(ព្រៃវែង)៖ ព្រះមេគណខេត្តព្រៃវែង បានដឹកនាំគណៈសង្ឃ នៅរសៀលថ្ងៃទី២៩ ខែកក្កដា ឆ្នាំ២០២៦ បាននិមន្តនាំយកសម្ភារៈប្រើប្រាស់ និងបច្ច័យមួយចំនួន ផ្តល់ជូនដល់រដ្ឋបាលខេត្តព្រៃវែង ដើម្បីចូលរួមចំណែក ឧបត្ថម្ភដល់វីរកងទ័ពដែលកំពុងបំពេញបេសកកម្មការពារបូរណភាពទឹកដីនៅសមរភូមិមុខ។ កាយវិការដ៏ថ្លៃថ្លានេះ ធ្វើឡើងក្នុងស្មារតីសាមគ្គីភាព និងការយកចិត្តទុកដាក់ខ្ពស់ចំពោះសុខទុក្ខរបស់កងកម្លាំងប្រដាប់អាវុធជាតិ។

ក្នុងឱកាសនោះលោក សួន សុម៉ាលីន អភិបាលខេត្តព្រៃវែង បានសម្ដែងនូវសេចក្តីអរគុណយ៉ាងជ្រាលជ្រៅចំពោះព្រះមេគណ និងព្រះមន្ត្រីសង្ឃទាំងអស់ ដែលបានចូលរួមចំណែកជាសម្ភារៈ និងថវិកាជាមួយរដ្ឋបាលខេត្ត។

លោកអភិបាលខេត្តបានគូសបញ្ជាក់ថា នេះគឺជាកាយវិការដ៏ល្អបំផុតមួយពីសមរភូមិក្រោយ ដែលជាអ្នកជួយទំនុកបម្រុង និងលើកទឹកចិត្តដល់វីរកងទ័ពរបស់យើង ដែលកំពុងលះបង់ជីវិត ការពារបូរណភាពទឹកដី និងអធិបតេយ្យភាពជាតិ។

មានសង្ឃដីកាក្នុងឱកាសនោះ ព្រះមេគណខេត្តព្រៃវែង បានសម្តែងនូវការកោតសរសើរ និងវាយតម្លៃខ្ពស់ចំពោះពលីកម្មដ៏ធំធេងរបស់វីរកងទ័ពទាំងអស់ ដែលបានលះបង់កម្លាំងកាយចិត្ត និងអាយុជីវិត ក្នុងការការពារបូរណ ភាពទឹកដី អធិបតេយ្យភាព និងសុខសន្តិភាពជូនជាតិមាតុភូមិ។ ការចូលរួមចំណែកនេះ គឺជាការបង្ហាញពីសាមគ្គីភាពរវាងប្រជាពលរដ្ឋ និងកងទ័ព ក្នុងបុព្វហេតុការពារជាតិមាតុភូមិដ៏ឧត្តុង្គឧត្តម៕