(បរទេស)៖ ក្រុមបាល់ទាត់ជម្រើសជាតិអង់គ្លេស បានចិញ្ចឹមចិត្តក្នុងការឈ្នះជើងឯកពានរង្វាន់ប្រចាំទ្វីបអឺរ៉ុប UEFA Euro 2028 ជាលើកដំបូងរបស់ពួកគេ ក្នុងនាមជាម្ចាស់ផ្ទះជាលើកទី២ ផងដែរនៅរយៈពេល ២ឆ្នាំខាងមុខ ក្រោយធ្វើ ម្ចាស់ផ្ទះលើកដំបូងក្នុងឆ្នាំ១៩៩៦។

ទោះជាយ៉ាងណា ក្រុមតោកំណាចដែលស្ថិតក្រោមការដឹកនាំដោយបុរសសញ្ជាតិអាល្លឺម៉ង់ Thomas Tuchel ត្រូវតែប្រឈមមុខនឹងគ្រូបង្វឹកធំៗដល់ទៅ ៤នាក់ឯណោះ និងជាពិសេសគ្រូបង្វឹកថ្មី ៣រូបដែលទើបប្រកាសតែងតាំង ក្រោយចប់ World Cup 2026 នៅមិចស៊ិក សហរដ្ឋអាមេរិក និងកាណាដា។

គ្រូបង្វឹក Jurgen Klopp ដែលធ្លាប់ជោគជ័យក្នុងក្លិប Borussia Dortmund និងជាពិសេស Liverpool ទើបតែត្រូវបាន តែងតាំងដឹកនាំក្រុមឥន្រ្ទីដែកអាល្លឺម៉ង់ ក្រោមកិច្ចសន្យាដល់ចប់ World Cup 2030 និងជាគូប្រជែងធំរបស់អង់គ្លេសផងដែរ ដែលមានគ្រូអាល្លឺម៉ង់ដឹកនាំដូចគ្នា។

លោក Zinedine Zidane ដែលជាអតីតខ្សែប្រយុទ្ធឆ្នើមបារាំង ក៏ត្រូវបានតែងតាំងដឹកនាំជម្រើសជាតិមាន់គកមួយនេះដែរ ដើម្បីជំនួសតំណែងលោក Didier Deschamps ដែលបានផុតកិច្ចសន្យា និងចាកចេញទៅ ក្រោយបានត្រឹមលេខ៤ នៅ World Cup 2026 ដែលទើបបញ្ចប់កាលពីថ្ងៃទី២០ ខែកក្កដា។

លោក Roberto Mancini ដែលអង់គ្លេសធ្លាប់ឈឺចាប់មិនអាចបំភ្លេចបាននោះកាលពីផ្តាច់ព្រ័ត្រ Euro 2020 ក៏បានវិលត្រឡប់មកដឹកនាំក្រុមជម្រើសជាតិអាសូរីអ៉ីតាលីឡើងវិញផងដែរ ក្រោយការចាកចេញពីឆ្នាំ២០២៣។

នេះមានន័យថា អង់គ្លេស សហម្ចាស់ផ្ទះ Euro 2028 លើកទី១៨ លេងចាប់ពីថ្ងៃទី០៩ ខែមិថុនា ដល់ថ្ងៃទី០៩ ខែកក្កដា ឆ្នាំ២០២៨ ជាមួយប្រទេសវ៉េល ស្កុតឡេន និងសាធារណរដ្ឋអៀរឡង់ ត្រូវឆ្លងកាត់ដំណាក់កាលគ្រូបង្វឹកធំៗដល់ទៅ ៤រូប ក្នុងនោះមានលោក Luis da la Fuente របស់អេស្ប៉ាញ ដែលពួកគេបានចាញ់វគ្គផ្តាច់ព្រ័ត្រ ២-១ កាលឆ្នាំ២០២៤ នៅអាល្លឺម៉ង់ទៀតផង។

បងប្អូនយល់យ៉ាងណាដែរលើកនេះ តើក្រុមបុរសអាចធ្វើបានទេ នៅពេលក្រុមជម្រើសជាតិនារី បានស្គាល់រសជាតិពានអឺរ៉ុប ២លើកជាប់គ្នារួចទៅហើយ?