំងឺនេះកំពុងមានការកើនឡើងនៅក្នុងខេត្តព្រះវិហារ និងតាមបណ្តាខេត្តមួយចំនួនទូទាំងប្រទេស។

ការថ្លែងលើកឡើងនេះ ធ្វើឡើងក្នុងឱកាសដែលលោកដឹកនាំកិច្ចប្រជុំប្រកាសសមាសភាពក្រុមការងារប្រយុទ្ធនឹងជំងឺគ្រុនឈាម នារសៀលថ្ងៃទី២៩ ខែកក្កដា ឆ្នាំ២០២៦ ដោយមានការចូលរួមពីថ្នាក់ដឹកនាំ និងមន្ត្រីពាក់ព័ន្ធ។

លោកវេជ្ជបណ្ឌិត គួង ឡូ បានសង្កត់ធ្ងន់ថា ស្ថានភាពជំងឺគ្រុនឈាមនាពេលនេះ ទាមទារឱ្យគ្រប់អង្គភាពសុខាភិបាល ត្រូវមានការត្រៀមលក្ខណៈជាស្រេច ទាំងកម្លាំងមន្ត្រីសុខាភិបាល ឱសថ ស្តុកឈាមបម្រុង សម្ភារៈបរិក្ខារពេទ្យ និងទីកន្លែងសម្រាប់ទទួលអ្នកជំងឺ ដើម្បីធានាថា អាចឆ្លើយតបបានទាន់ពេលវេលា ប្រសិនបើការឆ្លងបន្តកើនឡើង។

លោកប្រធានមន្ទីរសុខាភិបាលខេត្ត ក៏បានណែនាំឱ្យថ្នាក់ដឹកនាំមន្ទីរពេទ្យបង្អែកទាំងពីរ ត្រៀមគ្រប់លក្ខខណ្ឌសម្រាប់ការព្យាបាលអ្នកជំងឺ ខណៈប្រធានការិយាល័យស្រុកប្រតិបត្តិ ត្រូវពិនិត្យលទ្ធភាពចាត់តាំងបុគ្គលិកពីមណ្ឌលសុខភាព ដែលមិនមានសម្ពាធការងារខ្លាំង មកជួយគាំទ្រមន្ទីរពេទ្យ ប្រសិនបើចំនួនអ្នកជំងឺកើនឡើងលើសសមត្ថភាព។

បច្ចុប្បន្ន មន្ទីរពេទ្យបង្អែក១៦ មករា កំពុងព្យាបាលអ្នកជំងឺគ្រុនឈាមប្រមាណ៨០នាក់ ដោយនៅអាចគ្រប់គ្រងបាន ប៉ុន្តែស្តុកឈាមបម្រុងនៅមានកម្រិត។

លោក គួង ឡូ បានថ្លែងគូសបញ្ជាក់ថា ការប្រយុទ្ធនឹងជំងឺគ្រុនឈាម មិនមែនជាភារកិច្ចរបស់អង្គភាពណាមួយតែមួយនោះទេ ប៉ុន្តែជាការទទួលខុសត្រូវរួមរបស់មន្ត្រីសុខាភិបាលគ្រប់រូប និងការចូលរួមពីប្រជាពលរដ្ឋ ដើម្បីកាត់ផ្តាច់សង្វាក់ចម្លង និងការពារសុខភាពសហគមន៍ឱ្យបានប្រសើរបំផុត៕