(កណ្ដាល)៖ លោកស្រី រិន ច័ន្ទម៉ារីណា នាយិកាសាខាកាកបាទក្រហមកម្ពុជាខេត្តកណ្ដាល នាថ្ងៃទី២៩ ខែកក្កដា ឆ្នាំ២០២៦ បានដឹកនាំក្រុមការងារចម្រុះ ចុះធ្វើយុទ្ធនាការផ្សព្វផ្សាយ សម្អាតបរិស្ថាន បាញ់ថ្នាំសម្លាប់មូស និងដាក់ថ្នាំអាបេតក្នុងពាងទឹក-អាង-ធុងស្តុកទឹក នៅភូមិចំនួន៤ នៃសង្កាត់សិត្បូ ក្រុងតាខ្មៅ។

យុទ្ធនាការនេះធ្វើឡើងក្នុងគោលបំណងចូលរួមវិធានការបង្ការ និងទប់ស្កាត់ការរីករាលដាលនៃជំងឺគ្រុនឈាមក្នុងសហគមន៍ តាមប្រសាសន៍ដឹកនាំដ៏ខ្ពង់ខ្ពស់របស់លោក គួច ចំរើន ប្រធានគណៈកម្មាធិការសាខាកាកបាទក្រហមកម្ពុជាខេត្តកណ្ដាល។

លោកស្រី រិន ច័ន្ទម៉ារីណា បានបញ្ជាក់ថា ក្រុមការងារដែលរួមមាន សាខា អនុសាខាក្រុងតាខ្មៅ មន្ត្រីជំនាញនៃការិយាល័យសុខាភិបាលក្រុង និងក្រុមពាក់ព័ន្ធក្នុងសង្កាត់សិត្បូទាំងមូលចំនួន ៤១នាក់ បានចុះអនុវត្តសកម្មភាពដោយផ្ទាល់តាមខ្នងផ្ទះប្រជាពលរដ្ឋ និងតាមគ្រឹះស្ថានសិក្សានានា។ ក្នុងនោះ ក្រុមការងារបានបាញ់ថ្នាំសម្លាប់មូសនៅបរិវេណសាលារៀន និងទីតាំងដែលមានហានិភ័យ ព្រមទាំងដាក់ថ្នាំអាបេតនៅក្នុងពាងទឹក អាងទឹក ធុងស្តុកទឹក និងកន្លែងផ្ទុកទឹកផ្សេងៗទៀត។ សកម្មភាពនេះបានគ្របដណ្តប់លើលំនៅឋានសរុប ២,២៦៧ខ្នងផ្ទះ និងពាង-អាង-ធុងស្តុកទឹកចំនួន ៦,៨០១ នៅក្នុងភូមិទាំង៤នៃសង្កាត់សិត្បូ ដែលមានប្រជាពលរដ្ឋសរុប ១៤,៩២៦នាក់ ស្មើនឹង ២,៥៨៤គ្រួសារ។

ទន្ទឹមនឹងការចុះអនុវត្តសកម្មភាពខាងលើ ក្រុមការងារក៏បានធ្វើការផ្សព្វផ្សាយអប់រំ និងណែនាំដល់សិស្សានុសិស្ស លោកគ្រូ អ្នកគ្រូនៅគ្រឹះស្ថានសិក្សាចំនួន៥ ក្នុងសង្កាត់សិត្បូ សរុបចំនួន ២,៦៥៩នាក់ ពីវិធីសាស្ត្រចូលរួមបំបាត់ជម្រកមូសខ្លា និងវិធានការការពារកុំឱ្យមានកើតជំងឺគ្រុនឈាមដល់មនុស្សគ្រប់វ័យ ពិសេសកុមារ និងស្ត្រីមានផ្ទៃពោះ។

ក្រុមការងារបានលើកទឹកចិត្តឱ្យប្រជាពលរដ្ឋចូលរួមសម្អាតអនាម័យបរិស្ថានជុំវិញលំនៅឋាន និងសាលារៀន ដោយលុបបំបាត់ទឹកដក់ សម្អាតទីធ្លា បិទគម្របធុង ឬពាងស្តុកទឹកឱ្យបានជិត និងសហការជាមួយមន្ត្រីជំនាញក្នុងការដាក់ថ្នាំអាបេត និងអនុវត្តវិធានការបង្ការផ្សេងៗឱ្យបានទៀងទាត់។

យុទ្ធនាការនេះមិនត្រឹមតែផ្តោតលើការកម្ចាត់ជម្រកមូសខ្លា និងបំបាត់ដង្កូវទឹកប៉ុណ្ណោះទេ ប៉ុន្តែក៏មានគោលបំណងបង្កើនការយល់ដឹង និងជំរុញការចូលរួមរបស់ប្រជាពលរដ្ឋ និងសិស្សានុសិស្ស ក្នុងការអនុវត្តវិធានការបង្ការជំងឺគ្រុនឈាមឱ្យបានជាប់ជាប្រចាំ ព្រោះការចូលរួមពីសហគមន៍ គឺជាកត្តាសំខាន់ក្នុងការកាត់បន្ថយការរីករាលដាលនៃជំងឺ និងការពារសុខភាពសាធារណៈផងដែរ៕