(ភ្នំពេញ)៖ លោក អុឹម សុីថុល រដ្ឋលេខាធិការប្រចាំការ តំណាង លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី៣០ ខែកក្កដា ឆ្នាំ២០២៦ បានអញ្ជេីញជាអធិបតីភាពក្នុងការបើកកម្មវិធីបរិច្ចាគឈាម ដើម្បីសង្គ្រោះអាយុជីវិតមនុស្សជាតិ ក្រោមប្រធានបទ «ផ្តល់ឈាម សង្គ្រោះជីវិតខ្ញុំ» លើកទី៧ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ជាកិច្ចចាប់ផ្តើម លោក អុឹម សុីថុល បានសម្តែងការស្វាគមន៍ និងថ្លែងអំណរយ៉ាងកក់ក្តៅចំពោះវត្តមាននៃការអញ្ជើញបរិច្ចាគឈាមរបស់ថ្នាក់ដឹកនាំ មន្រ្តីរាជការ ក្រុមការងារស.ស.យ.ក និងសិស្សនិស្សិតទាំងអស់ និងបានលើកឡើងពីគុណសម្បត្តិនៃការបរិច្ចាគនេះ ជាពិសេសការរួមចំណែកជាមួយការងារសង្គមជាតិក្នុងសកម្មភាពមនុស្សធម៌ប្រកបដោយសុឆន្ទៈក្នុងការជួយសង្គ្រោះជីវិតមនុស្សជាតិ។

ជាមួយគ្នានេះ លោក មានទំនុកចិត្តជឿជាក់ទាំងស្រុងដល់ថ្នាក់ដឹកនាំ មន្ត្រីរាជការ និងយុវជនទាំងអស់បន្តសកម្មភាពចូលរួមបរិច្ចាគឈាមបន្ថែមទៀត បន្តឱ្យក្លាយជាទម្លាប់នៃការបរិច្ចាគឈាមដោយការស្ម័គ្រចិត្ត និងមិនគិតកម្រៃ ដែលជាវប្បធម៌មនុស្សជាតិ និងមនុស្សធម៌នៅក្នុងសង្គមជាតិ និងបានលើកទឹកចិត្តអ្នកចូលរួមទាំងអស់ បន្តអនុវត្តសកម្មភាពនេះ និងផ្សព្វផ្សាយដល់បងប្អូនសប្បុរសជន ដែលមានសុខភាពល្អ អញ្ជើញស័្មគ្រចិត្តបរិច្ចាគឈាម។

តាងនាមក្រសួងកសិកម្ម រុក្ខាប្រមាញ់ និងនេសាទ លោក អុឹម សុីថុល សូមជូនពរថ្នាក់ដឹកនាំ មន្រ្តីរាជការ និងសមាជិក សមាជិកា ស.ស.យ.ក ទាំងអស់ដែលបានចូលរួមបរិច្ចាគឈាម និងបានកោតសរសើរ និងវាយតម្លៃខ្ពស់នូវការចូលរួមសហការរបស់ថ្នាក់ដឹកនាំ និងក្រុមគ្រូពេទ្យនៃមជ្ឈមណ្ឌលជាតិផ្តល់ឈាម(NBTC) និងក្រុមការងារ ស.ស.យ.ក នៃវិស័យកសិកម្ម ដែលបានរៀបចំកម្មវិធីដ៏ល្អនេះឡើង សំដៅលើកកម្ពស់ការបរិច្ចាគឈាមដោយការស្ម័គ្រចិត្ត និងមិនគិតកម្រៃដល់ជនរងគ្រោះដោយក្តីសប្បុរស៕