(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក និងជាប្រធានគណៈបញ្ជាការឯកភាពរដ្ឋបាលស្រុក នាព្រឹកថ្ងៃទី៣០ ខែកក្កដា ឆ្នាំ២០២៦នេះ បានអញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលស្រុក ដោយមានការចូលរួមពីអាជ្ញាធរឃុំ កងកម្លាំងប្រដាប់អាវុធ និងមន្ត្រីពាក់ព័ន្ធជាច្រើនរូប។

​កិច្ចប្រជុំនេះបានផ្ដោតរបៀបវារៈសំខាន់ៗលើការងារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម រួមមាន៖ ការប្រយុទ្ធប្រឆាំងល្បែងស៊ីសងអនឡាញ, ពង្រឹងការស្រាវជ្រាវ ទប់ស្កាត់ និងបង្ក្រាបរាល់សកម្មភាពល្បែងស៊ីសងតាមប្រព័ន្ធអេឡិចត្រូនិកគ្រប់ប្រភេទនៅក្នុងមូលដ្ឋាន។ ការទប់ស្កាត់ក្មេងទំនើង៖ បង្កើនការល្បាត និងចាត់វិធានការឱ្យបានម៉ឺងម៉ាត់ចំពោះមុខសញ្ញាក្មេងទំនើងដែលបង្កការអសន្តិសុខដល់សង្គម។ ការបង្ក្រាបគ្រឿងញៀន៖ បន្តជំរុញការអប់រំ ផ្សព្វផ្សាយ និងបង្ក្រាបការជួញដូរ ព្រមទាំងប្រើប្រាស់សារធាតុញៀនឲ្យមានប្រសិទ្ធភាព។ ការអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាព៖ បង្កើនកិច្ចសហការជិតស្និទ្ធរវាងអាជ្ញាធរ និងប្រជាពលរដ្ឋ ដើម្បីធានាបាននូវភាពសុខសាន្តជូនប្រជាពលរដ្ឋក្នុងស្រុកទាំងមូល។

​ទន្ទឹមនឹងការងារសន្តិសុខ លោកអភិបាលស្រុក ហាក់ ម៉ុងហួត ក៏បានណែនាំយកចិត្តទុកដាក់ខ្ពស់លើជីវភាពរស់នៅរបស់កសិករ ដោយបានជំរុញឱ្យអាជ្ញាធរឃុំទាំងអស់ ត្រូវចុះតាមដាន និងពិនិត្យមើលស្ថានភាពស្រូវរបស់ប្រជាពលរដ្ឋជាប្រចាំ។ ការធ្វើបែបនេះគឺដើម្បីស្វែងយល់ពីបញ្ហាប្រឈមផ្សេងៗ ជាពិសេសបញ្ហាខ្វះខាតទឹក ឬការបំផ្លាញពីសមាសភាពសត្រូវរុក្ខជាតិ ដើម្បីអាចរកដំណោះស្រាយអន្តរាគមន៍បានទាន់ពេលវេលា និងប្រកបដោយប្រសិទ្ធភាព ជៀសវាងការបង្កផលប៉ះពាល់ដល់ទិន្នផលស្រូវរបស់ប្រជាកសិករ៕