ស្ពានបេតុងថ្មីប្រវែង ១៤៤ម៉ែត្រ ជាអំណោយដ៏ថ្លៃថ្លារបស់សម្តេចបវរធិបតី ហ៊ុន ម៉ាណែត ឆ្លងកាត់ស្ទឹងពោធិ៍សាត់ សម្រេចបាន៩៥%ហើយ និងគ្រោងបញ្ចប់មុនបុណ្យភ្ជុំបិណ្ឌខាងមុខ (Video inside)
30-07-2026 15:30
(ពោធិ៍សាត់)៖ លោក ខូយ រីដា អភិបាលខេត្តពោធិ៍សាត់ ដោយបានការចូលរួមពីឧត្តមសេនីយ៍ឯក គង់ អៀង អនុរដ្ឋលេខាធិការ ក្រសួងការពារជាតិ នាថ្ងៃទី៣០ ខែកក្កដា ឆ្នាំ២០២៦ បានអញ្ជើញចុះពិនិត្យវឌ្ឍន៍ភាព នៃគម្រោងស្ថាបនាស្ពានបេតុងប្រវែង១៤៤ម៉ែត្រ ទទឹង១០ម៉ែត្រ ស្ថិតក្នុងភូមិបោះពួយ ឃុំលាច ស្រុកភ្នំក្រវាញ ខេត្តពោធិ៍សាត់ ជាអំណោយដ៏ថ្លៃថ្លារបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត តាមរយៈក្រសួងអភិវឌ្ឍន៍ជនបទ និងអនុវត្តគម្រោងសាងសង់ដោយ កងវិស្វកម្ម ក្រសួងការពារជាតិ។
ក្នុងឱកាសចុះពិនិត្យការដ្ឋាននោះ លោក ខូយ រីដា បានថ្លែងអំណរគុណយ៉ាងជ្រាលជ្រៅបំផុតចំពោះ សម្តេចបវរធិបតី ហ៊ុន ម៉ាណែត និងលោកជំទាវបណ្ឌិត ដែលបានផ្តល់កាដូដ៏មានតម្លៃជាស្ពានបេតុងដ៏រឹងមាំនេះ ជូនដល់ប្រជាពលរដ្ឋក្នុងខេត្តពោធិ៍សាត់ ជាពិសេសគឺការសម្រាលការលំបាកក្នុងការធ្វើដំណើររបស់បងប្អូនប្រជាពលរដ្ឋក្នុងស្រុកភ្នំក្រវាញ។
លោកបន្តថា ស្ពានបេតុងថ្មីនេះ ត្រូវបានបើកការដ្ឋានសាងសង់កាលពីថ្ងៃទី២២ ខែមេសា ឆ្នាំ២០២៥កន្លងទៅ។ គិតមកត្រឹមថ្ងៃទី៣០ ខែកក្កដា ឆ្នាំ២០២៦នេះ ការស្ថាបនាស្ពានបេតុងថ្មី ជំនួសស្ពានដែកបាឡេចាស់ ឆ្លងកាត់ស្ទឹងពោធិ៍សាត់ សម្រេចបាន៩៥%ហើយ ដោយគ្រោងនឹងបញ្ចប់ការដ្ឋានសាងសង់ទាំងស្រុង មុនពិធីបុណ្យភ្ជុំបិណ្ឌខាងមុខ។
បន្ថែមពីលើនេះ ឆាប់ៗខាងមុខ សោភណ្ឌភាពស្ពានថ្មីដ៏ប្រណិតនេះ នឹងត្រូវបំពាក់បន្ថែម អំពូលភ្លើងដើរដោយថាមពលពន្លឺព្រះអាទិត្យ (Solar) ប្រភេទ LED ដើម្បីជួយបំភ្លឺផ្លូវ និងលើកកម្ពស់សោភណ្ឌភាពនៅពេលយប់ ធានាបាននូវសុវត្ថិភាព និងភាពងាយស្រួលជូនដល់ប្រជាពលរដ្ឋក្នុងការធ្វើដំណើរឆ្លងកាត់។
គួរជម្រាបជូនថា ស្ពានដែកបាឡេចាស់ មានប្រវែង១៣៨ម៉ែត្រ និងទទឹង៥ម៉ែត្រ ស្ថិតក្នុងភូមិបោះពួយ ឃុំលាច ឆ្លងទៅកាន់ភូមិព្រែក៣ ឃុំសំរោង ស្រុកភ្នំក្រវាញ។ ស្ពាននេះស្ថាបនាដោយបញ្ជាការដ្ឋានវិស្វកម្ម ក្រសួងការពារជាតិ ក្រោមអាណាបក្សរបស់ក្រសួងអភិវឌ្ឍន៍ជនបទ ដោយចាប់ផ្តើមសាងសង់នៅថ្ងៃទី១៨ ខែមីនា ឆ្នាំ២០០៥ និងបញ្ចប់នៅថ្ងៃទី១៨ ខែមិថុនា ឆ្នាំ២០០៥ ជាអំណោយដ៏ថ្លៃថ្លា របស់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា។
ក្រោយបញ្ចប់ការងារបាន១ឆ្នាំ ស្ពានបាឡេភ្នំក្រវាញ បានរងការហូរច្រោះស្រុតក្បាលស្ពានត្រើយខាងកើត ដោយជំនន់ទឹកភ្លៀង និងត្រូវបានជួសជុលកែសម្រួលឡើងវិញដោយនាយកដ្ឋានផ្លូវលំជនបទ។ ស្ពាននេះបានប្រឈមនឹងការទ្រុឌទ្រោមខ្លាំង ដោយសារការដឹកជញ្ជូនសម្ភារៈសំណង់ ដើម្បីកសាងទំនប់ស្ទាក់ទឹកចំនួន២កន្លែង គឺទំនប់ទី៣ និងទំនប់ទី៥។
ចំពោះការស្ថាបនាស្ពានបេតុងថ្មីនេះ នឹងនាំមកនូវគុណប្រយោជន៍យ៉ាងមហាសាល ក្នុងការធានាបាននូវការតភ្ជាប់ទំនាក់ទំនងគមនាគមន៍ រវាងស្រុកភ្នំក្រវាញ និងតំបន់ជុំវិញឱ្យកាន់តែមានភាពរលូន ប្រកបដោយសុវត្ថិភាពខ្ពស់ ព្រមទាំងជួយជំរុញកំណើនសេដ្ឋកិច្ចមូលដ្ឋាន ការដឹកជញ្ជូនកសិផល និងការធ្វើដំណើររបស់ប្រជាពលរដ្ឋបានពេញមួយឆ្នាំ ដោយពុំមានការព្រួយបារម្ភ ពេលមានជំនន់ទឹកភ្លៀងដូចមុនទៀតឡើយ៕
